Наум 3 - Библи

Нинэвээдэ эсэргүү шиидхэбэри

¹ Худал болон дээрмэшэлгээр дүүрэнхэй шуһата хотодо гай тодхор буугаа! Дээрмэшэлгэ тэндэһээ һаланагүй.

² Ташуурай дуун, мөөр сахаригуудай эрьелдэхэ абяан, моридой соёроон, дайшалхы тэргэнүүдэй түргэн дабшаха абяан дуулдана.

³ Моритой зон шуумайжа, һэлмэнүүд ялалзажа, жаданууд туяарна. Үхэгшэд олон, обоо хүбөө хүүрнүүд. Тоо томшогүй олон хүүрнүүдтэ сэрэг бүдэржэ байна.

⁴ Эдэ бүгэдэ Нинэвээ хотын янхан забхай ябадалһаа, эльбэ жэльбэ хэрэглэн, арадуудые урьха зангадаа оруулжа байһанһаань болоо.

⁵ – Үзөөрэй даа, Би шамайе хэһээхэб! – гэжэ Түмэн Сэрэгтэ Эзэн айладхана. Хормойеш нюур хүрэтэршни шуужа, арадуудта шинии нюсэгэн бэе, хаан түрэнүүдтэ эшхэбтэр юумыеш харуулхаб!

⁶ Би шам руу бузар муухай юумэ шэдэн эльгэжэ, олоной шоодбори болгохоб, жэгшүүритэй эшхэбтэр байдалда шамайе оруулхаб.

⁷ Шамайе харамсаараа хүн бүхэн шамһаа холодон гүйжэ, «Нинэвээ дээрмэдэ орожо хооһороо! Хэн тэрээн тушаа гашуудан байхаб? Хэн тэрэниие аргадан тайшаруулхаб?» гэхэ.

Нинэвээ хотын эсэс

⁸ Нинэвээ, Нил мүрэнөөр хамгаалалта хээд байгаа Но-Аммоон хотоһоо хамгаалалтам дээрэ гэжэ тоолоно гүш?

⁹ Заха хизааргүй хүсэ шадалтай Эфиопи болон Египедые тэрэ хото зонхилон байгаа, Пүүт болон Ливи тэрэнэй туһамаршад бэлэйл.

¹⁰ Теэд тэрэшье сүлэлгэ руу туугдан ошоо, баряанда ябаа. Нарай нялхануудыньшье гудамжануудай уулзуур дээрэ тэһэ биса сохюулжа алуулаа, хаанай уг удам зониинь үнэ сэн хаюулан, худалдагдаа, бүхы түшэмэлнүүдынь гэнжэлэгдээ.

¹¹ Нинэвээ, ши тон лэ тиимээр шал һогтожо, дайсанһаа яажа хоргодохоёо бэдэрхэш.

¹² Эдеэшэһэн жэмэстэй инжир модондол адли бүхэлэлтэнүүдшни! Халта һэгсэрхэдэ, тэдэ залгихаар бэлэн хүнэй аман руу сэхэ унахал!

¹³ Үзөөрэй, сэрэгшэдшни һамгадтал адли, газар дайдыншни хаалганууд дайсанай урда үргэнөөр сэлигдэхэ, шэбхэнүүдшни гал дүлэндэ шатан һалаха.

¹⁴ Бүһэлэлтэдэ орохоёо мэдэжэ, уһа удхан бэлдэ! Бүхэлэлтэеэ бэхижүүлэ! Шабарта ябажа, шабар зууража, хирпиисэ шатаан бүтээхэ зуухануудаа заһабарила!

¹⁵ Теэд энэ ямаршье туһагүй, юуб гэхэдэ, тэндэ ши гал дүлэндэ шатахаш, һэлмэдэ сабшагдахаш, бүхы ургаса таршаа шумуулда дууһан эдигдэдэгтэл, ши оро һэегүй үгы болохош.

¹⁶ Огторгойн ододһоо олон наймаашадтай болоош. Теэд тэдэ даляа дэбин бэлдээд ниидэжэ арилдаг таршаа шумуулнуудтал үгы болохо.

¹⁷ Хаанта бүлын гэшүүдшни болон түшэмэлнүүдшни хүйтэн үдэр ханын забһараар шэбээлдэг таршаа шумуул мэтэ. Харин наранай гарахада, тэдэ ниидэн үгы боложо, хайшаашье ошоһыень мэдэхын арагагүй.

¹⁸ Ассириин хаан! Түшэмэл, удамаршадшни мүнхэ нойроор нойрсонхой. Арад түмэншни хада уулаар таранхай, тэдэниие суглуулха хүн байхагүй.

¹⁹ Шархыеш эдэгээхэ эм дом байхагүй, яра шархаш угаа үбшэнтэй. Шамтай ушарһан гай гасалан тушаа дуулаһан лэ хүн бүхэн баясажа, альгаа ташаха! Юуб гэхэдэ, шинии муу муухай хэрэгүүд бүхы зониие дайраа!