Нэхэмьяа 6 - Библи

Нэхэмьяагай эсрэг зохёогдоһон хэлсээн

¹ Санбаллаат, Тобияа, арааб Гээшэм ба манай бусадшье дайсад үүдэнүүдэйнь, хаабаринуудайнь үшөө үлгэгдөөгүй байхада, намайе ханануудые бодхообо, нүхэнүүдые бүтүүлбэ гэжэ дуулаба,

² Санбаллаат, Гээшэм гэгшэд намда иимэ удхатай захяа эльгээбэ: – Оноо нугада Хахапириимдэ уулзая. Тэдэнэр минии урдаһаа муу хэрэг хараалба.

³ Би тэдэнэртэ захяа хүргэгшөөр иимэ мэдээ дамжуулбаб: – Би нэгэ ехэ ажал хэжэ байнаб, танда хүрэжэ ошохо тухагүйб. Би бултыень орхёод, ажалаа хаяжа, танда ошохо юм гүб?

⁴ Эдэнэр намайе дүрбэ дахин уриба, би урилга бүхэндэнь тэдэнэртэ тиимээр харюу эльгээбэб.

⁵ Санбаллаат өөрынгөө зарасые табадахияа намда эльгээбэ. Тэрэ задархай бэшэг асарба,

⁶ тэрээн соонь иигэжэ бэшээтэй байба: – Зоной дунда, мүн Гээшэм соо иимэ һураг суу гарана, ши иудейнүүдтэй суг буһалгаа үүсхэхэ зорилготойш, ушар иимэһээ ханануудые һэльбэн бодхоонош. Ши тэдэнэрэй хаан болохо юм хаш гээд хэлсэнэ.

⁷ Иерусалимда шам тухай иигэжэ соносхожо байгаа лүндэншэдые ши томилнош: «Иудын орон нютагта хаан бии болобо!» Энээн тухай булта хаанда дуулгагдаха. Ерыш, зүбшэжэ үзэел.

⁸ Би иимэ харюу эльгээбэб: «Шинии хэлээшэш худал, юуншье байгаагүй. Ши бултыень һанаанһаа зохёогоош!»

⁹ Эдэ хүнүүд маанадые айлгаха гээд һэдэбэ, маанадые өөһэдынгөө ажал дүүргэнгүй орхихо гээд найдаһан байба. Харин би энэ хэрэгээ бүри эршэмтэйгээр эрхилбэб!

¹⁰ Би Мэһэтэбээлэй аша, Дэлайяагай хүбүүн Шэмаяада ерэхэдэмни, тэрэ гэртээ байба. Гэртэнь ороходомни, Шэмаяа үүдээ шэбхэдээд, намда иигэжэ хэлэбэ: – Бурханай гэр соо уулзая. Һүмэ соо ороод, үүдэнүүдыень шэбхэдэебди. Шамайе алахаяа ерэхэ, һүниндөө ерэжэ шамайе алаха!

¹¹ Би иигэжэ хэлэбэб: – Нам шэнги хүн зугадаха болоно гү? Би өөрынгөө ами наһа абархын тула Һүмэ соо хорохо болоно гүб? Орохогүйб.

¹² Энээниие Бурхан эльгээгээгүй гэжэ би ойлгобоб. Тобияа, Санбаллаат гэгшэд тэрэниие хүлһэлжэ, тэрэ нам тушаа лүндэн табижа байна ха.

¹³ Тэдэ намайе айһандаа нүгэл хэжэ болохо гэжэ найдаад, тэрээндэ мүнгэ түлөө байна, нүгэл хэһэнэйм удаа тэдэ нам тухай элдэб худал үгэ тараажа, муушалха байгаа.

¹⁴ Тобияа, Санбаллаат гэгшэдэй мүн намайе айлгахаар шиидэһэн Ноһаадьяа эхэнэрэй, бусадшье лүндэншэдэй эдэ бүхы ябадалнуудые, минии Бурхан, хадуун абыт!

Барилгын түгэсхэл

¹⁵ Табин хоёр үдэрэй туршада энэ хүдэлмэри эрхимээр ябуулагдажа, элүүл һарын хорин табанай үдэр хотын хананууд һэргээгдэбэ.

¹⁶ Энээн тухай манда дурагүйшүүл бултыень мэдэбэ, мүн энэниие дүтэ шадарай хүн зон хараад, дээрэлхүү зангынь номгорбо; энэ хэрэг манай Бурханай үршөөлөөр бүтэбэ гээд тэдэнэр мэдэрбэд.

¹⁷ Эдэ үдэрнүүдтэ Иудын орон нютагай ноёд һайд Тобияада саг үргэлжэ бэшэгүүдые эльгээдэг, Тобияаһаа харюунууд ерэдэг байгаа.

¹⁸ Иудын орон нютагта олонхинь тэрээнтэй тангариг холбоо барисаатай байгаа, юуб гэхэдэ, тэрэ Араахай хүбүүн Шэханьяагай хүрьгэн һэн, харин тэрэнэй хүбүүн Ёханаан Бэрэхияагай хүбүүн Мэшуллаамай басагаар һамга хэһэн юм.

¹⁹ Тэдэнэр бултадаа намда Тобияае магтадаг, минии үгэнүүдые тэрээндэ дуулгадаг байгаа. Намайе айлгаха бэшэгүүдые Тобияа эльгээдэг һэн.