Нүүнэй Иисүүс 7 - Библи

Ахаанай нүгэл ба хараал тухай

¹ Теэд Израилиин хүбүүд гэмтэ хэрэг хээ, Эзэндэ зорюулаатай юумэнһээ абаа. Иудын обогой Зээрахай Забдиин, тэрээнэй хүбүүн Хармиигай хүбүүн Ахаан хараалта юумэнһээ абаад, Эзэнэй уур хилэн Израилиин хүбүүдтэ буугаа.

² Ерихоонһоо Иисүүс Бэт-Ээлэй зүүн талада Бэт-Аавэн шадар байһан Һай руу хүнүүдые эльгээгээд, тэдээндэ: – Ошоод газар харагты, – гэжэ хэлээ. Тэдэнь ошоод, Һай хотые хараа.

³ Һөөргөө Иисүүстэ бусаад, тэдэ хэлээ: – Бүхы зон тиишэ бү ошог, хоёр гурбан мянга тухай зон ошоод, Һай хотые эзэлэг; бүхы зониие тиишэ эльгээжэ бү зобоо, хотодо үсөөн зон байна.

⁴ Тиигээд бүхы арадһаа гурбан мянга тухай зон тиишэ ошоо. Теэд тэдэ Һай хотын зонһоо тэрьелэн зугадаа.

⁵ Һай хотынхид гушан зургаан хүниие алаад, хотынгоо хаалгаһаа Севарим хүрэтэр мүрдэн намнаа, тиигээд хадаһаа буухадань, бута сохёо. Тэрээнһээ арадай зүрхэн хайлаад, уһан шэнги болоо.

⁶ Иисүүс хубсаһаа таһа татан уряад, Эзэнэй хэлсээнэй ханзын урда нюураараа газар мүргэн унаа, үдэшэ болотор хэбтээ. Иисүүс ба Израилиин аха захатан тархидаа үнэһэн тоборог адхаа.

⁷ Иисүүс иигэжэ хэлээ: – Түгэс хүсэтэ Эзэн! Юундэ Та энэ арадые Иордан гаталуулан гаргаабта? Маниие эмооршуудай гарта үгэжэ, усадхахын түлөө гү? Иорданай саана үлэхөө яагаабибди!

⁸ Эзэн Бурхан! Израилиин дайсадтаа нюргаа харуулһан хойно би юун гэхэбиб?

⁹ Ханаһаан оронойхид ба газар дэлхэйн бүхы зон дуулаад, манай нэрые газар дээрэһээ усадхахал. Тиихэдэнь Танай агууехэ нэрэ нэрлүүлхэдэ Та юу хэхэбта?

¹⁰ Эзэн Иисүүстэ хэлээ: – Бодо, юундэ ши нюураараа газар мүргэн хэбтээбши?

¹¹ Израиль нүгэл хээ, Минии тэдэндэ сахижа байхыень захирһан, Намтай баталһан хэлсээгээ эбдээ, Намда зорюулагдаһан юумэнһээ тэдэ хулуужа абаад, өөһэдынгөө юумэнэй дунда нюугаа.

¹² Тииһэнэй түлөө Израилиин хүбүүд дайсадайнгаа урда тэсэнгүй дайсадта нюргаа харуулаа, юуб гэхэдэ, тэдэ хараалда хүртөө; өөһэдынгөө дундаа хараалтые усадхаагүй һаатнай, таанадаар ябахагүйб.

¹³ Бодо, арад зоноо арюудхаад, тэдээндэ хэлэ: – Үглөөгүүр болотор нүгэлөө арюудхагты. Юундэб гэхэдэ, Эзэн, Израилиин Бурхан: «Израиль, хараалта юумэн дундашни байна; тиимэһээ хараалтые бэеһээ холодхоогүй сагтаа дайсадайнгаа урда тэсэхэгүйш», – гэнэ гэ.

¹⁴ Үглөөдэр булта обогуудаараа ерэгты. Эзэнэй зааһан обог угуудаараа ерэг; Эзэнэй зааһан уг бүлэнүүдээрээ ерэг; Эзэнэй зааһан бүлэһөө нэгэ нэгэ хүн ерэг.

¹⁵ Хараалда хүртэһэн юумэ хулуугаа гэжэ элирүүлэгдэһэн хүн хамаг юумэтэйгээ хамта галда шатаагдаха зэргэтэй; тэрэ хүн Эзэнтэй баталһан хэлсээгээ эбдээ, хуули буса ябадалаараа Израилиие бузарлаа.

¹⁶ Иисүүс үглөөгүүр эртэ бодоод, Израилиие обог обогоорнь ерэхые захиржа, Иудын обог зааба.

¹⁷ Тиигээд Иудын обогые угуудаараа ерэхынь захиржа, Зээрахай уг заагаа. Зээрахай угта бүлөөрөө ерэхынь захираад, Забдиин бүлэ заагаа.

¹⁸ Бүлэдэ нэгэ нэгээрээ ерэхыень захираад, Зээрахай гуша, Забдиин аша, Хармиигай хүбүүн Ахааниие Иудын обогһоо заагаа.

¹⁹ Тиигээд Иисүүс Ахаанда хэлээ: – Хүбүүмни! Эзэндэ, Израилиин Бурханда алдар соло үгэ, Тэрээнэй урда сэхэеэ хэлэ, намһаа нюунгүй юу хэһэнээ намда соносхо.

²⁰ Харюудань Ахаан Иисүүстэ хэлээ: – Зүб, би Эзэнэй урда, Израилиин Бурханай урда нүгэлтэйб, тиимэ юумэ хээб:

²¹ олзын дунда нэгэ һайхан Шинаарай хубсаһа, хоёр зуун шээкэл мүнгэ, табин шээкэл жэнтэй монсогор алта харааб. Эдэ бүгэдые һайхашаагаад абааб; эдээниие майхан соогоо газарта булааб, мүнгэ доронь нюугааб.

²² Иисүүсэй эльгээһэн хүнүүд майхандань гүйлдэжэ ошоод, нюуһан юумыень, доронь мүнгыень олоо.

²³ Эдэ бүгэдые майхан соонь олоод, Иисүүстэ, Израилиин бүхы хүбүүдтэ асараад, Эзэнэй урда табяа.

²⁴ Иисүүс ба тэрээнтэй бүхы израильшууд Зээрахай хүбүүн Ахааниие, мүнгэ, хубсаһа, монсогор алта, хүбүүд, басагад, сар, элжэгэ, хони, майхан, бүхы байһан юумыень абаад, Ахоор хүндыдэ гаргаа.

²⁵ Иисүүс иигэжэ хэлээ: – Манда гай тодхор асарһанайш түлөө Эзэн энэ үдэр шамда тодхор ушаруулна. Израильшууд тэрээниие шулуугаар шэдээд, бултыень шулуудажа шатаагаад, шулуу хаяжа булаа.

²⁶ Үндэр обоо шулуу дээрэнь хаяа. Тэрэ обоо мүнөөш хүрэтэр бии. Энээнэй һүүлээр Эзэнэй уур хилэн номгороо. Тиимэһээ тэрэ газарые мүнөөш хүрэтэр Ахоор хүнды гэдэг.