Псалманууд 117 - Библи

¹ Эзэндэ магтаал соло дуудагты! Юуб гэбэл, Тэрэ һайн, хайра энэрэлынь хэтэ мүнхын юм.

² «Тэрэнэй хайра энэрэлынь хэтэ мүнхэ» гэжэ израильшууд хэлэг лэ.

³ «Тэрэнэй хайра энэрэлынь хэтэ мүнхэ» гэжэ Аһарооной бүлэ хэлэг.

⁴ «Тэрэнэй хайра энэрэлынь хэтэ мүнхэ» гэжэ Эзэниие хүндэлэгшэд хэлэг лэ.

⁵ Зоболондо ороод байхадаа Би Эзэниие дуудааб. Эзэн намда харюусажа, уужам газарта гаргаа юм.

⁶ Эзэн минии талада, би айхагүйб. Хүн намда юу хэжэ шадахаб?

⁷ Эзэн намда туһална. Дайсадаа харахадаа, би айнагүйб.

⁸ Хүндэ этигэхэһээ Эзэндэ найдажа байбал, дээрэ.

⁹ Ноёдто этигэхэһээ Эзэндэ найдажа байбал, дээрэ.

¹⁰ Бүхы үндэһэ яһатан намайе хүреэлөө. Теэд Эзэнэй нэрээр би тэдээнһээ сүлөөрөөб.

¹¹ Тэдэ намайе бүһэлөө, бүһэлөө, Эзэнэй нэрээр би тэдээнһээ сүлөөрөөб.

¹² Тэдэ намайе зүгынүүд мэтэ хүреэлөө, адаалхай һөөгүүд соо гал мэтэ тэдэ аһаа. Теэд би Эзэнэй нэрээр тэдээнһээ сүлөөрөөб.

¹³ Намайе унагаахаяа тэдэ хүсэтэйгөөр түлхеэ һэн, теэд Эзэн намайе дүнгөө.

¹⁴ Эзэн болбол минии хүсэн ба хамгаалалтам. Тэрэ – минии абарал мүн!

¹⁵ Зүб шударга зоной майхан соо – баярай, абарагдаһанай хашхараан. Эзэнэй баруун гар хүсэеэ харуулаа!

¹⁶ Эзэнэй баруун гар дээшээ үргэгдөөтэй. Эзэнэй баруун гар хүсэеэ харуулаа!

¹⁷ Би хосорхогүйб, амиды мэндэ байхаб. Эзэнэй үйлэ хэрэгүүдые тунхаглан байхаб.

¹⁸ Эзэн намайе шанга хэһээгээ, теэд намайе үхэлдэ хүргөөгүй.

¹⁹ Намда зүб шударгын бартаануудые нээгыт! Би тэрээгээр орожо, Эзэндэ магтаал соло дуудахаб.

²⁰ Эзэнэй бартаанууд энэ юм. Зүб шударга зон тиишээ орохо.

²¹ Намайе дуулажа, харюусажа, абарһандатнай би Танда магтаал соло дууданаб!

²² Хэрэгсээнгүй барилгашадай голожо хаяһан шулуун гэрэй гол шухала тулга шулуун болоо.

²³ Энээниие Эзэн бүтээгээ. Манай нюдэндэ гайхалтай юумэн болоо.

²⁴ Энэ үдэр Эзэн иимэ юумэ үйлэдөө! Энэ үдэр баясан, сэнгэн байял!

²⁵ Гуйналди, Эзэн, абарыт! Гуйнабди, Эзэн, амжалта туйлуулыт!

²⁶ Эзэнэй нэрээр заларан Ерэгшэ үреэл магтаалда хүртэһэй! Бидэ Эзэнэй нангин үргөөһөө таниие юрөөнэбди.

²⁷ Эзэн болбол Бурхан. Тэрэ бидэндэ гэрэл үршөөгөө. Үргэлэй шэрээгэй эбэртэ тахил уягты!

²⁸ Та – минии Бурхан мүн, Би Танда һайе хүргэн байхаб. Та – минии Бурхан, Танда магтаал үргэн байхаб!

²⁹ Бурханда магтаал соло дуудагты! Юуб гэбэл, Тэрэ һайн, энэрэл хайрань хэтэ мүнхын юм.