Нүүнэй Иисүүс 17 - Библи

Мэнашшээгэй угсаатанай мэдэлэй газар

¹ Иосифой түрүүшын хүбүүн Мэнашшээгэй обогто жээрэбээр иимэ газарнууд тудаа. Дайнда зоригтой байһан Галаадай эсэгэ, Мэнашшээгэй ехэ хүбүүн Махиирта Галаад Башаан хоёр тудаа.

² Мэнашшээгэй бэшэшье хүбүүдтэ хубита хүртөө. Угсаагаарнь Абиээзэрэй хүбүүдтэ, Хээлэгэй хүбүүдтэ, Асриээлэй хүбүүдтэ, Шээхэмэй хүбүүдтэ, Хээпэрэй хүбүүдтэ, Шэмидаагай хүбүүдтэ хуби хүртөө.

³ Иосифой хүбүүн Мэнашшээгэй эрэ түрэһэн хүбүүн Махиирай, Махиирай хүбүүн Галаадай, Галаадай хүбүүн Хээпэрэй хүбүүн Цэлопэһаадта хүбүүд үгы, гансал басагадтай байгаа. Басагадайнь нэрэнүүд иимэ: Маһлаа, Ноһаа, Хоглаа, Милкаа ба Тирцаа.

⁴ Тэдэ шажанай албатан Эльазаарта, Нүүнэй хүбүүн Иисүүстэ, ударидагшадта ерээд хэлээ: – Аха дүүнэрэймнай хоорондо манда хубитые үгэхынь Эзэн Моисейдэ захираа. Эзэнэй зарлигаар тэдээндэ эсэгынь аха дүүнэрэй хоорондо хубита үгтөө.

⁵ Галаадай, Иорданай саана байһан Башаанай газарһаа ондоо арбан хэсэг Мэнашшээгэй хубида буугаа.

⁶ Тиигээд Мэнашшээгэй басагад хүбүүдэйнь дунда хубита абаа, Галаадай газар Мэнашшээгэй бэшэ хүбүүдтэ тудаа.

⁷ Мэнашшээгэй хилэ Ашээрһээ Шэхээмэй эсрэг байдаг Михмэтаат тээшэ ошоно; тэндэһээ хилэ баруулжаа Эн-Таппууһаагай зон тээшэ ошоно.

⁸ Таппууһаагай газар Мэнашшээдэ хүртөө, Мэнашшээгэй хилын хажуудахи Таппууһаа хото Эпрааимай хүбүүдтэ хүртөө.

⁹ Эндэһээ хилэ урда талаһаань Канаа урадхал тээшэ бууна. Эдэ хотонууд Мэнашшээгэй хотонуудай дунда байгаашье һаа, Эпрааимай мэдэлэй. Мэнашшээгэй хилэ урадхалай хойто талада, тэрэ далайгаар дууһана.

¹⁰ Урагшаа байһан юумэн Эпрааимай, хойшоо байһан юумэн Мэнашшээгэй; далай тэдээнэй хилэ байгаа. Ашээртэ тэдэ хойто талаһаань туладаг, Иссахаарта зүүн талаһаань туладаг.

¹¹ Иссахаарай ба Ашээрэй хажууда Бэт-Шэһаан ба тэрээнтэй холбоотой газарнууд, Иблэһаам ба тэрээнтэй холбоотой газарнууд, Доорой, Эн-Доорой зон ба тэдээнтэй холбоотой газарнууд, Таанаахай зон ба тэрээнтэй холбоотой газарнууд, Мэгиддооной зон ба тэрээнтэй холбоотой газарнууд, Наапет гурбадахи хуби Мэнашшээгэй мэдэлдэ үгтэнхэй.

¹² Мэнашшээгэй хүбүүд эдэ хотонуудые эзэлжэ шадаагүй, тиигээд ханаһаанууд энэ газарта үлөө.

¹³ Израилиин хүбүүд хүсэ ороходоо, ханаһаануудые ясаг түлөөшэд болгоо, зүгөөр үлдөөгүй.

Эпрааимай ба Мэнашшээгэй угсаатан үлүү ехэ газар эреэд абаагүй

¹⁴ Иосифой үри һадаһад Иисүүстэ иигэжэ хэлээ: – Юундэ ши минии хубида ганса хубита, ганса хэсэг газар үгөөбши, би олон зонтой ха юмбиб, Эзэн намайе элбэг дэлбэг юрөөгөө бэшэ гү?

¹⁵ Иисүүс тэдээндэ хэлэбэ: – Хэрбээ ши олон зонтой һаа, Эпрааимай хадын багадаа һаа, ой руу ошоод, тэндэ пэриззиинүүдэй ба рэпаиимүүдэй газарта ой сэбэрлэ.

¹⁶ Иосифой үри һадаһад хэлэбэ: – Манда хада үлэхэгүй, юундэб гэхэдэ, хүндын талада, Бэт-Шэһаанда, тэдээнтэй холбоотой газарта, Езрээлэй талада һуудагшье ханаһаанууд байлдаанай түмэр тэргэтэй.

¹⁷ Теэд Иисүүс Иосифой үри һадаһадта, Эпрааимда ба Мэнашшээдэ хэлээ: – Ши олон зонтойш, хүсэ ехэтэйш, гансал хубита газартай байхагүйш:

¹⁸ хадашье шинии болохо, энэ ойешье сэбэрлэхэш, тэрэ дууһатараа шинии байха; байлдаанай түмэр тэргэтэйшье, хүсэтэйшье һаань, ханаһаануудые ши үлдэхэш.