Нүүнэй Иисүүс 10 - Библи

Табан Эмоорой хаашуулые бута сохилго

¹ Иерусалимай хаан Адони-Цээдэг Иисүүс Һай хотые абажа, хараалда хүртөөгөө, хаанииень баһал Ерихоониие ба тэрээнэй хааниие усадхагшадаал адли усадхаа, Гибэһооной зон Израильтай эб баталаад, тэдээнэй дунда үлөө гэжэ дуулахадаа,

² тэрэ ехээр айгаа. Юундэб гэхэдэ, Гибэһоон хаашуулай хотонуудай нэгэн болохо томо хото һэн, Һай хотоһоо ехэ хото һэн, зонииньшье зоригтой байгаа.

³ Тиимэһээ Иерусалимай хаан Адони-Цээдэг Хэброоной хаан Һоһаамда, Ярмуудай хаан Пираамда, Лахиишэй хаан Япииһада, Эглооной хаан Дэбииртэ элшэдые эльгээгээд,

⁴ намда ерэжэ, Иисүүстэй, Израилиин хүбүүдтэй эб баталһанайнь түлөө Гибэһоониие дарахадам туһалагты гэжэ хэлүүлээ.

⁵ Тэдэ суглараад, Эмоорой табан хаашуул: Иерусалимай хаан, Хэброоной хаан, Ярмуудай хаан, Лахиишэй хаан, Эглооной хаан, тэдээнэй бүхы жагсаалда гараһан зон дай хэхээ Гибэһооной хажууда майхан хүреэнүүдээ түхеэрээ.

⁶ Гибэһооной зон Израилиин байһан газарта, Гилгаалда Иисүүстэ эльгээжэ хэлүүлээ: – Богоолнуудһаа гараа бү аба, түргөөр манда ерэжэ абара. Туһа манда хүргэ, юуб гэхэдэ, хадада һуудаг эмооршуудай бүхы хаашуул манай урдаһаа ерээ.

⁷ Иисүүс Гилгаалһаа өөрөө ошоо, тэрээнтэй хамта дайлалдаха шадалтай бүхы зон, бүхы зоригтой эрэшүүл ошоо.

⁸ Эзэн Иисүүстэ хэлээ: – Тэдээниие Би шинии гарта үгөөб: хэнииньшье шинии урдаһаа тэсэхэгүй.

⁹ Иисүүс дайсадта гэнтэ ерээ, юундэб гэхэдэ, бүхэли һүни Гилгаалһаа ябаа.

¹⁰ Эзэн тэдээниие израильшуудһаа ехээр һүрдөөгөө, тиигээд Гибэһоондо тэдээниие израильшууд бута сохёо, Бэт-Һорооной үндэртэ ошоһон харгыгаар тэдээниие мүрдөө, Азэкаа ба Маккэдаа хүрэтэр тэдээниие дараа.

¹¹ Израильшуудһаа Бэт-Һорооной хадын ташалангаар зугадахадань, Эзэн тэнгэриһээ Азэкаа хүрэтэр томо шулуугаар шэдээ, тэдэ хосороо; шулуун аадарһаа хосороошодынь Израилиин хүбүүдэй мэсэһээ үхэгшэдһөө олон байгаа.

¹² Эзэнэй Эмоорые Израилиин гарта үгэһэн үдэр, Гибэһоондо тэдээниие Бурханай сохиһон үдэр, Израилиин хүбүүдэй хараһаар байтар тэдээнэй сохюулһан үдэр Иисүүс Эзэндэ уряалан хандаад, Израилиин зоной урда хэлээ: – Наран, Гибэһоон дээрэ тогто, һара Аялооной хүнды дээрэ тогто!

¹³ Тиигээд нараншье тогтоо, һарашье зоной дайсадһаа үһөөгөө абатар тогтоод байгаа. Иашарай номдо энээн тухай «наран тэнгэриин тэг дунда тогтоод, баруун тээшээ тонгойхоо бүхэли үдэр яараагүй»! – гэжэ бэшээтэй бэшэ гү?

¹⁴ Эзэнэй хүнэй үгэ иигэжэ дуулаһан үдэр урданшье, хожомыньшье байгаагүй. Юундэб гэхэдэ, Эзэн Израилиин түлөө тэмсээ.

¹⁵ Тиигээд Иисүүс, тэрээнтэй бүхы Израиль байһан газартаа, Гилгаалда бусаа.

¹⁶ Илагдаһан табан хаашуул зугадаад, Маккэдаагай агуйда хоргодоо.

¹⁷ «Тэрэ табан хаашуул олдоо, тэдэ Маккэдаагай агуйда хоргодожо байна» гэжэ Иисүүстэ дуулгахадань,

¹⁸ Иисүүс хэлээ: – Агуйн үүдэндэ томо шулуу унагаагаад, хажуудань харуул табигты;

¹⁹ таанар бү тогтогты, дайсадаа мүрдэгты, тэдэнэй сэрэгэй һүүл талые усадхагты, хотонууд руу бү табигты, юуб гэхэдэ, Эзэн, танай Бурхан тэдээниие танай гарта үгөө.

²⁰ Иисүүсэй ба Израилиин хүбүүдэй тэдээниие нилээн ехээр усадхан дарахада амиды үлөөшэдынь бэхижүүлэгдэһэн хотонууд руу зугадаа.

²¹ Бүхы зон Иисүүсэй байһан газарта Маккэдаа руу эб асаржа бусаба, Израилиин хүбүүд хуу толгой бүтэн байба.

²² Тиихэдэнь Иисүүс хэлээ: – Агуйн амһар онгойлгоод, тэрэ табан хаашуулые намда гаргажа асарагты.

²³ Хэлэһэн зарлигынь дүүргээ. Тэдэ табан хаашуулые – Иерусалимай хааниие, Хэброоной хааниие, Ярмуудай хааниие, Лахиишэй хааниие, Эглооной хааниие агуйһаа гаргаад, Иисүүстэ асараа.

²⁴ Тэдэ хаашуулые Иисүүстэ асархадань, Иисүүс бүхы Израилиин зониие дуудаад, тэрээнтэй ябаһан сэрэгэй ударидагшадта хэлээ: – Эдээнэй хажууда ошоод, хүлөөрөө эдэ хаашуулай хүзүү гэшхэгты. Тэдэ хаашуулай хажууда ошоод, хүлөөрөө хүзүүень гэшхээ.

²⁵ Иисүүс тэдээндэ хэлээ: – Бү айгты, бү һүрдэгты, хатуу ба зоригтой байгты; юундэб гэхэдэ, Эзэн танай дайлалдаха бүхы дайсадта тиижэл хандаха.

²⁶ Тиигээд Иисүүс тэдээниие хадхан алаад, табан модон дээрэ үлгөө; үдэшэ болотор тэдэ модондо үлгөөтэй байгаа.

²⁷ Наранай ороходо Иисүүсэй захиралтаар тэдээниие модонһоо абаад, хоргодоһон агуй руу хаяад, амһарынь томо шулуугаар хаагаа. Тэдэ шулуунууд мүнөөш хүрэтэр байдаг.

²⁸ Тэрэл үдэрөө Иисүүс Маккэдаае эзэлээд, тэрээниие, хаанииень һэлмээр дараа, тэндэ байһан бүхы амитай юумэндэ хараал хүртөөгөө: хэнииеш бүтэн орхёогүй, Ерихооной хааниие хэһээгшэдэл адляар Маккэдаагай хааниие хэһээгээ.

²⁹ Иисүүс, тэрээнтэй хамта Израилиин бүхы зон Маккэдааһаа Либнаада ошожо, Либнаагай урдаһаа дайлалдаа.

³⁰ Эзэн тэрээниие, тэрээнэй хааниие Израилиин гарта үгөө. Иисүүс тэрээниие, тэрээн соо байһан хамаг амитай юумэ юуш үлөөнгүй һэлмээр усадхаа, Ерихооной хааниие яагаа һэм, тэрээн шэнгеэр хаанииень һалгаа.

³¹ Либнааһаа Иисүүс, тэрээнтэй хамта бүхы Израилиинхин Лахииш тээшэ ошоод, хажуудань майхан хүреэгөө татаа, тэрээнэй урдаһаа дайлалдаа.

³² Эзэн Лахиишые Израилиин гарта үгөө. Үглөөдэрынь Иисүүс тэрээниие эзэлээд, һэлмээр усадхаа, бүхы амитай юумыень алажа, Либнаада адляар һалгаа.

³³ Тиихэдэй Гээзэрэй хаан Һораам Лахиишдэ туһалхаа ерээ; теэд Иисүүс тэрээниие, арад зонииень хэнииешье амиды үлөөнгүй һэлмээр усадхаа.

³⁴ Тиигээд Иисүүс ба тэрээнтэй Израилиинхин Лахиишһээ Эглоон тээшэ ошоод, хажуудань байрлаа, тэрээнэй урдаһаа дайлалдаа.

³⁵ Тэрэл үдэртөө эзэлэн абаад, тэрээниие, зосоонь байһан бүхы амитай юумые һэлмээр усадхаад, Лахиишдэл адляар хараалда хүртээгөө.

³⁶ Тиигээд Иисүүс ба тэрээнтэй бүхы Израильшууд Эглоонһоо Хэброон тээшэ ошожо, тэрээнэй урдаһаа дайлалдаа.

³⁷ Хэброониие эзэлээд, тэрээниие, хаанииень, бүхы хотонуудынь, тэндэ байһан бүхы амитай амитадые һэлмээр усадхаа, Эглооние һалгааһандал адляар һалгаагаа.

³⁸ Һүүлээрнь Иисүүс ба Израиль Дэбиир тээшэ хандажа, тэрээнэй урдаһаа дайлалдаа.

³⁹ Тэрээниие, хаанииень, бүхы хотонуудынь эзэлээд, һэлмээр усадхаа. Дэбииртэ байһан бүхы амиды юумэндэ хэнэйш үлэхэгүйгөөр хараал хүртөөгөө. Дэбиирые, тэрээнэй хааниие, Либные ба тэрээнэй хааниие, Хэброониие ба тэрээнэй хааниие һалгаһандал адляар һалгаа.

⁴⁰ Иисүүс бүхы хадын газарые, Нээгэб ба доро газарнуудые, хадын бооридо байһан газар нютагуудые, тэдээнэй хаашуулые усадхаад, хэнииешье амиды үлөөгөөгүй, бүхы амитай амитадые Эзэнэй, Израилиин Бурханай захиһан ёһоор хараалда хүртөөгөө.

⁴¹ Кадээш-Барнээһээ ба Гааза хүрэтэр, Гоошэнэй бүхы газарые Гибэһоон хүрэтэр Иисүүс усадхан һалгаа.

⁴² Эдэ газарнуудай бүхы хаашуулые, тэдээнэй газарые Иисүүс нэгэл ябадалаар эзэлэн усадхаа; юундэб гэхэдэ, Эзэн, Израилиин Бурхан Израилиин түлөө тэмсээ.

⁴³ Тиигээд Иисүүс ба тэрээнтэй бүхы Израилиин зон байдаг газартаа, Гилгаалда бусаа.