Нүүнэй Иисүүс 1 - Библи

Эзэн заяата газараа эзэлэ гэжэ Иисүүстэ зарлиг буулгаба

¹ Эзэнэй богоол Моисейн наһа бараһан хойно Эзэн Нүүнэй хүбүүн, Моисейн албатан Иисүүстэ хэлэбэ:

² – Минии богоол Моисей үхэбэ; ши бодоод, энэ Иорданиие гатала, ши, энэ бүхы улад Израилиин хүбүүдтэ Минии үгэһэн газарта ошогты.

³ Танай үльмын гэшхэһэн бүхы газарые Моисейдэ хэлэһэн ёһоороо Би танда үгэнэб.

⁴ Элһэн губиһаа энэ Ливаан хүрэтэр, агууехэ Евфрат мүрэн хүрэтэр хээдүүдэй бүхы газар, наранһаа баруун тээшэнхи агууехэ далай хүрэтэр зай танай мэдэлэй болохо.

⁵ Шинии бүхы наһан соо хэншье шамтай тэнсэхэгүй; Моисейн хажууда байһандал адли Би хажуудаш байхаб: шамһаа холодохогүйб, шамайе орхихогүйб.

⁶ Хатуу, зоригтой байгаарай; юундэб гэхэдэ, эсэгэнэртэнь үгэхэб гэжэ тангариглаһан газарым ши тэдээндэ эдлэхынь үгэхэш.

⁷ Гансал хатуу ба тон зоригтой байгаарай, Моисейн шамда захиһан бүхы хуулиие сахижа, дүүргэжэ ябаарай, Богоолни. Тэрээнһээ хайшаашье бү хазагайраарай, тиибэл лэ бүхы хэрэгээ бодолтойгоор хэхэш.

⁸ Энэ хуулиин ном шамһаа бү холодог; энэ номдо бэшэгдэһэн бүхы юумэ зүб бэелүүлхын тула үдэр һүнигүй тэрээнһээ һуража байгаарай: тиибэлшнил бүхы харгыш амжалтатай байха, бодол хэрэгшни зүб байха.

⁹ Би шамда зарлиг буулганаб: хатуу ба зоригтой байгаарай, бү ай, бү һүрдэн бахарда. Хаанаш ошоо һааш, Эзэн, шинии Бурхан хажуудаш байха.

¹⁰ Тиигээд лэ Иисүүс зоной ахамадуудта зарлиг буулгажа хэлэбэ:

¹¹ – Зоной байһан газараар ябажа, зондо зарлиг хэлэгты: харгыдаа хүнэһэ бэлдэгты гэгты, юундэб гэхэдэ, гурба хоноод, танай эсэгэнэрэй Бурхан, Эзэн танда энжэ болгожо үгэһэн газар абахаа энэ Иорданай саана ошохот гэгты.

¹² Рэүбээнэй, Гаадай обогуудта, Мэнашшээгэй хахад обогто Иисүүс хэлээ:

¹³ – Эзэнэй богоол Моисейн танда юу захиһые һанагты: «Эзэн, танай Бурхан танай һанаа амаруулжа, энэ газарые танда үгөө».

¹⁴ Таанарай һамгад, таанарай хүүгэд, таанарай мал Иорданай саана Моисейн үгэһэн газарта үлэхэ; таанар булта, тэмсэхэ шадалтай зон, зэбсэг баряад, аха дүүнэрэйнгөө урда ябажа, тэдээндэ туһалагты.

¹⁵ Эзэнэй, танай Бурханай тэдээндэ энжэ болгожо үгэһэн газар абатарынь туһалагты; тииһэн хойноо энжэ газартаа бусажа, наранһаа зүүлжээ Иорданай саана Эзэнэй богоол Моисейн үгэһэн газар эдлэжэ һуугаарайгты.

¹⁶ Тэдэ харюудань Иисүүстэ иигэжэ хэлэбэ: – Шинии захиржа хэлэһэн бүхы юумэ хэхэбди, хаанаш эльгээгээ һааш, ошохобди.

¹⁷ Моисейн үгэ дууладагтаал адли шинии үгэ дуулахабди. Гансал Эзэн, шинии Бурхан, Моисейтэй ябаһандаал адли шамтай ябуужа.

¹⁸ Шинии зарлигта эсэргүүсэһэн хүн, шинии үгэ дуулаагүй хүн үхэл амасаха. Гансал хатуу ба зоригтой байгаарай.