Наум 2 - Библи

Нинэвээ хотын хосоролой үзэгдэл

¹ Тараан бутаргадаг нэгэн шамда добтолхоор ерэжэ байна. Цайзаа хамгаала! Харгы замые хаража бай! Шандааһаяа шангала, хүсэ шадалаа нөөсэлэ!

² Яков болон Израиль дайсадтаа хухалуулһан үзэмэй модоной модондол адли. Харин Эзэн тэдэнэй алдар солые бусааха.

³ Дайсанай баатар сэрэг улаан бамбайтай, шад улаан хубсаһатай. Байлдаанда бэлдэхэ үдэр дайшалхы тэргэнүүдэй түмэр гал дүлэн мэтэ ялалзана, жаданууд ой модондол найгалзана.

⁴ Дайшалхы тэргэнүүдынь үйлсэнүүдээр галзууржа урилдан, талмайнуудаар зэрлиг мэтэ соёрно. Тэдэ гал дүлэн, сахилгаан мэтэ ялаганана.

⁵ Шилдэг сэрэгшэдынь бүдэрэн яаража захиралтаар гүйлдэнэ, хотын хэрэм хана руу шуумайжа, хамгаалалта бэлдэнэ.

⁶ Голой хаалганууд нээгдэжэ, ордон үгы болоно.

⁷ Бүхы юумэн шиидэгдээ. Хатан нюсэгэлэгдэжэ, сүлэлгэдэ туугдаха, шэбэгшэнэрынь гашуудан сээжээ сохихо, тагтаагай дуугардагтал ёололдохо.

⁸ Нинэвээ байгуулагдаһан сагһаа хойшо уһа табидаг сөөрэмдэл адли бэлэй. Улад зон гүйн гаражал байна. «Зогсогты! Зогсогты!» – гэхэдэ, хэншье һөөргөө эрьенэгүй.

⁹ Мүнгэ алта дээрмэшэлэгты! Элдэб үнэтэ хэрэгсэлнүүдэй нөөсэ дууһашагүй.

¹⁰ Теэд Нинэвээ дууһан дээрмэшэлэгдээ, хооһороо, сүйдхэгдээ. Айн һүрдэһэндөө зонойнь зүрхэн хайлажа, үбдэгүүд шэшэржэ, хүсэ шадалынь бууража, нюур шарайнь сухиигаа.

¹¹ Энэ хототой юун тохёолдооб? Арсалангуудай нүхэнтэй жэшэбэл, залуу арсалангууд тэрэ газараар сүлөө сэнгэжэ ябадаг, эрэ, эмэ арсалангууд гүлгэнтэеэ хамта аюулгүй амидардаг мэтэ бэлэйл.

¹² Гүлгэдөө болон эмэ арсаланаа дүүрэн садхаахын тула олзоёо таһа татан алажа, байдаг нүхэеэ тэрэ мяхаар дүүргэгшэ арсаландал адли һэн тэдэ.

¹³ «Харагты даа, Би таанадые хэһээхэб! – гэжэ Түмэн Сэрэгтэ Эзэн айладана. – Дайшалхы тэргэнүүдыетнай гал дүлэндэ шатаахаб, һэлмээр сабшан, үхи хүүгэдыетнай усадхахаб, олзо оршыетнай хүрьһэтэ дэлхэйһээ үгы хэхэб. Дэлхэйн арадуудые баадхажа, занажа байдаг элшэнэрэйтнай абяа дуун бэшэ дуулдахаяа болихо».