Нүүнэй Иисүүс 16 - Библи

Мэнашшээгэй ба Эпрааимай угсаатанай хүртэһэн газарнуудай урда хилэ

¹ Һүүлдэнь Иосифой хүбүүдтэ жээрэб буугаа: Ерихооной хажуудахи Иорданһаа, Ерихооной уһанай хажууда зүүн тээшэ, Ерихоонһээ Бэт-Ээлэй хада тээшэ нэмжыһэн элһэн губи;

² Бэт-Ээлһээ хилэ Лүүз тээшэ ошоно, тиигээд Атарофа хүрэтэр Архэйн хилэдэ ниилэнэ,

³ далай тээшэ Яплээдэй хилэдэ буужа, доодо Бэт-Һорооной хилэдэ ба Гээзэртэ хүрэнэ, далайн эрьедэ дууһана.

⁴ Энээниие Иосифой үри һадаһад болохо Мэнашшээ Эпрааим хоёр хубита болгожо абаа.

Эпрааимай угсаатанай мэдэлэй газарнууд

⁵ Эпрааимай хүбүүдэй газарые угсаануудаарнь хубаабал, иимэ байгаа: зүүн талаһаа тэдээнэй хубаариин хилэ Атароот-Аддаар дээдэ Бэт-Һороон хүрэтэр.

⁶ Тиигээд хилэ Михмэтаадай хойгуур далай тээшэ ошоно, Таанаат-Шилоогой зүүн тала тээшэ годирно, Яноохой зүүн талаһаа тэрээниие үнгэрнэ.

⁷ Яноохһоо Атароф ба Наараа тээшэ буугаад, Ерихоондо ниилэжэ, Иорданда хүрэнэ.

⁸ Таппууһааһаа хилэ далай тээшэ, Канаа урадхал тээшэ ошоод, далайгаар дууһана. Угсаагаарнь хубааһан Эпрааимай хүбүүдэй обогой хубита иимэ.

⁹ Мэнашшээгэй хүбүүдэй хубаари соо Эпрааимай хүбүүдтэ хотонууд таһалагдаа, бүхы хотонууд сэлеэнүүдтэеэ үгтөө.

¹⁰ Теэд эпрааимайхин Гээзэртэ байһан ханаһаануудые үлдөөгүй; тиимэһээ ханаһаанууд мүнөө хүрэтэр татабари түлөөд, эпрааимайхинай дунда һууна.