Матвей 25 - Библи

Арбан басагад тухай һургаалта үгэ

¹ – Тэрэ үедэ Огторгойн хаан түрэ иимэ ушартай адлишуу байха: Нэгэтэ арбан басагад өөһэд өөһэдынгөө зула баряад, хүрьгэн хүбүүе угтахаяа газаашаа гараба гэхэ.

² Тэдэнэй табаниинь сэсэн, табаниинь бодомжогүй тэнэг байгаа һэн гэлэй.

³ Бодомжогүй басагадынь зулаяа абаад, тоһо абаагүй.

⁴ Сэсэн басагадынь зулатаяа хамта амһарта соо тоһо абажа гаралсаа.

⁵ Тиигээд хүрьгэн хүбүүнэй удаархада, тэдэ басагад һажажа байһанаа унташаба.

⁶ Һүниин тэн болоходо: «Зай, хүрьгэн хүбүүн эндэ ерэжэ ябана, тэрэнээ угтахаяа гарагты», – гэжэ хэншьеб шангаар дуугарба.

⁷ Тиихэдэнь арбан басагад булта бодожо, өөһэд өөһэдынгөө зула заһажа оробо.

⁸ Тэнэг басагадынь сэсэн басагадтаа хандажа: «Өөһэдынгөө тоһонһоо манда үгэлсыт, зуламнай унтархаяа байна», – гэбэ.

⁹ Тиихэдэнь сэсэн басагадынь: «Манда байһан тоһо бултандамнай хүрэхэгүй, тиимэһээ таанар наймаашадта ошоод, өөһэдтөө тоһо худалдажа абагты», – гэжэ харюусаба.

¹⁰ Бодомжогүй басагадай тоһо худалдажа абахаяа ошоходонь, хүрьгэн хүбүүн ерэбэ. Зүгөөр бэлэн байһан сэсэн басагадынь хүрьгэн хүбүүнтэй хамта түрэ найрта ошобо, тиин үүдэнүүдыньшье хаагдаба.

¹¹ Удаань нүгөөдэ басагад ерээд: «Эзэн! Эзэн! Манда үүдээ нээгыт», – гэжэ хашхаралдаба.

¹² Теэд хүрьгэн хүбүүн: «Үгы даа, би таанарые танихагүйб», – гэжэ харюусаба.

¹³ Тиигээд Иисүүс түгэсхэлдэнь: – Тиимэһээ таанар ходо һэргэг байгты, юундэб гэбэл, Хүн түрэлхитэнэй Хүбүүнэй ерэхэ үдэрыешье, сагыешье мэдэнэгүй ха юмта, – гэжэ шабинартаа хэлэбэ.

Гурбан зараса тухай һургаалта үгэ

¹⁴ – Тэрэ үедэ Огторгойн хаан түрэ иимэ ушартай адлишуу байха: Нэгэ гэрэй эзэн холын аянда гарахынгаа урда тээ зарасанараа дуудажа, тэдэндээ зөөри хогшолоо даалгаба.

¹⁵ Эзэн зарасанарайнгаа абьяас шадабари мэдэжэ байгаад, хүн бүридэнь шадал абьяасайнь зэргээр мүнгэ үгэбэ: нэгэндэнь табан мянган алтан мүнгэ, нүгөөдэдэнь хоёр мянган алтан мүнгэ, гурбадахидань нэгэ мянган алтан мүнгэ барюулба. Тиигээд аяндаа мордобо.

¹⁶ Табан мянган алтан мүнгэ абаһан түрүүшын зарасань мүнгэеэ ашагтайгаар эрьесэдэ оруулжа, үшөө табан мянган алтан мүнгэнэй ашаг олзотой болобо.

¹⁷ Тэрээндэл тон адляар хоёр мянган алтан мүнгэ абаһан зарасань мүнгэеэ эрьесэдэ оруулаад, үшөө хоёр мянган алтан мүнгэнэй ашаг олзо олобо.

¹⁸ Харин нэгэ мянган алтан мүнгэ абаһан зарасань эзэнэйгээ мүнгэ газарта булажа нюуба.

¹⁹ Нилээд удаан сагай үнгэрһэн хойно эзэн гэртээ бусажа ерээд, зарасанартайгаа тоосоо хэбэ.

²⁰ Табан мянган алтан мүнгэ абаһан зарасань абаһан мүнгэтэеэ хамта үшөө ондоо табан мянган алтан мүнгэ абажа ерээд: «Эзэн аа! Та намда табан мянган алтан мүнгэ үгөө бэлэйт. Би тэрээгээртнай үшөө табан мянган алтан мүнгэ олооб», – гэжэ хэлэбэ.

²¹ Эзэниинь тэрээндэ: «Ехэ һайн! Ши бэрхэ, найдабаритай зараса байнаш! Бага юумэ эрхилхэдээ ши найдабаритай байбаш, тиимэһээ би шамда бүришье ехэ юумэ даалгахамни! Орожо, эзэнтэйгээ хамта баярла», – гэбэ.

²² Мүн хоёр мянган алтан мүнгэ абаһан хүниинь ерэжэ: «Эзэн аа! Та намда хоёр мянган алтан мүнгэ үгөө бэлэйт, би тэрээгээртнай үшөө хоёр мянгые олооб», – гэжэ хэлэбэ.

²³ Эзэниинь тэрээндэ: «Ехэ һайн! Ши бэрхэ, найдабаритай зараса байнаш! Бага юумэ эрхилхэдээ ши найдабаритай байбаш, тиимэһээ би шамда бүришье ехэ юумэ даалгахамни! Орожо, эзэнтэйгээ хамта баярла», – гэбэ.

²⁴ Мүн нэгэ мянган алтан мүнгэ абаһан зараса ерэжэ: «Эзэн аа! Би таниие шэрүүн хатуу хүн гэжэ мэдэнэб. Та таряагүй байһан газарһаа хуряадагта, үрэһэ сасаагүй байһан газарһаа ургаса суглуулдагта.

²⁵ Айһандаа би танай үгэһэн мянган алтан мүнгэ газарта булажа нюугааб. Энэ мүнгэнтнай байна», – гэбэ.

²⁶ Эзэниинь тэрээндэ: «Хара һанаатай, залхуу зараса! Ши намайе таряагүй байһан газарһаа хуряадаг, үрэһэ сасаагүй байһан газарһаа ургаса суглуулдаг гэжэ мэдэжэ байгааш, тиимэ гү?

²⁷ Тиимэһээ ши минии мүнгэ ядахадаа наймаашадта үгэжэ эрьесэдэ оруулха байгааш, тиигээ һаашни, би бусажа ерэхэдээ мүнгэеэ нэмэритэйгээр абаха бэлэйб», – гэбэ.

²⁸ Тиигээд эзэн: «Энээнһээ мүнгыень абаад, арбан мянган алтан мүнгэтэй хүндэ үгэгты.

²⁹ Ушарынь хэлэбэл, юумэтэй хүндэ үшөө ехэ юумэн үгтэхэ, тиимэ хүн бүри элбэг дэлбэг юумэтэй байха; харин юумэгүй байһан хүнһөө һүүлшынхинь абтаха.

³⁰ Харин энэ хэндээш хэрэггүй зарасые газаашань, шэб харанхыда абаашаад хаягты: тэндэ хүнүүд бархиралдаха, шүдөө хабиралдаха», – гэбэ.

Һүүлшын зарга шүүбэри

³¹ – Хүн түрэлхитэнэй Хүбүүн алдар солотойгоор бүхы Эльгээмэлнүүдтэйгээ хамта ерэхэдээ, Өөрынгөө алдарта шэрээдэ һууха.

³² Бүхы арадуудые Тэрэнэй урда суглуулха. Тиихэдэнь хонишоной хонидые ямаануудһаа илгадагтал адляар Тэрэ хүнүүдые бэе бэеһээнь илгажа, хоёр бүлэг болгожо хубааха.

³³ Тиигээд хонидые баруун таладаа, харин ямаануудые зүүн таладаа байлгаха.

³⁴ Тиигээд хаан Тэрэнэй баруун талада байгаашадта хандажа: «Минии Эсэгын үршөөл хайрада хүртэгшэ таанад ерэжэ, юртэмсэ дэлхэйн бии болохоһоо нааша таанарта бэлдэгдэһэн хаан түрэ халан абагты.

³⁵ Минии үлэн хооһон ябахада, таанар Намда эдихэ юумэ үгөөт; ундаа хүрөөд ябахадамни, ууха юумэ үгөөт; аяншалжа ябахадамни, Намайе гэртээ угтажа абаат;

³⁶ нюсэгэн байхадамни, үмдэхэ хубсаһа хунар үгөөт; үбшэн байхадамни, хойноһоомни харууһалаат; түрмэдэ һуухадамни, Намтай уулзахаяа ерээт», – гэжэ үнэн зүбтэндэ хэлэхэ.

³⁷ Тиихэдэнь үнэн зүбтэн Тэрээндэ: «Эзэн! Хэзээ бидэ Таниие үлэн хооһон ябаһыетнай хараад, эдихэ юумэ үгөөбибди? Али хэзээ ундаа хүрөөд ябахадатнай, ууха юумэ үгөөбибди?

³⁸ Хэзээ Танай аяншалжа ябахада, бидэ Таниие гэртээ угтажа абаабибди? Али нюсэгэн байхадатнай, үмдэхэ хубсаһа хунар үгөөбибди?

³⁹ Хэзээ Танай үбдөөд байхада гү, али түрмэдэ һуухадатнай гү, бидэ Тантай уулзахаяа ошообибди?» – гэжэ һураха.

⁴⁰ Тиихэдэнь хаан: «Эгээлэй юрын Минии дахагшадай нэгэндэнь тиимэ һайн юумэ хэхэдээ, таанад Намдашье һайниие хээ гээшэт», – гэжэ харюусаха.

⁴¹ Тиигээд хаан Тэрэнэй зүүн талада байгаашадта хандан: «Бурханай хараалда хүртэгшэ таанад, Намһаа холо бологты! Шолмосто, мүн тэрэнэй эльгээмэлнүүдтэ бэлдээтэй хэтэ заяанай гал тамада ошогты!

⁴² Минии үлэн хооһон ябахада, Намда эдихэ юумэ һарбайгаагүй һэнта; ундаа хүрөөд ябахадамни, ууха юумэ үгөөгүй һэнта;

⁴³ аяншалжа ябахадамни, гэртээ угтажа абаагүй һэнта; нюсэгэн байхадамни, үмдэхэ хубсаһа хунар үгөөгүй һэнта; үбдөөд байхадамни, түрмэдэ һуухадамни, Намтай уулзахаяа ерээгүй һэнта», – гэжэ буруутаһан зондо хэлэхэ.

⁴⁴ Тиихэдэнь тэдэнь: «Эзэн! Хэзээ бидэ Таниие үлэн хооһон, ундаа хүрөөд ябахые, аяншалжа ябахые, нюсэгэн байхые, үбдэхые, түрмэдэ һуухые хараад, Танда туһалаагүй гээшэбибди?» – гэжэ хаанһаа һураха.

⁴⁵ Тиихэдэнь хаан тэдэндэ: «Тон эгээлэй юрын хүнүүдэймни нэгэндэньшье тиимэ туһа хүргэхэеэ арсахадаа, таанар Намдашье туһалхаяа арсаба гээшэт», – гэжэ харюусаха.

⁴⁶ Тиигээд тэдэ буруутаһан зон хэтэ заяандаа хэһээгдэхэ, харин Бурханай һайшаалда хүртэһэн зон мүнхын амидаралда хүртэхэ.