Псалманууд 11 - Библи

¹ [Дуунай бүлэгэй хүтэлбэрилэгшэдэ: найман хүбшэргэйтэ зэр зэмсэгэй дууряалга доро. Давидай псалма.]

² Эзэн, абарыт! Сэхэ шударга хүн таһараал! Зоной дунда этигэмээр хүн үгы болоол!

³ Тэдэ бэе бэедээ худалаар хэлэнэ. Урал амань худалша, һанаһан юумэеэ хэлэдэггүй.

⁴ Худалша урал амыень, һайрхан яряаша хэлыень Эзэн таһа сабшаг лэ!

⁵ Тэдэ «Ярихадаа бэрхэбди, хэлэмнай – манай зэр зэбсэг, хэншье маанадта захиржа шадахагүй» гэнэ.

⁶ Эзэн «Үгытэйшүүлэй хооһорхо, ядуу зоной ёолохо абяанһаа боложо Би мүнөө бодохоб. Хүсэһэнэйнь ёһоор аюулгүй газарта абаашахаб!» гэнэ.

⁷ Шабар зуухада хайлуулжа, долоо дахин сэбэрлүүлэгдэһэн мүнгэн мэтэ Эзэнэй үгэ сэбэр юм.

⁸ Эзэн, Та тэдэниие аршалнат. Мүнөө сагһаа эхилээд, үеын үедэ тэдэниие гамнан хамгаалнат.

⁹ Харин хорото муу зон тойроод эрьелдэнэ, муу этэгээд зоной дунда хүндэтэй болоод байна.