Нүүнэй Иисүүс 3 - Библи

Израиль угсаатан Иорданиие гаталба

¹ Иисүүс израильшуудтайгаа үглөөгүүр эртэ бодоод, Шиттиимһээ гаража, Иорданда ерэбэ. Тэдэ Иорданиие гаталангүй тэндээ хонобо.

² Гурба хоноод, ахамадууд зоной байһан газар эрьебэ. Тиигээд зондо зарлиг буулгаба:

³ – Танай Бурхан болохо Эзэнэй хэлсээнэй ханза, тэрээниие үргөөд ябаһан шажанай албатан левидүүдые харахадаа, байраһаа хүдэлжэ, хойноһоонь ябагты.

⁴ Танай ба Эзэнэй хоорондохи зай хоёр мянган тохой хүрэтэр хэмжүүртэй байха ёһотой; тэрээндэ бү дүтэлэгты. Тэрэ замаар ябаашьегүй һаа, тиигэжэ ябаха замаа мэдэхэт.

⁵ «Бэеэ арюудхагты, юуб гэхэдэ, үглөөдэр Эзэн танай дунда үзэгдөөгүй юумэ харуулха», – гэжэ Иисүүс зондо хэлэбэ.

⁶ Санаартанда Иисүүс иигэжэ хэлэбэ: – Хэлсээнэй ханза үргөөд, зоной урда ябагты. Санаартан ханза үргөөд, зоной урда ябаба.

⁷ Тиихэдэнь Эзэн Иисүүстэ иигэжэ айладаба: – Израилиин бүхы хүбүүдэй урда шамайе энэ үдэр алдаршуулан магтажа эхилхэб. Тиихэдэм Намайе Моисейтэй ябаһандал шамтай ябахань гэжэ тэдэ ойлгохо.

⁸ Ши хэлсээнэй ханза үргэжэ ябаһан санаартанда: «Иорданай уһан соо орон сасуу тогтогты», – гэжэ зарлиг буулга.

⁹ Иисүүс Израилиин хүбүүдтэ: – Наашаа дүтэлөөд, Эзэнэй, танай Бурханай үгэ шагнагты, – гэжэ хэлэбэ.

¹⁰ Иисүүсэй хэлэһэниинь: – Тэрэ үгэһөө танай дунда амиды Бурхан бии гэжэ мэдэхэт. Танда газар үгэхын тула Тэрэ ханаһаануудые, хээдүүдые, хиивүүдые, пэриззиинүүдые, гиргаашуудые, эмооршуудые, евүүсүүдые үлдэхэ.

¹¹ Энэ бүхы газарай Эзэнэй хэлсээнэй ханза танай урда Иорданиие гаталха;

¹² Израилиин обогуудһаа арбан хоёр хүниие, обог бүхэнэй нэгэ хүниие абагты.

¹³ Бүхы газарай Эзэнэй ханза үргэлжэ ябаһан санаартанай хүлэй һүеын Иорданай уһанда ороходо, Иорданай уһан хатаха, дээрэһээ урдаһан уһан хана болохо.

¹⁴ Тиигээд зоной Иорданиие гаталхаа майхангуудһаа хүдэлхэдэ санаартан хэлсээнэй ханза зоной урдуур үргэн гараба.

¹⁵ Хэлсээнэй ханза үргөөшэдэй Иорданда орожо, шажанай албатанай хүлнүүдэй уһанда нороходо (Иордан шэниисэ хадаха бүхы үдэрнүүдтэ эрьеһээ халижа байгаа),

¹⁶ дээрэһээ урдаһан уһан Царэтаанай хажуудахи Адаам хото хүрэтэр ехэ зайда хана болобо; талын далай, Дабһата далай руу урдаһан уһан шэргэн дууһаба.

¹⁷ Зон Ерихооной хажуугаар гаталба; Эзэнэй хэлсээнэй ханза үргэжэ ябаһан санаартан Иорданай тэг дунда хуурай газар дээрэ зогсожо байба. Израилиин хүбүүд хуурай газараар Иордан голые гаталба.