Нүүнэй Иисүүс 9 - Библи

Иорданай саанахи хаашуул Израильтай дайлалдахаа бэлдэбэ

¹ Энээниие дуулахадаа Иорданай саанахи бүхы хаашуул, хададашье, таладашье, агууехэ далайн бүхы эрьеэр байһан хаашуул, Ливаанда, Хээдтэ, Эмоорто, Ханаһаанда, Пэриззиидэ, Хиивдэ ба Евүүстэ байһан хаашуул

² Иисүүстэй ба Израильтай эбтэй тэмсэхын тула булта сугларба.

³ Зүгөөр Гибэһооной зон Ерихоон Һай хоёрые Иисүүсэй яаһые дуулаад,

⁴ мэхэ гаргаба: харгыдаа эдихэ хилээмэ абаад, элжэгэнүүдтээ хуушан мүшөөгүүдые, хахархай халааһатай үзэмэй дараһан архиин туламуудые ашаад ошобо.

⁵ Хүлэйнь гуталшье хуушан, халааһатай, хубсаһанииньшье хуушан үмхи, харгын хилээмэнииньшье хатанги, буританги байгаа.

⁶ Тэдэ Гилгаалда Израилиин зоной тогтоһон газарта, Иисүүстэ ерээд: – Ехэ холо газарһаа ерээбди, тиимэһээ мантай эб найрамдал тухай хэлсээ баталыт, – гэжэ хэлэбэ ха.

⁷ Израилиинхин хиивүүдтэ хэлэбэ: – Таанар манда дүтэ байнагүй гүт? Яажа тантай эб найрамдал тухай хэлсээ баталхабибди?

⁸ Тэдэ Иисүүстэ хэлэбэ: – Бидэ шинии богоолнуудбди. Иисүүс тэдээндэ хэлэбэ: – Хэд гээшэбта, хаанаһаа ерээбта?

⁹ Тэдэ Иисүүстэ хэлэбэ: – Ехэ холын газарһаа ерээбди. Эзэнэй һэшхэлдэ, шинии Бурханай һэшхэлдэ шинии богоолнууд болонобди. Тэрээнэй алдар тухай, Египедтэ Тэрээнэй юу хэһэн тухай дуулаабди.

¹⁰ Иорданай саада талада байһан Эмоорой хоёр хаашуулда Хэшбооной хаан Сиһоондо, Аштароодто байһан Башаанай хаан Оогдо юу хэһыень дуулаабди.

¹¹ Иимэ юумэ дуулахадаа, манай үбгэн түрүүшүүл, манай газарай бүхы зон манда иигэжэ хэлээ: – Харгыдаа хилээмэ абаад, урдаһаань ошожо, «Бидэ танай богоолнуудбди, мантай эб найрамдал тухай хэлсээ баталагты», – гэгты.

¹² Энэ хилээмэ танда ерэхээ харгыда гараһан үдэрөө халуун байхадань гэрһээ абаабди, мүнөө энэмнай хатажа буритаа.

¹³ Энэ архиин туламуудта шэнэ үзэмэй дараһан архи хээ һэмди, мүнөө эдэмнай хахараа, гутал хубсаһамнайшье холын харгыда хуушараа.

¹⁴ Израильшууд тэдээнэй хилээмынь абаад, Эзэнһээ һураагүй.

¹⁵ Иисүүс тэдээнтэй эб найрамдал тухай хэлсээ баталаад, амин голытнай таһалхагүйб гэжэ тогтоол гаргаа. Олоной ударидагшад тиимэ тангариг үгөө.

¹⁶ Эб найрамдал тухай хэлсээ баталһанай хойно гурба хоноод, тэдэ хүршэнэрнай, манһаа холо бэшэ байдаг гэжэ дуулаа.

¹⁷ Яагаад бэ гэбэл, Израилиин хүбүүд харгыда гараад, гурбадахи хоногтоо тэдэнэй хотонуудта хүрөө. Тэдэнь Гибэһоон, Хэпираа, Бээроот ба Кирьяат-Еариим хотонууд һэн.

¹⁸ Израилиин хүбүүд тэдээниие сохёогүй, юундэб гэхэдэ, олоной ударидагшад Эзэнэй, Израилиин Бурханай нэрээр тангариглаа. Энээнэй түлөө бүхы Израилиин зон дарганартаа голхорон гомдоо.

¹⁹ Ударидагшад бүхы олондо хэлээ: – Бидэ Эзэнэй, Израилиин Бурханай нэрээр тангариглаабди, тиимэһээ эдээнэй ойро хүрэхэ аргагүйбди.

²⁰ Манай үгэһэн тангаригай түлөө уур хилэндэ хүртэхэгүйн тула эдээниие амиды орхиё.

²¹ Тиигээд ударидагшад хэлээ: – Амиды байг, зүгөөр хамта олондо түлеэ хахалдаг, уһа удхадаг байха. Бүхы олон дарганарай хэлэһэн ёһоор болоо.

²² Иисүүс тэдээниие дуудаад: – Юунэй түлөө маниие мэхэлээбта, манда дүтэ байдаг аад, «ехэ холымди» гээбта? – гэжэ һураа.

²³ – Энээнэй түлөө хараалда хүртэбэт! Наһан соогоо богоол ябахат, минии Бурханай гэртэ түлеэ хахалхат, уһа удхахат, – гээ.

²⁴ Харюудань тэдэ хэлээ: – Эзэн, шинии Бурхан таанарта бүхы газар үгэжэ, танай урда газар дээрэхи бүхы зониие усадхахынь өөрынгөө богоол Моисейдэ захираа гэһэн мэдээн богоолнуудайш шэхэндэ хүрөө, тиихэдэнь бидэ амиимнай таһалхань гэжэ ехээр айһандаа иимэ юумэ хээбди.

²⁵ Мүнөө шинии гарта байнабди: яажа һайнаар, гомдолгүйгөөр манда хандахаб гэжэ һананаш, тиижэл ханда.

²⁶ Иисүүс тэдэниие Израилиин хүбүүдэй гарһаа сүлөөлөө, израильшууд тэдээниие алаагүй.

²⁷ Тэрэ үдэр Иисүүс олондо ба Эзэнэй үргэлэй газарта түлеэ хахалхынь, уһа удхахынь томилоо; мүнөөш хүрэтэр тэдэ Эзэнэй һунгаһан үргэлэй газарта тиимэ ажал хэжэ байна.