Нүүнэй Иисүүс 11 - Библи

¹ Энээниие дуулаад, Хацоорой хаан Ябиин Мадооной хаан Ёваавта, Шимрооной хаанда, Ахшаапай хаанда,

² хойто зүгтэ хада дээрэ һуудаг хаануудта, Хиннээрэтэй үбэрэй талада ба доро газарта, баруун тээшээ Напоот-Доордо һуудаг хаашуулда,

³ зүүн тээшээ, далай тээшэ һуудаг ханаһаануудта, эмооршуудта, хээдүүдтэ, пэриззиинүүдтэ ба хадада һуудаг евүүсүүдтэ, Хэрмооной хажууда Мицпаагай газар дээрэ һуудаг хиивүүдтэ эльгээгээ.

⁴ Тэдэ булта хүдэлөө, зонойнь жагсаал тэдээндэ хамтараа. Далайн эрьеын элһэн шэнги олон зон суглараа; морид, хоёр сахаригта байлдаанай тэргэнүүд ехэ олон байгаа.

⁵ Эдэ бүхы хаашуул суглараад, Израильтай тэмсэхээ Мэроомой уһанай эрьедэ ерэжэ, майхан хүреэгөө дэлгээ.

⁶ Эзэн Иисүүстэ хэлээ: – Тэдээнһээ бү ай, үглөөдэр, энэ үе багта, тэдээниие Би Израилиин хүбүүдэй гарта сохихынь үгэхэб; моридойнь шүрбэһэ таһа отолоорой, байлдаанай хоёр сахаригта тэргэнүүдынь шатаагаарай.

⁷ Иисүүс ба тэрээнтэй хамта дайлалдаха шадалтай бүхы зон гэнтэ Мэроомой уһан тээшэ гараад, тэдээндэ добтолоо.

⁸ Эзэн тэдээниие Израильшуудай гарта үгөө; тэдээниие хюдан даран, агууехэ Сидоон, Мисрэпоот-Мааһим хүрэтэр, зүн тээшээ Мицпээгэй тала хүрэтэр мүрдэн намнажа, бултынь хюдаа, нэгэшье амиды хүниие үлөөгөөгүй.

⁹ Иисүүс тэдээниие Эзэнэй хэлэһэн ёһоор шиидхээ – моридойнь шүрбэһэ таһа отолоо, байлдаанай хоёр сахаригтануудынь шатаагаа.

¹⁰ Тэрэ үедэ һөөргөө бусаад, Иисүүс Хацоорые абаа, хаанииень һэлмээр алаа (урдань Хацоор эдэ бүхы хаан оронуудай ниислэл хотонь байгаа).

¹¹ Хотодо байһан бүхы зониие усадхажа, Хацоор хотые шатаагаа.

¹² Эдэ хаашуулые ба эдэ хотонуудые эзэлэн абаад, бүхы амитай юумые һэлмээр усадхаад, Эзэнэй богоол Моисейн хэлэһэн ёһоор хараал шэнгээгээ.

¹³ Үндэр газарта байһан бүхы хотонуудые израильшууд шатаагаа гэхэ хэрэггүй, гансал Хацоорые Иисүүс шатаагаа.

¹⁴ Эдэ хотонуудай бүхы олзо зөөри, малынь Израилиин хүбүүд өөһэдтөө хубаагаа; зонииень бултыень һэлмээр алаа, нэгэш амиды хүниие үлөөгөөгүй.

¹⁵ Эзэнэй Өөрынгөө богоол Моисейдэ захирһанай ёһоор Моисей Иисүүстэ захяа, Иисүүс хэлэһыень хуу дүүргээ: Эзэнэй Моисейдэ захирһанһаа нэгэш үгэ хазагайруулаагүй.

Иисүүсэй эзэлһэн газарнууд

¹⁶ Иигэжэ Иисүүс бүхы энэ хада дээрэхи газарые, Нээгэбэй бүхы газарые, Гоошэнэй бүхы газарые ба хотогор доро газарнуудые, Израилиин тэгшэ тала ба хадануудые, хотогор доро газарнуудые

¹⁷ Халак хадаһаа Сэһиир хүрэтэр, Хэрмооной хажуудахи Ливаанай талын Бааһал-Гаад хүрэтэр газарые эзэлэн абаад, тэдэнэй бүхы хаашуулынь барижа хюдаа, алаа.

¹⁸ Эдэ бүхы хаашуултай Иисүүс удаан дай хээ.

¹⁹ Гибэһоондо һуудаг хиивүүдһээ ондоо Израилиин хүбүүдтэй эб баталһан хото гэжэ байгаагүй: бултынь дайлан абаа.

²⁰ Юундэб гэхэдэ, тэдэ Эзэнһээ зүрхэеэ шэрүүдхээд, израильшуудые дайгаар угтаа. Эзэнэй Моисейдэ захиһан ёһоор, тэдэ хараалда хүртэхэ, үршөөл абахагүй, усадхагдаха хубитай байгаа.

²¹ Тэрэл үедэ Иисүүс хада дээрэ, Хэброондо, Дэбииртэ, Анаабта, Иудын бүхы хада дээрэ, Израилиин бүхы хада дээрэ анаакшуудые хюдаа; хотонуудтайнь хамта Иисүүс тэдээниие хараалда үгөө.

²² Израилиин хүбүүдэй газар дээрэ анаакшуудһаа нэгэш хүн үлөөгүй, гансал Гаазада, Гаадта ба Ашдоодто үлөө.

²³ Тиигэжэ Эзэнэй Моисейдэ хэлэһэн ёһоор Иисүүс бүхы газар абаа, тэрээнээ Иисүүс Израилиин зондо обогууд хоорондонь хубаажа үгөө. Газар дайда дайнһаа амараа.