Матвей 4 - Библи

¹ Удаань Һүлдэ Иисүүсые альбан шолмосоор һорюулха туршуулхаяа сүл губи руу хүтэлжэ абаашаба.

² Иисүүс дүшэн үдэр, дүшэн һүни масаглаад, һүүлдэнь гэдэһэниинь аргагүй ехээр үлдэбэ.

³ Тиихэдэнь һоригшо шолмос тэрээндэ ерээд: – Хэрбээ Та Бурханай Хүбүүн юм һаа, эдэ шулуунуудта хилээмэн болохыень захирагты, – гэбэ.

⁴ Тиихэдэнь Иисүүс: – «Хүн ганса хилээмээр амидардаггүй, харин Бурханай хэлэһэн үгын ашаар амиды ябадаг», – гэжэ Нангин Бэшэг соо хэлэгдэнэ, – гэжэ харюусаба.

⁵ Һүүлдэнь шолмос Иисүүсые нангин Иерусалим хото абаашажа, Һүмын орой дээрэ байлгаба.

⁶ – Хэрбээ Та Бурханай Хүбүүн юм һаа, эндэһээ доошоо һүрыт. Тиигэбэлтнай, «Бурхан Эльгээмэлнүүдтээ Танай тушаа захиралта үгэхэ, шулуунда торожо унахагүйнтнай тула тэдэ Таниие гар дээрээ үргөөд ябаха», – гээд Нангин Бэшэг соо хэлэгдэнэ ха юм, – гэжэ шолмос Иисүүстэ хэлэбэ.

⁷ Тиихэдэнь Иисүүс: – Эзэн Бурханаа бү турша гээд баһа тэндэ бэшээтэй юм, – гэжэ шолмосто харюусаба.

⁸ Иисүүсые шолмос дахин үндэр гэгшын хада дээрэ абажа гараад, дэлхэйн бүхы хаан оронуудые, тэдэнэй һүр жабхалангые харуулна.

⁹ – Хэрбээ хүлдэм унажа мүргөө һаатнай, би эдэ бүгэдые Танда үгэхэб! – гэжэ Тэрээндэ шолмос хэлэбэ.

¹⁰ Тиихэдэнь Иисүүс шолмосто: – Ай, сатана! Намһаа зайла! «Ши Эзэн Бурхандаал шүтэжэ, гансал Тэрээндэ алба хэжэ бай!» – гээд Нангин Бэшэг соо хэлэгдэнэ, – гэжэ харюусаба.

¹¹ Тиихэдэнь шолмос Иисүүсые орхижо ошобо, харин Бурханай Эльгээмэлнүүд Тэрээндэ туһалхаяа ерэбэ.

Иисүүс Галилей можодо ажалаа хэжэ эхилбэ

¹² Иоанные түрмэдэ хаагаа гэжэ дуулаад, Иисүүс Галилей можо ошобо.

¹³ Теэд Назарет хотодоо байхын орондо, Тэрэ Капернаум хотодо һуурижаба. Тэрэ хото Галилей далайн хажууда, Зэбүлүүн ба Напталиим обогуудай газарта оршожо байгаа.

¹⁴ Тиигэжэл лүндэншэ Исайгаар дамжуулан Бурханай айладхаһаниинь бүтэбэ даа:

¹⁵ «Зэбүлүүн болон Напталиимай газар дайда, нуурай шадархи харгын дэргэдэхи газарнууд, Иордан мүрэнэй нүгөө бэеын һуури, мүн хариин зоной ажаһуудаг Галилей гэдэг газар дайда,

¹⁶ харанхы мунхагта һуугаашад тон ехэ гэрэл туяа үзэбэ! Үхэлэй ороной һүүдэртэ һуугаашадта гэрэл туяа сасарба!»

¹⁷ Тэрэ сагһаа хойшо Иисүүс: – Нүгэл үйлэдэхэеэ болижо, Бурханда хандагты, Бурханай хаан түрэ мандаха дүтэлөө, – гээд номножо эхилбэ.

Иисүүс түрүүшын дүрбэн шабинараа шэлэбэ

¹⁸ Иисүүс нэгэтэ Галилей далайн хажуугаар ябажа ябахадаа, аха дүү хоёрые хараба. Тэдэ загаһашадай нэгэнь Пётр гэжэ ара нэрэтэй Симон, нүгөөдэнь тэрэнэй Андрей гэдэг ахань байгаа. Тэдэ хоёр загаһашад гүльмэеэ далайда хаяжа байба.

¹⁹ – Таанар хойноһоомни ябагты, загаһа барихын орондо хүнүүдые яажа Намда хандуулхые һургахаб, – гэжэ Иисүүс тэдэндэ хэлэбэ.

²⁰ Тиигэхэдэнь тэдэнэр дары гүльмэеэ орхёод, Иисүүсэй хойноһоо ябаба.

²¹ Тэндэһээ саашалжа ябатараа Иисүүс Зэбэдэйн хүбүүдые, Яков Иоанн хоёрые хараба. Аха дүү хоёр Зэбэдэй эсэгэтэеэ хамта онгосодо һуугаад, гүльмэеэ заһажа байгаа. Иисүүс тэдэниие хамта ябалсахаарнь дуудаба.

²² Тэдэнь дары эсэгэеэ онгосотойнь орхижо, Иисүүстэй ябаба.

Иисүүс һургана, номноно, үбшэ хабшанһаа эдэгээнэ

²³ Иисүүс бүхы Галилей можоор ябажа, мүргэлэй гэрнүүд соо арад зониие һургаба, Бурханай хаан түрэ тухай Һайн мэдээсэл номнобо, элдэб янзын үбшэ хабшатай хүнүүдые эмнэн эдэгээбэ.

²⁴ Иисүүс тухай алдар бүхы Сири ороноор хаа хаанагүй тараба. Тиимэһээ Тэрээндэ ехээр үбдэжэ зобожо байһан, досоогоо ада шүдхэртэй болоһон, унадаг, саа үбшэнтэй, мүн бусадшье элдэб янзын үбшэ хабшантай зон олоор ерэбэ, Иисүүс тэдэниие бултыень эдэгээбэ.

²⁵ Галилей можоһоо, Арбан хото можоһоо, Иерусалимһаа, Иудей можоһоо, Иордан голой саада бэеһээ ерэһэн үй түмэн зон Иисүүсые дахажа ябаба.