Нэхэмьяа 4 - Библи

Дайсадай заналта хэжэ байбашье, барилга үргэлжэлнэ

¹ Бидэниие хана барина гэжэ Санбаллаат мэдэхэдээ, сухалаар бусалан уурлаба. Иудейнүүдые наада барин,

² тэрэ өөрынгөө түрэлнүүдтэ, Самариин сэрэгшэдтэ иигэжэ хэлэбэ: – Эдэ баарһад иудейнүүд тэндэ юу хэхэ болоноб? Хотые һэргээжэ, эдэнэр үргэл үргэхэ гэжэ гү? Шандаруу болоһон энэ богһоо шэнээр бодхооһон шулуун ханануудынь нэгэ доро дүүрэшэхэл.

³ Тэрэнэй хажууда Аммоон нютагай Тобияа байба. Тэрэ иигэжэ хэлэбэ: – Харин иигэн бодхообошье гэлэй! Үнэгэнэй һүрэшэхэдэ, тэдэнэй бүхы ханануудынь бутаран унашахал!

⁴ – Манай Бурхан, шагныт! Тэдэнэр маниие газаашалжа байнал. Эдэнэй шоодбори өөһэдынь толгой дээрэ буулгыт: тэдэнэр богоолшолуулан, хариин газарта шоодборилуулаг лэ.

⁵ Маанадые, барилгашадые, доромжолһон тэдэнэй энэ нүгэл Танда бү мартагдаг лэ, тэдэнэрэй энэ гэм зэмынь бү сагаараг лэ.

⁶ Хүн зоной бүхы эрмэлзэл ажалдаа хандуулагданхай. Тиимэһээ маанадай барижа байгаа хана үндэрөөрөө хахадтаа хүрэбэ.

⁷ Иерусалимай ханануудай һэргээн бодхоогдохые Санбаллаат, Тобияа гэгшэдһээ гадна араабууд, аммоонууд, Ашдоодой ажаһуугшад мэдэжэ, ханын нүхэнүүдэй бүтүүлэгдэжэ эхилхэдэ, аргагүй ехээр сухалдабад.

⁸ Манай оролдолгые һалгаахын тула тэдэнэр Иерусалим руу дайгаар орожо, хотые һандаргахаяа хэлсэбэд.

⁹ Бидэнэр өөрынгөө Бурханда мүргэжэ, тэдэниие хүлеэн, үдэр һүнигүй харуул табибабди.

¹⁰ Иудейнүүд иигэжэ хэлэбэ: – Эндэ бутархай шулуунай аргагүй ехэ һэн тула ашаа зөөгшэд ажалдаа диилдэнэ. Бидэ энэ хана һэргээн бодхоожо шадахагүйбди.

¹¹ Харин манай дайсад иигэжэ хэлэбэд: – Бидэ гэнтэ добтолжо, тэдэниие бута сохиходомнай, тэдэнэр юушье хэжэ шадангүй, юушье ойлгонгүй үлэшэхэ, тиигээд ажалыень зогсоон һаатуулхабди.

¹² Тэдэнэртэй хүршэ ажаһуугша иудейнүүд зүг бүхэнһөө манда ерэжэ, дайсанай маанад руу добтолхоёо байһан тухай һэргылжэ байгаа.

¹³ Эли газарта, ханын саада талада, доодо талада би бүлэ бүлөөрнь илган, һэлмэ жадатай, һурша номтой хүнүүдые табибаб.

¹⁴ Би бултыень хараһанай һүүлээр ноёд һайдта, дарганарта, бусад зондо иигэжэ хэлэбэб: – Бү һүрдэн айгты! Агууехэ, аймшагтай Эзэнээ һанан дурдагты, мүн тиигээд, өөһэдынгөө гэрнүүдэй, өөһэдынгөө һамгадай, өөһэдынгөө хүбүүд, басагадай, өөһэдынгөө аха дүүнэрэй түлөө тэмсэн бодогты!

¹⁵ Эдэ бүгэдэ манда мэдээжэ гээд манай дайсад мэдэбэд, тиигээд Бурхан тэдэнэй һаналые буруу һүргэбэ. Тиихэдэнь бидэ ханадаа ерээд, өөһэдынгөө ажал үргэлжэлүүлбэбди.

¹⁶ Энэ үдэрһөө эхилжэ, минии зоной хахадынь ажал хэбэ, харин нүгөөдэ хахадынь жадануудаа, халхабшануудаа, һурша номуудаа баряад, дуулгануудаа үмдөөд, иудынхидые хамгаалан, харуулда зогсобо. Сэрэгшэд

¹⁷ хана һэргээн бодхоогшодой хажууда байгаа. Ашаа зөөгшэд нэгэ гартаа ашаа, харин нүгөөдэ гартаа зэбсэг бариха баатай болобо.

¹⁸ Барилгашан бүхэн һэлмэ зүүгээд хүдэлбэ. Минии дэргэдэ бүреэгээр дохёо үгэгшэ байгаа.

¹⁹ Би ноёд һайдуудта, дарганарта, мүн бусад зондо иигэжэ хэлэбэб: – Аргагүй ехэ ажал ябуулагдана. Бидэ энэ ханаяа зубшан, бэе бэеһээ таруу байнабди.

²⁰ Таанад эбэр бүреэгэй абяа хаанашье дуулахадаа, тэрэ абяан руу гүйжэ, манда суглархат. Манай Бурхан манай түлөө тэмсэлдэ зогсохо!

²¹ Бидэ хүдэлмэреэ ябуулаабди, харин зоной хахадынь жадануудаа барин, үүр сайхаһаа эхилээд, одо мүшэдэй гаратар харуулда зогсоо.

²² Тэрэ үдэрнүүдтэ би хүн зондо хандан, иигэжэ хэлэбэб: – Хүн бүхэн ажалшадтаяа хамта Иерусалимда һүниин туршада үлэг. Тиигэбэл, һүниндөө бидэ харуулда байхабди, үдэртөө ажалаа ябуулхабди.

²³ Би өөрөөшье, минии аха дүүнэр, зарасанар, минии харуулшад бултадаа хубсаһатаяа унтажа, хүн бүхэмнай баруун гартаа зэбсэгээ адхаад байгаа.