Нүүнэй Иисүүс 2 - Библи

Рахааб ба тагнуулшад

¹ Нүүнэй хүбүүн Иисүүс Шиттиимһээ хоёр тагнуулшые нюусаар эльгээгээд: – Ошожо газараа, Ерихоониие харагты, – гэжэ захиба. Хоёр залуу хүбүүд Рахааб нэрэтэй залихай эмын гэртэ ерээд, тэндээ хонобо.

² Энэ һүни газар харахаа Израиль угсаатанһаа танигдаагүй хүнүүд ерээ гэжэ Ерихооной хаанда дуулгаба.

³ Ерихооной хаан Рахаабда хүниие эльгээжэ: «Шамда ерэһэн, шинии гэртэ ороһон зониие гаргажа үгэ, тэдэш бүхы газарымнай харахаа ерээ», – гэжэ хэлүүлбэ.

⁴ Тэрэ эхэнэр ерэһэн хоёр хүниие нюугаад: – Ямаршьеб зон намда ерээ һэн, зүгөөр хаанахи зон байһынь мэдэнэгүйб.

⁵ Харанхыда хашаагай үүдэ хааха сагай болоходо тэдэ гараад ошоо һэн, хайшаа ошоһынь мэдэнэгүйб, түргэн намнажа хүсэгты, – гэжэ хэлэбэ.

⁶ Өөрөө тэдээниие хушалта дээрэ гаргаад, тэндэ дэлгээһэн дурһанай боолтонууд соо нюуба.

⁷ Эльгээгдэһэн элшэд тэдээниие Иордан ошоһон харгыгаар гарса хүрэтэр мүрдэбэ. Намнагша нэхүүлэй гаран сасуу хашаагай үүдэ хааба.

⁸ Унтахаа хэбтэхынь урда эхэнэр тэдээндэ гэрэй орой дээрэ гараба.

⁹ Тэдээндэ иигэжэ хэлэбэ: – Эзэнэй энэ газарые танда үгэһые мэдэнэб. Тиигээд таанар маниие һүрдөөн айлгаат, энэ газарта һуудаг бүхы зон танһаа һүрдэн шэшэржэ байна.

¹⁰ Танай Египедһээ гаража ябахада, Эзэн танай урда Хулһата далайн уһа хатаагаа гэжэ дуулаа һэмди. Иорданай саанахи Эмоорой хоёр хаашуулые, Сиһоон Оог хоёрые яажа усадхаһытнайш дуулаа һэмди.

¹¹ Энээн тухай дуулахадаа, зүрхэмнай һулараа, танда эсэргүүсэхэ хэндэмнайш үгы болоо, юундэб гэхэдэ, Эзэн, танай Бурхан дээрэ тэнгэришье, доро газарташье захирна.

¹² Тиигээд Эзэнэй нэрээр намда тангариглагты: минии танда һайниие хэһэн ёһоор минии эсэгын гэртэ һайниие хэхээ хэлэгты. Намда найдамтай тэмдэг үгэгты,

¹³ минии эсэгэ эхые, аха дүүем, эгэшэ дүүем, тэдээнэйдэ байһан бүхы зониие амиды үлөөхэбди, манай һүнэһые үхэлһөө абархабди гэгты.

¹⁴ Тэдэ зон эхэнэртэ хэлэбэ: – Манай энэ хэрэг элирүүлээгүй һаатнай, манай һүнэһэн танай орондо үхэлөө олог; Эзэнэй манда газар үгэхэдэ, бидэ шамда һайниие хэхэбди, үнэниие нээхэбди.

¹⁵ Тиигээд эхэнэр сонхоороо мушхамалаар тэдэниие табяа, юундэб гэхэдэ, гэрынь хотын ханада баригдаһан тула тэдэ хана соо байгаа.

¹⁶ – Мүрдэгшэдөөр уулзахагүйн тула хада өөдэ ошогты, мүрдэгшэдэй бусатар тэндээ гурбан хоног хоргодохот, бусаһан хойнонь харгыдаа гарахат, – гэжэ хэлээ.

¹⁷ Тэдэ зон эхэнэртэ хэлэбэ: – Иимэ юумэ хээгүй һаашни, манай тангаригһаа бидэ сүлөөрхэбди:

¹⁸ энэ газарта манай ерэхэдэ, маниие табиһан сонходоо ши улайлгаһан мушхамал уяарай, тиигээд эсэгэ эхэеэ, аха дүүнэрээ, эсэгынгээ бүхы бүлые гэртээ суглуураарай.

¹⁹ Хэрбээ шинии гэрэй үүдээр хэн нэгэн газаашаа гараа һаань, шуһан тэрэнэй толгойдо тудаха, бидэ шинии жадха тангаригһаа сүлөөрхэбди, шинии гэртэ шамтай хүнэй байгаа һаа, тэрээндэ ондоо хүнэй гарай хүрөө һаа, тэрэнэй шуһан манай толгойдо тудаха;

²⁰ хэрбээ манай энэ хэрэг нээгээ һааш, тэрэ тангаригһаа баһал сүлөөрхэбди.

²¹ Эхэнэр: – Танай үгын ёһоор болог, – гээд, тэдээниие табиба. Тэдэнэй саашаа ошоходо, эхэнэр сонходоо улаан мушхамал уяба.

²² Тэдэ ошожо, хада дээрэ гараад, нэхүүлэй бусатар тэндээ гурбан үдэр байба. Нэхүүл тэдээниие бүхы харгыгаар бэдэрээд олоогүй.

²³ Тиигээд тэдэ хоёр хүнүүд гэдэргээ бусаад, хадаһаа буужа, Иорданиие гаталаад, Нүүнэй хүбүүн Иисүүстэ ерэжэ, бүхы ябадалаа хөөрэбэд.

²⁴ Тэдэ Иисүүстэ хэлэбэ: – Эзэн тэрэ бүхы газарые манай гарта үгөө, тэндэхи бүхы зон манһаа айжа һүрдэжэ байна.