Нүүнэй Иисүүс 21 - Библи

Левидүүдтэ үгтэһэн хотонууд

¹ Левидүүдэй обогой дарганар шажанай албатан Эльазаарта, Нүүнэй хүбүүн Иисүүстэ, Израилиин удамаршадта ерээд,

² Шилоодо, Ханаһаанай газар дээрэ, иигэжэ хэлээ: – Эзэн Моисейгээр дамжуулжа, манай һууха хотонуудые, малаа бариха шадарай газар үгэхэ гээ.

³ Тиигээд Израилиин хүбүүд Эзэнэй зарлигаар өөһэдынгөө хубаариһаа левидүүдтэ иимэ хотонуудые шадар газартайнь үгөө.

⁴ Кэһаадай угсаатанда жээрэб буулгаа; шажанай албата Аһарооной үри һадаһад байһан левидүүдтэ Иудын обогһоо, Симеоной обогһоо, Бэньямиинэй обогһоо жээрэбээр арбан гурбан хотонууд тудаа.

⁵ Кэһаадай бэшэ хүбүүдтэ Эпрааимай обогой угсаатанһаа, Даанай обогһоо, Мэнашшээгэй обогой хахадһаа жээрэбээр арбан хотонууд тудаа.

⁶ Гэршооной хүбүүдтэ Иссахаарай обогой угсаатанһаа, Ашээрэй обогһоо, Напталиигай обогһоо, Мэнашшээгэй обогой хахадһаа Башаанда жээрэбээр арбан гурбан хотонууд тудаа.

⁷ Мэрариин үри һадаһадта тэдээнэй угсаагаар Рэүбээнэй, Гаадай ба Зэбүлүүнэй обогуудһаа арбан хоёр хотонууд тудаа.

⁸ Тиигээд Израилиин хүбүүд Эзэнэй Моисейгээр дамжуулжа захиһан ёһоор левидүүдтэ энэ хотонуудые шадар газартайнь үгөө.

⁹ Иудын хүбүүдэй обогһоо, Симеоной хүбүүдэй обогһоо эндэ нэрээрнь нэрлэһэн хотонуудые үгөө:

¹⁰ жээрэбынь түрүүлэн бууһан ушарһаа Кэһаадай угсаатанһаа, Левиин хүбүүдһээ Аһарооной хүбүүдтэ

¹¹ Иудын хада дээрэ оршоһон Кирьяат-Арбаае, ондоогоор Хэброониие, тойроод байһан шадар газарынь үгөө (Арба болбол Анаагай эсэгэнь һэн);

¹² энэ хотын талбай, оршон тойроһон тосхонуудынь Епуннээгэй хүбүүн Халээбтэ үмсэ болгожо үгөө.

¹³ Иигэжэ шажанай албатан Аһарооной хүбүүдтэ алууршын хорохо шэбээ хото Хэброониие ба шадарынь, Либнаае ба шадар газарынь,

¹⁴ Яттиирые ба шадар газарынь, Эштэмооһае ба шадар газарынь,

¹⁵ Холоониие ба шадар газарынь, Дэбиирые ба шадар газарынь,

¹⁶ Ааиниие ба шадар газарынь, Юттаае ба шадар газарынь, Бэт-Шээмэшые ба шадар газарынь: хоёр обогһоо юһэн хотонуудые үгөө.

¹⁷ Бэньямиинэй обогһоо Гибэһоониие ба шадар газарынь, Гээбые ба шадар газарынь,

¹⁸ Анатоодые ба шадар газарынь, Алмоониие ба шадар газарынь, хамтадаа дүрбэн хото үгөө.

¹⁹ Бүхы дээрээ Аһарооной хүбүүдтэ, шажанай албатанда, арбан гурбан хото шадар газартаяа үгтөө.

²⁰ Кэһаадай хүбүүдэй угсаатанда, левидүүдтэ, Кэһаадай бэшэшье хүбүүдтэ жээрэбэй ёһоор Эпрааимай обогһоо хотонууд тудаа.

²¹ Тэдээндэ алууршанай хорохо шэбээ хото Шэхээмые ба шадар газарынь Эпрааимай хада дээрэ, Гээзэрые ба шадар газарынь,

²² Кибцааимые ба шадар газарынь, Бэт-Һороониие ба шадар газарынь: дүрбэн хотонуудые үгөө.

²³ Даанай обогһоо Элтэкээе ба шадар газарынь, Гиббэтоониие ба шадар газарынь,

²⁴ Аялоониие ба шадар газарынь, Гаат-Риммоониие ба шадар газарынь: дүрбэн хотонуудые үгөө.

²⁵ Мэнашшээгэй обогой хахадһаа Таанаахые ба шадар газарынь, Гаат-Риммоониие ба шадар газарынь: хоёр хотые үгөө.

²⁶ Кэһаадай хүбүүдэй бэшэ угсаатанда бүхы дээрээ арбан хотонууд шадар газартаяа үгтөө.

²⁷ Гэршооной хүбүүдтэ, левиин угсаатанай, Мэнашшээгэй обогой хахадһаа алууршын хорохо шэбээ – Башаанай Голаан хотые шадар газартайнь ба Бээштэраае шадар газартайнь: хоёр хото үгөө.

²⁸ Иссахаарай обогһоо Кишиһоониие ба шадар газарынь, Дабэраатые ба шадар газарынь,

²⁹ Ярмуудые ба шадар газарынь, Эн-Ганниимые ба шадар газарынь: дүрбэн хото үгөө.

³⁰ Ашээрэй обогһоо Мишаалые ба шадар газарынь, Абдооние ба шадар газарынь,

³¹ Хэлкаадые ба шадар газарынь, Рэһообые ба шадар газарынь: дүрбэн хото үгөө.

³² Напталиигай обогһоо алууршын хорохо шэбээ хотые – Галилейн Кээдэшые ба шадар газарынь, Хаммоот-Доорые ба шадар газарынь, Картааные ба шадар газарынь: гурбан хотые үгөө.

³³ Гэршооной хүбүүдтэ изагуураарнь бүхы дээрээ арбан гурбан хотонууд шадар газартаяа үгтөө.

³⁴ Мэрариин хүбүүдэй изагуурнуудта, бэшэ левидүүдтэ Зэбүлүүнэй обогһоо Ёкнэһаамые ба шадар газарынь, Картаае ба шадар газарынь,

³⁵ Димнаае ба шадар газарынь, Наһалаалые ба шадар газарынь: дүрбэн хотые үгөө.

³⁶ Рэүбээнэй обогһоо Бээцэрые ба шадар газарынь, Яаһцаае ба шадар газарынь,

³⁷ Кэдэмоотые ба шадар газарынь, Мэпаадые ба шадар газарынь: дүрбэн хото үгөө.

³⁸ Гаадай обогһоо алууршанай хорохо шэбээ хотонуудые – Галаадай Рамоотые шадар газартайнь, Маханааимые шадар газартайнь,

³⁹ Хэшбоониие шадар газартайнь, Язээрые шадар газартайнь: дүрбэн хото үгөө.

⁴⁰ Мэрариин хүбүүдтэ изагуураарнь, левидэй бэшэ изагууртанда бүхы дээрээ жээрэбээр арбан хоёр хото тудаа.

⁴¹ Израилиин хүбүүдэй мэдэлэй газарта левидүүдтэ бүхыдөө дүшэн найман хотонууд шадар газартаяа байгаа.

⁴² Хото бүхэнэй дэргэдэ тойроод шадар газар байгаа.

Эзэнэй үгэ дүүргэгдөө: заяата газар эзэлэгдээ

⁴³ Иигэжэ Эзэн эсэгэнэртэнь үгэхэб гэжэ тангариглаһан бүхы газараа Израильда үгөө. Тэдэ газарые үеһөө үедэ орохо эдлэл болгон абаад, дээрэнь һуурижаа.

⁴⁴ Эсэгэнэртэнь тангариглаһан ёһоороо бүхы талаһаань амгалан байдал Эзэн тогтоогоо; дайсадайнь хэнииньшье тэдэнэй урда тэсээгүй, бүхы дайсадые Эзэн тэдээнэй гарта үгөө.

⁴⁵ Израилиин гэртэ Эзэнэй хэлэһэн бүхы һайн үгэнүүдһээ нэгэшье үгэ дүүргэгдөөгүй үлөөгүй, хамаг юумэн хүсэлдөө.