Псалманууд 113 - Библи

¹ Израилиин Египедһээ, Яковай бүлын хариин зонһоо гаран ошоходо,

² Иуда Тэрэнэй нангин зүйл, Израиль Тэрэнэй эзэмшэл болоо бэлэй.

³ Далай тэдэниие хараад тэрьелбэ, Иордан һөөргөө урдаба.

⁴ Хаданууд хуса мэтэ һүрэлдэн, толгойнууд хурьгад мэтэ собхоролдоо.

⁵ Далай, юундэ тэрьедэбэш? Иордан, юундэ һөөргөө урдабаш?

⁶ Хаданууд, таанар хуса мэтэ юундэ харайгаабта? Толгойнууд, таанар хурьгад мэтэ юундэ собхоролдообта?

⁷ Газар дэлхэй, Эзэнэй урда, Яковай Бурханай урда шэшэрээрэй!

⁸ Тэрэ хабсагайе уһата нуур, хатуу шулууешье уһата булаг болгонол.

⁹ Эзэн, гансал Танда, гансал Танда, бидэндэ бэшэ, магтаал дуун зорюулагдаха ёһотой. Юуб гэбэл, энэрэл хайратнай, үнэн зүбтнай хэтын!

¹⁰ Үндэһэтэд юундэ «Тэдэнэй Бурхан хаана гээшэб?» гэжэ хэлэхэ ёһотойб?

¹¹ Бурхамнай тэнгэридэ оршодог, Өөрынгөө хүсэһэн юумыел хэдэг.

¹² Харин тэдэнэй онгонууд хадаа мүнгэн ба алтан, хүнэй гараар дархалһан юумэд:

¹³ аматай аад, дуугардаггүй, нюдэтэй аад, харадаггүй;

¹⁴ шэхэтэй аад, дууладаггүй, хамартай аад, үнэр ойлгодоггүй.

¹⁵ Гартай байбашье, барижа шададаггүй; хүлтэй байбашье, ябажа шададаггүй. Хоолойнь нэгэшье абяа гаргадаггүй.

¹⁶ Тэдэниие бүтээгшэд, тэдээндэ этигэгшэд бултадаа тэдээн шэнги болог лэ!

¹⁷ Израиль, Эзэндэ этигэ! Тэрэ хадаа манай туһа болон бамбай мүн.

¹⁸ Аһарооной бүлэ, Эзэндэ этигэ! Тэрэ хадаа манай туһа ба бамбай мүн.

¹⁹ Эзэнһээ түбэгшөөгшэд! Эзэндэ этигэгты! Тэрэ хадаа манай туһа ба бамбай мүн.

²⁰ Эзэн маанадые мартаагүй, юрөөжэ байна: Израилиин бүлэ юрөөнэ, Аһарооной бүлэ юрөөнэ.

²¹ Өөрһөөнь түбэгшөөгшэдые Тэрэ юрөөнэ – ехэ, багагүй бултыень.

²² Эзэн таанарыешье, үри һадаһадыетнайшье үнэр үдхэн болгог лэ.

²³ Таанар тэнгэри, газар бүтээгшэ Эзэнээр юрөөгдэжэ байнат.

²⁴ Тэнгэри болбол Эзэнэй тэнгэри, харин газар дэлхэйе Тэрэ хүнэй хүбүүдтэ үгөө.

²⁵ Үхэгшэд, шэмээгүй байдал руу доошоо орогшод бултадаа Эзэниие магтадаггүй,

²⁶ харин бидэ Эзэниие энэ сагһаа эхилэн хэтэ мүнхэдөө магтан дуулан байнабди. Эзэндэ магтаал үргэгты!