Матвей 16 - Библи

¹ Хэдэн фарисейнүүд, саддукейнэр Иисүүсые туршаха зорилготойгоор Тэрээндэ ойртобо. Тиигээд гайхамшагта дүлгэ тэмдэг харуулхыень дурадхаба.

² Иисүүс тэдэндэ харюусаба: – Үдэшэндөө огторгойн барагар улаан байбалнь, таанад: «Үглөөдэр сэлмэг байха» гэдэгта.

³ Харин үглөөгүүр огторгойн барагар улаан, бүрхэг байбалнь, таанад: «Мүнөөдэр бороо орохонь» гэдэгта. Хоёр нюуртан! Таанад огторгой хараад, ямар үдэрэй болохые мэдэдэг аад, харин мүнөө сагай дүлгэ тэмдэгүүдые тайлбарилха аргагүй байнат.

⁴ Харата муухай, забхай оршон үеын зон, гайхамшагта дүлгэ тэмдэг харахаяа һанаба гүт? Теэд Иона лүндэншэтэй ушарһан гайхамшагта дүлгэ тэмдэгһээ ондоо дүлгэ тэмдэг таанадта үгтэхэгүй. Тиигээд Иисүүс тэдэнһээ холодобо.

Фарисейнүүдэй болон саддукейнэрэй эһээбэри

⁵ Далайн нүгөө эрьедэ тамаржа гарахадаа, шабинарынь хилээмэ абахаяа мартаһан байба.

⁶ Иисүүс тэдээндэ айладхаба: – Һэргэлэн байгты! Фарисей, саддукейнэрэй эһээбэриһээ болгоомжолжо байгты.

⁷ Шабинарынь өөһэд хоорондоо: – Маанадай хилээмэ абаагүйдэмнай тиигэжэ хэлээ ёһотой, – гэлсэбэ.

⁸ Энээниие Иисүүс мэдээд, тэдээндэ иигэжэ хэлэбэ: – Этигэл багатан, таанар хилээмэ абаагүйбди гэжэ юундэ хоорондоо хэлсээбта?

⁹ Таанад мүнөө болотор ойлгобогүй гээшэ гүт? Табан хилээмээр табан мянган хүнэй садаһан тухай, үшөө тиихэдэ хэдэн түрсүүг үлөөдэһэнэй сугларһан тухай таанар һананагүй аалта?

¹⁰ Долоон хилээмээр дүрбэн мянган хүнэй садаһан тухай, үшөө тиихэдэ хэдэн түрсүүг үлөөдэһэнэй сугларһан тухай мартаа аалта?

¹¹ Хилээмэн тухай таанарта хэлээгүй байһыемни мүнөө болотор ойлгоногүй гүт? Фарисейнүүдэй, саддукейнэрэй эһээбэриһээ һэргылжэ байгты!

¹² Һүүлэй һүүлдэ шабинарынь хилээмэнэй эһээбэриһээ бэшэ, харин фарисейнүүдэй, саддукейнэрэй һургаалһаа һэргылэгты гэжэ хэлэһыень ойлгобо.

Пётр Иисүүсые Бурханай табисуурта гэжэ айладхана

¹³ Иисүүс Филиппэй Кесари хотын хажууда ерээд байхадаа, Өөрын шабинарһаа: – Хүн түрэлхитэнэй Хүбүүн тухай хүнүүд юун гэнэб? – гэжэ һураба.

¹⁴ – Зарим хүнүүд Таниие Уһаар Арюудхагша Иоанн гэнэ, бусадынь Элияа гэжэ һанана, баһа нүгөөдүүлынь Ерэмияа гү, али ондоо лүндэншэдэй нэгэн гэлсэнэ, – гэжэ тэдэнь харюусаба.

¹⁵ – Теэд таанар Намайе хэн гэжэ һананабта? – гэжэ Иисүүс тэдэнһээ һураба.

¹⁶ – Та Бурханай табисууртат, Амиды Бурханай Хүбүүнта, – гэжэ Симон Пётр харюусаба.

¹⁷ Тиихэдэнь Иисүүс: – Ионын хүбүүн Симон, ши золтойш! Энэ үнэн зүбые шамда хүнэй һанаан нээгээ бэшэ, харин тэнгэридэ оршодог Минии Эсэгэ тайлбарилаа.

¹⁸ Тиимэһээ Би шамда хэлэнэб: ши, Пётр – шулуун гээшэш, тиин Би энэ шулуун дээрэ Өөрынгөө һүзэглэгшэдэй бүлгэмые бодхоохоб, тэрэнииемни үхэлшье өөрөө диилэхэгүй.

¹⁹ Огторгойн хаан ороной түлхюурые Би шамда үгэхэб. Тиин газар дээрэ хориһон юумэншни огторгой дээрэ хоригдохо; газар дээрэ зүбшөөһэн юумэншни огторгой дээрэ зүбшөөгдэхэ, – гэбэ.

²⁰ Тиигээд Бурханай табисуурта байһан тухайнь хэндэшье хэлэхэгүйень Иисүүс шабинартаа захирба.

Иисүүс зобохо, үхэхэ тухайгаа хэлэнэ

²¹ Тэрэ сагһаа эхилээд, Иисүүс өөртэйнь юунэй ушарха тухай шабинартаа хэлэдэг болобо. – Би Иерусалим ошохо ёһотойб, тэндэ ахамадһаа, түрүү санаартанһаа, Хуули заадаг багшанарһаа боложо ехэ зоболон эдлэхэб. Би алуулхаб, тиигээд гурбан үдэрһөө амидырхаб, – гэдэг байба.

²² Тиихэдэнь Пётр тэрэниие хажуу тээшэнь дуудажа абаашаад: – Эзэн, үгы даа! Тиимэ юумэн Тантай хэзээшье болохогүйнь болтогой! – гэжэ зогсоожо байгаа.

²³ Иисүүс Пётрто хандан: – Холо боло Намһаа, сатана! Ши Намда һаад хэнэш. Шинии һанал бодолнуудшни Бурханһаа үршөөгдэнэ бэшэ, харин хүн шанарһаашни бүрилдэнэ, – гэбэ.

²⁴ Тиигээд Иисүүс Өөрынгөө шабинарта хэлэбэ: – Намтай ябалсаха дуратай хүн өөр тухайгаа бодохоёо болёод, үдэр бүхэн хэрээһэеэ үргэлөөд, хойноһоомни яба.

²⁵ Ами наһаяа гамнаха һанаатайшуултнай тэрэнээ алдаха; харин Минии түлөө амияа үгэһэнтнай тэрэнээ алмаха.

²⁶ Хэрбээ таанад бүхы дэлхэйе олзолоод, ами һүнэһэеэ алдабалтнай, танда ашагтай гү? Үгыл даа! Таанад ямаршье юумэ түлөөд, ами һүнэһэеэ бусаажа шадахагүйлта.

²⁷ Хүн түрэлхитэнэй Хүбүүн Эсэгынгээ алдар соо Эльгээмэлнүүдтэйгээ хамта һаяар ерэхэл, тиигээд хэһэн хэрэгэйнь хэмээр хүн бүхэниие шиидхэхэл.

²⁸ Эндэ байгшадай зариман Хүн түрэлхитэнэй Хүбүүнэй хаан түрэеэ баряад заларжа ерэхые үзөөгүйдөө үхэхэгүй гэжэ таанадта баталан хэлэнэб.