Матвей 20 - Библи

Үзэмэй сэсэрлигтэ хүдэлдэг хүнүүд тухай һургаалта үгэ

¹ – Огторгойн хаан түрэ иимэрхүү юм: Нэгэ хүн үзэмэйнгөө сэсэрлигтэ ажалшадые хүлһэлхэеэ гэрһээ эртэ үглөөгүүр гаража ошобо.

² Тиигээд үдэрэй нэгэ динари түлэхөөр хүлһэншэдтэеэ хэлсээд, тэдэниие ажаллахыень сэсэрлигтээ эльгээбэ.

³ Тэрэл үглөөгүүр юһэн сагай багта тэрэ наймаа хэдэг газар ошожо, тэндэ ямаршье ажалгүй хэдэн хүнүүдэй байхые хараба.

⁴ Эзэн тэдэндэ хандажа: «Таанаршье минии үзэмэй сэсэрлигтэ ошожо ажаллагты, хүлһыетнай таанарта зүбөөр үгэхэб», – гэхэдэнь,

⁵ тэдэ хүнүүд ажаллахаяа ошобо. Тэрэ хүн үдэрэй хахадта, мүн үдэрэй гурбан сагта дахин наймаанай газар ошожо, баһал ажалгүй хүнүүдые хүлһэлбэ.

⁶ Һүүлэй һүүлдэ табан сагай багаар гарахадаа, үшөө хэдэн хүнэй зугаатай зогсохые хараба, тиигээд тэдээндэ хандажа: «Таанад юундэ ямаршье юумэ хэнгүй бүхэли үдэр эндэ зогсонобта?» – гэжэ асууба.

⁷ Тэдэнь: «Маниие хэншье хүлһэлөөгүйл», – гэжэ харюусабад. Тиихэдэнь тэрэ хүн: «Зай, тиимэ һаа, таанад минии үзэмэй сэсэрлигтэ ошожо ажаллагты», – гэжэ хүнүүдтэ хэлэбэ.

⁸ Үдэшэ болоходо, үзэмэй сэсэрлигэй эзэн эрхилэгшэдээ хандажа: «Ши хүдэлмэришэдые дуудажа, һүүлдэ ажаллахаяа гараһан хүнүүдһээ эхилээд, түрүүшээр гараһан хүнүүдээр түгэсэн, ажалайнь хүлһэ түлэ», – гэбэ.

⁹ Табан сагта хүдэлхэеэ гараһан хүнүүд нэгэ-нэгэ динари ажалай хүлһэ абаба.

¹⁰ Тиимэһээ түрүүн ажаллажа эхилһэн хүнүүд: «Үлүү ехэ мүнгэ абахабди», – гэжэ һанаа, теэд тэдэ баһал нэгэ-нэгэ динари ажалай хүлһэ абаба.

¹¹ Тэдэ хүлһэеэ абаад, гэрэй эзэнэй урдаһаа гэмэрэлдэбэ.

¹² «Һүүлдэ ерэһэн эдэ хүнүүд оройдоол нэгэ саг ажалаа, харин та эдэндэ бүхэли үдэр бүгшэм халуунда зобожо хүдэлһэн бидэндэл адли мүнгэ түлэбэт», – гэбэ.

¹³ Гэрэй эзэн тэдэнэй нэгэндэнь иигэжэ хэлэбэ: «Нүхэр! Би шамайе мэхэлээгүйлби, нэгэ динари ажалай хүлһэ абахаш гэжэ ши бидэ хоёр зүбшөө бэшэ һэн гүбди?

¹⁴ Ши өөрынгөө ажалай хүлһэ абаад яба. Һүүлдэ хүлһэлһэн энэ хүндэ би шамда түлэһэнтэй адли мүнгэ үгэхэ һанаатайб.

¹⁵ Өөрынгөө мүнгэтэй би дуратай юумэеэ хэхэ эрхэтэй бэшэ гүб? Али минии гар бардам байһанда ши атаархахаяа һанаба гүш?»

¹⁶ Тон тиигэжэл адагай һүүлдэ байгшад түрүү зэргэдэ гараха, тиин түрүү зэргэдэ байгшад адагай һүүлшын болохо.

Иисүүс үхэхэ тухайгаа гурбадахияа хэлэнэ

¹⁷ Иисүүс Иерусалим ошохо замдаа арбан хоёр шабинараа хажуу тээшэнь дуудаад:

¹⁸ – Мүнөө бидэ Иерусалим орохомнай. Тэндэ Хүн түрэлхитэнэй Хүбүүниие түрүү санаартанай, Хуули заадаг багшанарай гарта тушааха. Тэдэнэр Хүбүүе гэмнэн, үхэлэй саазада хүртөөхэ гэжэ шиидэхэ.

¹⁹ Тиигээд Тэрээниие хариин зоной гарта тушааха. Тэдэнь Тэрээниие доромжолон наада бариха, сохихо, хэрээһэндэ хадаха. Тиигэбэшье Хүбүүн үхөөд, гурбадахи үдэртөө амидырха, – гэбэ.

Зэбэдэйн хүбүүдэй эхын гуйлта

²⁰ Зэбэдэйн хүбүүдэй эхэнь хүбүүдтэеэ хамта Иисүүстэ ерээд, урдань дохин мүргэжэ, Тэрээнэй үршөөл гуйба.

²¹ – Ши юу хүсэнэбши? – гэжэ Иисүүс тэрэ эхэнэрһээ асууба. Тэрэнь Иисүүстэ: – Та Хаан шэрээдээ һуухадаа, эдэ хоёр хүбүүдэймни нэгыень баруун таладаа, нүгөөдыень зүүн таладаа һуулгажа хайрлыт даа, – гэбэ.

²² Иисүүс харюудань: – Таанад юун тухай гуйжа байһанаа үнэхөөрөө ойлгоногүйт. Минии амсаха ёһотой зоболонгой аягаһаа таанад уужа амсажа шадаха аалта? – гэбэ. Тиихэдэнь Яков Иоанн хоёр: – Шадахабди, – гэжэ тэрээндэ харюусаба.

²³ Иисүүс тэдэндэ: – Үнэхөөрөө таанад Минии зоболонгой аягаһаа амсахат. Теэд баруун таладамни, зүүн таладамни һууха хүнүүдые һунгахань Минии мэдэлдэ бэшэ юм. Эдэ һууринуудта Минии Эсэгын табиһан хүнүүд һууха, – гэжэ хэлэбэ.

²⁴ Бусад арбан шабинарынь энээн тухай дуулахадаа, аха дүү хоёрто сухалаа ехээр хүрэбэ.

²⁵ Тиимэһээ Иисүүс тэдэниие дуудажа: – Хариин захирагшад өөһэдынгөө арад зониие зонхилхо дуратай байдаг, мүн түшэмэл һайдуудыньшье албатанаа захирха бүрин засагтай байдаг гэжэ таанар мэдэнэт.

²⁶ Харин таанад тэдэндэл адляар бэеэ абажа бү ябагты. Агууехэ болохо һанаатай хүнтнай бусадайнгаа бултанайнь зараса болохо ёһотой.

²⁷ Али таанарай дунда түрүү зэргэдэ гараха һанаатай хүнтнай бусадайнгаа бултанайнь барлаг болохо ёһотой.

²⁸ Хүн түрэлхитэнэй Хүбүүн хүнүүдые зарахаяа ерээ бэшэ, харин бусад уладта алба хэхэеэ, мүн үнэтэ ами наһанайнгаа сэнгээр олон хүнүүдые абархаяа ерээ, – гэбэ.

Иисүүс хоёр һохор хүниие эдэгээбэ

²⁹ Иисүүсэй шабинартайгаа Ерихоонһоо гаража ябахада, тэдэнэй хойноһоо үй түмэн зон дахажа ябаба.

³⁰ Тэрэ үедэ харгын захада һууһан хоёр һохор хүн хажуугаарнь Иисүүсэй гаража ябаһан тухай дуулаад: – Эзэн, Давидай үри һадаһан, маниие үршөөжэ хайрлыт! – гэжэ хашхаралдаба.

³¹ Улад зоной тэдэ хоёрто дуугүй бологты гэбэшье, тэдэ хоёрынь бүри шангаар: – Эзэн, Давидай үри һадаһан! Маниие үршөөн хайрлыт, – гэжэ хашхаралдаба.

³² Иисүүс зогсожо, тэдэниие дуудаад: – Таанад Намһаа юу хүсэнэбта? – гэжэ һураба.

³³ Тэдэ хоёрынь: – Эзэн! Хараатай болохые хүсэнэбди, – гэжэ харюусаба.

³⁴ Иисүүс тэдэниие хайрлажа, нюдэдтэнь халта хүрөөд абаба. Тэрэ дороо нюдэдынь харадаг боложо, тэдэ хоёр Иисүүсэй хойноһоо ябаба.