Псалманууд 106 - Библи

¹ Эзэндэ магтаал үргэгты! Юуб гэбэл, Тэрэ һайн. Юуб гэбэл, энэрэл хайрань хэтэ мүнхын.

² Иигэжэ хэд хэлэхэб гэбэл, Эзэнэй сүлөө болгоһон, дайсадай һабарһаа зайлуулһан зон хэлэхэл.

³ Үрнэ, умара зүгүүдһээ болон далайн талаһаа Тэрэнэй суглуулһан бүхы зон иигэжэ хэлэхэл.

⁴ Тэдэ хооһон сүл губяар тэнэжэ ябаа, зоной байдаг нютаг руу харгы зам төөреэд,

⁵ тэдэ гэдэһээ үлдэжэ, ангажа ябаа, үхэхэ туйлдаа хүрөөд байгаа.

⁶ Теэд тэдэ зобожо-тулижа Эзэниие дуудаба, тиихэдэнь Тэрэ гай гамшагһаа зайлуулба,

⁷ зоной байдаг нютаг руу зүб харгы заажа үгөө.

⁸ Энэрэл хайрынь, зоной аша туһада Тэрэнэй хэдэг гайхамшагта хэрэгэй түлөө зон Эзэниие магтан байха болтогой!

⁹ Юуб гэбэл, Тэрэ ангаһан зониие ундалуулаа, туража үхэжэ байгшадые эдеэлүүлээ.

¹⁰ Харин бусад зон харанхыда, бүрэг-барагта оршон байгаа, түмэр гэнжэдэ зобожо һуугаа.

¹¹ Юуб гэбэл, Эзэнэй үгэ тоогоогүй, Дээдэ Бурханай зарлигые сахяагүй.

¹² Тэдэ хүндэ ажалда зобоо, унабалынь хэншье туһалхагүй.

¹³ Теэд тэдэ зобожо-тулижа Эзэниие дуудаба, тиихэдэнь Тэрэ гай гамшагһаа абарба,

¹⁴ харанхы, бүрэг-барагһаа тэдэниие гаргаба, гэнжэ хүлилгынь бута сохибо.

¹⁵ Энэрэл хайрынь, зоной аша туһада Тэрэнэй хэдэг гайхамшагта хэрэгэй түлөө зон Эзэниие магтан байха болтогой!

¹⁶ Юуб гэбэл, Тэрэ зэд хаалгануудые үгы хээ, түмэр суургануудые бута сохёо.

¹⁷ Буруу юумэ хэдэг байһаниинь өөһэдынь зобоогоо, иигэжэ тэдэ гэмэйнгээ түлөө зобоо.

¹⁸ Ямаршье эдеэ хоолһоо тэдэ буруу харадаг байгаа, үхэлэй аманда орохоёо байгаа.

¹⁹ Теэд тэдэ зобожо-тулижа Эзэниие дуудаба, тиихэдэнь Тэрэ гай гамшагһаа абарба.

²⁰ Тэрэ үгэеэ эльгэжэ, тэдэниие аргалаа, хүүрһээ зайлуулаа.

²¹ Энэрэл хайрынь, зоной аша туһада Тэрэнэй хэдэг гайхамшагта хэрэгэй түлөө зон Эзэниие магтан байха болтогой!

²² Баяр хүргэһэнэй үргэл тэдэ хэнэ, Тэрэнэй хэһэн юумэ баяртай тунхаглана.

²³ Онгосоор далайгаар тамарагшад, хизааргүй ехэ уһан дээр зам татагшад

²⁴ Эзэнэй хэрэгүүдые харана, гүн уһан дундуур үйлэдэгшэ гайхамшагта хэрэгүүдынь үзэнэ.

²⁵ Тэрэ үгэ айладхаа – һалхин үлеэбэ, далайн долгинуудые дабалгатуулаба.

²⁶ Тэнгэридэ тулама, гүндэ унама тэдэ байгаа, сэдьхэлынь зобоһондоо хайлан байгаа.

²⁷ Тэдэ архиншадал эрьелдэн, найгалзан байгаа, бүхы сэсэн мэргэн тэдээндэ хэрэгтэй бэшэ.

²⁸ Теэд тэдэ зобожо-тулижа Эзэниие дуудаба, тиихэдэнь Тэрэ гай гамшагһаа гаргаба.

²⁹ Тэрэ шуурга номгоруулжа, нам гүм болобо, долгинууд шааяхаа болибо.

³⁰ Шуурганай замхаһанда тэдэ баярлаа. Тэрэ тэдэниие хүсэгшэ газартань асараа.

³¹ Энэрэл хайрынь, зоной аша туһада Тэрэнэй хэдэг гайхамшагта хэрэгэй түлөө зон Эзэниие магтан байха болтогой!

³² Арадай суглаан дээр Тэрэниие магтана, ахамадуудай дунда алдаршуулна.

³³ Голой урдажа байгаа газар сүл губи болгоо, булагай дэлбэржэ байгаа газар хуурай болоо.

³⁴ Ажаһуудаг зонойнь нүгэлэй түлөө Тэрэ үрэжэлтэй газарые хужар болгоо,

³⁵ Харин сүл губиин орондо нуур сөөрэм байгуулаа, хуурай газарай һуурида булаг дэлбэрээ.

³⁶ Гэдэһээ үлдэжэ ябагша зониие Тэрэ хүтэлэн тэндэ асарна, тэдэ тосхонуудые барина, тэндээ ажаһууна.

³⁷ Тэдэ үзэмэй сэсэрлиг һуулгана, иигэжэ угаа ехэ ургаса суглуулна.

³⁸ Тэрэ тэдэниие юрөөнэ, иигэжэ тэдэ угаа олон болоно, малайнь тоошье бага бэшэ.

³⁹ Харин бусад үсөөн болоно, дарлалтаһаа, гай тодхорһоо, зоболонһоо муудана.

⁴⁰ Түшэмэлнүүдые эшхэбтэр байдалда оруулна, сүл губи руу абаашана, замһаань хадууруулна.

⁴¹ Харин ядуу зониие үргэжэ, зоболонһоонь татан гаргана, һүрэг хонид мэтэ үнэр бүлэтэй тэдэ болоно.

⁴² Зүб шударга зон хаража, хүхилдэнэ, харин зүб бэшэ ябадалтай хүн амаашье ангайха эрхэгүй.

⁴³ Сэсэн мэргэн ухаатай хүн анхаралтай энээниие обёоржо, Эзэнэй энэрэл хайрые ойлгог лэ.