Нүүнэй Иисүүс 13 - Библи

Израильшуудай эзэлхэ ёһотой газарнууд

¹ Иисүүсэй хүгшэрөөд, үбгэ наһан болоходо Эзэн тэрээндэ хэлээ: – Ши үбгэрөөд, үндэр наһа хүсэбэш, угай болгожо абаха газар үшөө олон.

² Иимэ газарнууд үлөө: Пилиштын оршон тойронхи газарнууд ба Гэшүүрэй бүхы газар.

³ Египедэй урдахи Сихорһоо хойшоо Экрооной хилэ хүрэһэн газар Ханаһаанай гэжэ тоологдодог, тэндэ Пилиштын табан эзэд бии: Гаазай, Ашдоодой, Ашхэлооной, Гаадай, Экрооной. Урда зүгтэ аввиимуудай газар.

⁴ Урагшаа Ханаһаанай бүхы газар, Сидооной Мэарааһаа Апээк хүрэтэр, эмооршуудай хилэ хүрэтэр,

⁵ үшөө Гэбаалай газар ба наранһаа зүүн тээшэнхи Хэрмоон хадын хажуудахи Бааһал-Гаадһаа Лэбоо-Хамаатай аман хүрэтэр.

⁶ Ливаанһаа Мисрэпоот-Мааһим хүрэтэр хадада һуудаг зониие, бүхы Сидоонойхидые Израилиин хүбүүдэй хараһаар байтар Би үлдэхэб. Минии шамда захирһан ёһоор энэ газарые Израилиин хубита болгожо хубаа.

⁷ Энэ газарые юһэн обогой ба Мэнашшээгэй хубита болгожо хубаа.

Иорданай саанахи газар хубаалга

⁸ Рэүбээнэй ба Гаадай обогууд, Мэнашшээгэй обогой нүгөө хахад Эзэнэй богоол Моисейн үгэһэн ёһоор Иорданһаа зүүн тээшэ хубитаяа абаа.

⁹ Арноон урадхалай эрьедэ байдаг Ароһээрһээ эхилээд, урадхалай дунда байһан хотые, Дибоон хүрэтэрхи Мэдэбаагай үргэн талые абаа.

¹⁰ Хэшбоондо аммоонуудай хилэ хүрэтэр эзэрхэжэ байһан эмооршуудай хаан Сиһооной бүхы хотонуудые абаа.

¹¹ Үшөө Галаадые, Гэшүүрэй ба Маһахаагай можонуудые, бүхы Хэрмоон хадые ба Салэхаа хүрэтэр бүхы Башааниие абаа.

¹² Аштароодто ба Эдрейдэ түрэ барижа байһан Башаанай Оог хаанай гүрэниие абаа. Моисейн даража үлдэһэн рэпаиимүүдһээ тэрэ гансаараа үлэһэн байгаа.

¹³ Зүгөөр Израилиин хүбүүд Гэшүүрэй ба Маһахаагай зониие үлдөөгүй, Гэшүүр Маһахаа хоёр мүнөө хүрэтэр Израилиин дунда байна.

¹⁴ Гансал Левиин обогто хубитые үгөөгүй: Эзэнэй, Израилиин Бурханай үргэл тэрээнэй хубита болоно, тэрээндэ Эзэн тиижэ хэлээ.

Рэүбээн угсаатан Иорданай саана газар абаба

¹⁵ Рэүбээнэй обогой угсаатанда Моисей хубита газарынь хубаажа үгөө:

¹⁶ Арноон урадхалай эрье дээрэхи Ароһээр, урадхалай дундахи хото, Мэдэбаа шадарай бүхы тэгшэ тала,

¹⁷ Хэшбоон ба тэгшэ талын тэрээнэй бүхы хотонууд: Дибооншье, Бамоот-Бааһалшье, Бэт-Бааһал-Мэһооншье,

¹⁸ Яаһцаа, Кэдэмоот ба Мэпаат,

¹⁹ Кириатааим, Сибмаа ба Эмээг хада дээрэхи Цээрэт-Шааһар,

²⁰ Бэт-Пэһоор ба Пиисгаагай ула шадарай газар ба Бэт-Ешимоот.

²¹ Эдэнь тэгшэ талын бүхы хотонууд, Хэшбоондо захиржа байгаад, Моисейдэ алуулһан эмоорой хаан Сиһооной бүхы гүрэн, баһал алуулһан Мидианай ударидагшадай: Эвиин, Рээкэмэй, Цуурай, Хуурай, Рээбын, тэрэ газарта байһан Сиһооной тайжанарай газар тэдээнэй заха хилэ байгаа.

²² Баһал Израилиин хүбүүдэй һэлмээр алаһан мэдэлшэ Бэһоорой хүбүүн Балаһаамай газар хилэ байгаа.

²³ Иордан Рэүбээнэй хүбүүдэй газарай заха байгаа. Рэүбээнэй хүбүүдэй угай гэжэ үгтэһэн газарай, хото тосхонуудай хубаари иимэ.

Гаадай угсаатан Иорданай саана газар абаба

²⁴ Гаадай обогто, Гаадай хүбүүдтэ угсаагаарнь Моисей баһал хубаари үгөө:

²⁵ Язээр ба Галаадай бүхы хотонууд, Раббаае урдахи Ароһээр хүрэтэр Аммооной хүбүүдэй газарай хахад,

²⁶ Рамаат-Мицпээ ба Бэтониим хүрэтэр, Маханааимһаа Дэбиирэй хилэ хүрэтэр Хэшбооной газарнууд,

²⁷ Бэт-Һараам хүндыдэ ба Бэт-Нимраа ба Суккоот ба Цапоон, Хэшбооной хаан Сиһооной гүрэнэй үлэгдэл, Иорданһаа зүүн тээшээ Хиннээрэтэй далай хүрэтэр Иордан гол тэдээнэй заха хилэ болоно.

²⁸ Гаадай хүбүүдэй угай гэжэ үгтэһэн газарай, хото тосхонуудай хубаари иимэ.

Мэнашшээгэй угсаатанай хахад баһал Иорданай саана газар абаба

²⁹ Угсаатанаараа Мэнашшээгэй хүбүүдэй обогой хахад болодог Мэнашшээгэй обогой хахадта Моисей хубаари үгөө.

³⁰ Маханааимһаа эхилээд, бүхы Башаан, Башаанай хаан Оогой бүхы гүрэн, Башаанда байһан Яһиирай бүхы тосхонууд, жаран хотонууд тэдээнэй заха байгаа.

³¹ Галаадай хахад, Аштароот ба Эдрей, Башаанай Оог хаанай хотонууд Мэнашшээгэй хүбүүн Махиирай хүбүүдтэ, угсаагаараа Махиирай хүбүүдэй хахадта үгтөө.

³² Ерихоонһоо зүүн тээшэ Иорданай саана Моһаабай тэгшэ талада Моисей тэдээндэ иимэ хубаари үгөө.

³³ Зүгөөр Левиин обогто Моисей хубаари үгөөгүй: Эзэн, Израилиин Бурхан Өөрөө тэдээнэй хубита болоно, Өөрөө Тэрэ тэдээндэ тиижэ хэлээ.