Псалманууд 103 - Библи

¹ Сэдьхэлни, Эзэниие магтан дуула! Эзэн Бурхамни! Та агууехэт! Алдар соло болон һүр жабхалан – Танай хубсаһан.

² Хубсаһа үмдэдэгтэл адляар Та Өөрөө гэрэл нэмэрээт, тэнгэриие хүшэгэ шэнгеэр татаат.

³ Ордонойнгоо тулгуур баханануудые уһан соо шаагаат, үүлэдые Өөрынгөө тэргэ болгон хүлэглөөт, һалхинай жэгүүрээр ябанат.

⁴ Та һалхиие Өөрын Эльгээмэл, галай дүлэ Өөрын зараса болгонот.

⁵ Хэтын хэтэдэ һууриһаа хүдэлхэгүйн тула Та газар дэлхэйе бата һуури дээрэ табин тогтоогоот.

⁶ Тэрэниие хубсаһаар халхалһантай адли гүн уһаар бүрхөөгөөт, ехэ уһан хада уула дээгүүр байнал.

⁷ Танай захиран хашхархада тэдэ гүйлдэбэ, тэнгэриин дуунһаатнай хорон зайлана,

⁸ хада уулаар гүйлдэжэ, нюруу тала газар руу бууба, Танай захирһан газарта тэдэ суглаба.

⁹ Газарые бүрхөөхэгүйн тула, халихагүйн тула Та ехэ уһанай хизаар тогтоогоот.

¹⁰ Та тала нюрууда булагуудые орьёлуулнат, хада уулануудай дундуур тэдэ урдана.

¹¹ Тэдэ хээрэ талын ан гүрөөл ундалуулна, хулангууд ангаагаа гаргана.

¹² Тэдээн дээгүүр огторгойн шубууд байрлажа, мүшэрэй дунда дуулан жэргэнэ.

¹³ Дээдэ ордонһоо хада уулануудые норгонот, ажал хэрэгүүдэйтнай дүнгөөр газар дэлхэй хооллоно.

¹⁴ Мал һүрэгтэ гэжэ үбһэ ногоо, зоной аша туһада, хүдэлмэриинь түлөө гэжэ ногоо ургуулнат.

¹⁵ Иигэжэ эдэ бүгэдэ хүнэй зүрхые үзэмэй дараһан архиин баясуулхын, нюурынь тоһонһоо яларан байхын тула, хүндэ тэнхээ оруулдаг хоол хүнэһэнэй тула юм.

¹⁶ Эзэнэй модод, Өөрынь һуулгаһан Ливаанай хуша модод, элбэгээр ундалдаг юм.

¹⁷ Шубууд тэндэ уурхайлдаг, аист нарһан соо байрладаг.

¹⁸ Үндэр хада ууланууд – янгирай байра, хабсагайнууд – доргоной хорохо газар.

¹⁹ Тэрэ саг харуулан байхын тула һара бүтээгээ, наранайшье шэнгэхэ саг тодорхойлоо.

²⁰ Харанхые дэлгэхэдэтнай һүни болодог, тиихэдэ ой соогуур арьяатан ябажа байдаг.

²¹ Арсалангууд хүнэһэ бэдэрэн архирдаг, Бурханһаа хоол гуйдаг.

²² Наранай мандахада, тэдэ харижа, нүхэндөө ошожо хэбтэдэг.

²³ Хүн ажал хэхэеэ, үдэшэ болотор хүдэлхэеэ гарадаг.

²⁴ Эзэн, Танай хэрэгүүд хэды олон бэ! Сэсэн мэргэн ухаагаар Та тэдэниие бүтээгээт. Газар дэлхэй Танай бүтээлээр дүүрэн.

²⁵ Агууехэ үргэн далай бии. Тэндэ тоо томшогүй олон мүлхигшэд, бага, жэжэ амитад байдаг.

²⁶ Тэндэ далайн онгосонууд тамардаг, тэндэ наадажа байхаар Танай бүтээһэн Левиатаншье бии.

²⁷ Хэрэгтэй сагтань хоол хүнэһэ үгэхынтнай түлөө Тэдэ Тан руу эрьенэ.

²⁸ Танай тэдээндэ үгэхэдэ, тэдэ тодожо абадаг, Танай гараа һарбайхада, тэдэ һайн һайханаар садан ханадаг.

²⁹ Танай буруу харабал, тэдэ хүлгэдэг, амисхалынь Танай абахада, тэдэ үхэжэ, шорой хүрьһэндөө бусадаг.

³⁰ Һүлдэеэ эльгэхэдэтнай, тэдэ бүтээгдэдэг, иигэжэ Та газар дэлхэйн үнгэ зүһые шэнэлнэт.

³¹ Эзэнэй алдар хэтэ мүнхэдөө байхань болтогой! Эзэн Өөрын бүтээлнүүдтэ баярлахань болтогой!

³² Газар дэлхэй руу харахадань, газар шэшэрдэг, хада уулануудта хүрэхэдэнь, тэдэ утаа гаргадаг.

³³ Амидарха бүхы сагтаа Эзэндэ магтаал дуулахаб, амиды байхадаа Эзэндэ дуу үргэхэб.

³⁴ Дуумни Тэрээндэ һайшаагдахань болтогой! Эзэндэ би баясанаб.

³⁵ Нүгэлтэн газар дэлхэйһээ үгы болог, хорото муу зон зайлуулагдаг! Сэдьхэлни, Эзэниие магтан дуула! Эзэндэ магтаал үргэе!