Нэхэмьяа 10 - Библи

¹ Өөһэдынгөө тамгануудые табиба гэбэл: Хахальяагай хүбүүн, засаг баригша Нэхэмьяа, харин тиигээд Цэдэкиия,

² Сэраяа, Азаарияа, Ерэмияа,

³ Пашхуур, Амарияа, Малхияа,

⁴ Хаттууш, Шэбааньяа, Маллуух,

⁵ Хариим, Мэрэмоот, Обадияа,

⁶ Даниил, Гиннэтоон, Баруух,

⁷ Мэшуллаам, Абияа, Миямиин,

⁸ Маһаазияа, Билгай, Шэмаяа. Эдэнэр тайлгашад.

⁹ Левидүүд: Азаанияагай хүбүүн Иисүүс, Хэнадаад угай Биннуй ба Кадмиһээл.

¹⁰ Харин тэдэнэй түрэлнүүд: Шэбааньяа, Һодьяа, Кэлитаа, Пэлаяа, Ханаһаан,

¹¹ Михаа, Рэһооб, Хашаабияа,

¹² Заххуур, Шэрээбияа, Шэбааньяа,

¹³ Һодьяа, Бании, Бэниину.

¹⁴ Ноёд һайд: Пароош, Паһаат-Моһаабай, Элаам, Заттуу, Бании,

¹⁵ Бүннии, Азгаад, Бэбэй,

¹⁶ Адонияа, Бигбай, Адиин,

¹⁷ Этээр, Хэзэкияа, Аззуур,

¹⁸ Һодьяа, Хашуум, Бэцай,

¹⁹ Хариип, Анатоот, Нэбай,

²⁰ Магпиһааш, Мэшуллаам, Хэзиир,

²¹ Мэшэзабээл, Цадоок, Яддууһа,

²² Пэлаатияа, Ханаһаан, Анаяа,

²³ Һошээ, Ханаанияа, Хашшууб,

²⁴ Һаллоһээш, Пилхаа, Шобээг,

²⁵ Рэхүүм, Хашабнаа, Маашэяа,

²⁶ Ахияа, Ханаһаан, Анаан,

²⁷ Маллуух, Хариим, Баһанаа.

²⁸ Үлөөшэ хүнүүд – санаартад, левидүүд, үүдэнэй харуулшад, дуушад, һүмын албатан – ондоо яһатанһаа таһараад, Бурханай Хуули сахижа эхилһэн хүнүүд, тэдэнэй һамгад, хүбүүд, басагад, юрэдөө, ойлгохо шадалтайшуул бултадаа

²⁹ өөһэдынгөө мэдээжэ угсаатантай хамтаржа, Бурханай зарамал Моисейгээр дамжуулагдаһан Бурханай Хуули баримталан ажаһууха, Эзэн Бурханаймнай бүхы захяа заабаринуудые наринаар сахин бэелүүлхэ, Тэрэнэй тогтоолнуудыень, хуулинуудыень дүүргэхэ тангариг үргэбэд.

Нэмэлтэ үүргэ уялганууд

³⁰ Бидэ өөһэдынгөө басагадые ондоо арадай хүнүүдтэ хадамда үгэхэгүйбди, мүн өөһэдынгөө хүбүүдтэ тэдэнэй басагадаар һамга абхуулхагүйбди.

³¹ Субботын үдэр ондоо арадуудай наймаанда асарһан эд бараа, орооһо таряаень энэ үдэр, мүн ондоо нангин үдэрнүүдэй үедэ бидэ худалдажа абахагүйбди. Долоон жэлэй һүүлээр газар эдлүүрилхэ ёһогүйбди, хүнэй али бүхы үринүүдыень хүлисэн орхихо ёһотойбди.

³² Манай Бурханай Һүмэдэ мүргэл бэелүүлгэдэ жэлэй туршада шээкэлэй гурбанай нэгэ хубиие үгэхэбди гэжэ уялга абанабди:

³³ Эзэнэй урда табидаг хилээмэндэ, үдэр бүриин хилээмэнэй үргэлдэ, үдэр бүриин түгэс шатаалта үргэлдэ, субботодо үргэдэг түгэс шатаалта үргэлдэ, һарын шэнын үргэлдэ, Эзэнэй тодорхойлһон һайндэрнүүдтэ, нангин үргэлнүүдтэ, Израилиин нүгэл сагааруулгын үргэлнүүдтэ, манай Бурханай гэрэй бүхы ажалда хэрэгтэйень үгэхэ ёһотойбди.

³⁴ Хуули соо бэшэгдэһэнэй ёһоор, Эзэн Бурханайнгаа үргэлэй шэрээдэ шатааха түлеэ жэл бүри ямар угуудай түлөөлэгшэд заагдаһан болзортонь Бурханай гэртэ асарха тухай бидэ – санаартад, левидүүд ба арад зоной түлөөлэгшэд жээрэб татабабди.

³⁵ Жэлһээ жэлдэ бидэ Эзэнэй Һүмэдэ ургасынгаа дээжэ, жэмэстэ алишье мододой түрүүшын алим жэмэсые асардаг байхабди.

³⁶ Һургаал соо бэшэгдэһэнэй ёһоор, манай Эзэн Бурханай Һүмэдэ санаартадта, бидэ өөһэдынгөө ууган хүбүүдые, мүн тиихэдэ хони, үнеэнүүдэйнгөө түрүүшын түл асардаг байхабди.

³⁷ Манай Бурханай гэрэй хадагаламжада, санаартадта, хилээмэнэй, алим жэмэсүүдэй, үзэмэй дараһан архиин, ургамалай тоһоной дээжэнүүдые бидэ үргэжэ байхабди, харин ургасын арбанай нэгэ хубиие – левидүүдтэ (тэдэ левидүүд газар элдүүрилдэг манай бүхы хотонууд бүриһөө арбанайнь нэгые суглуулна).

³⁸ Арбанай нэгэ хуби суглуулдаг левидүүдтэй хамта Аһарооной үри санаартан байха ёһотой, левидүүд манай Бурханай гэр руу, хадагаламжын таһалганууд руу, бүхыдөө суглуулһанай арбанайнь нэгэ хубиие оруулха.

³⁹ Израильшууд ба левидүүд өөһэдынгөө үргэлнүүдые – орооһо, үзэмэй дараһан архи, тоһо гэхэ мэтэеэ эдэ таһалгануудта асарха. Тэндэ нангин газарай хэрэгсэлнүүд, Һүмэдэ элдэб ёһо бэелүүлдэг санаартадай, үүдэнэй харуулшадай, дуушадай хэрэгсэлнүүд байха. Бидэ өөһэдынгөө Бурханай гэрые хайша хэрэгээр байлгаха ёһогүйбди.