Матвей 15 - Библи

¹ Тиигээд Иерусалимһаа хэдэн Хуули заадаг багшанар, фарисейнүүд Иисүүстэ ерэжэ:

² – Шабинартнай юундэ үбгэ эсэгэнэрэймнай заншалнуудые баримталнагүйб? Тэдэнэртнай эдихынгээ урда тээ гараа угаанагүйл, – гэлдэбэ.

³ Иисүүс тэдээндэ иигэжэ харюусаба: – Тиихэдээ юундэ таанар Бурханай захяа заабари дүүргэнгүй, өөһэдынгөө ёһо гуримые баримталнабта?

⁴ «Аба эжы хоёроо хүндэлэ», – гэжэ Бурхан заабарилаа бэшэ һэн гү? Мүн баһа «Аба эжы хоёроо муушалһан хүн үхэлдэ хүртэхэ» гээ бэшэ һэн гү?

⁵ Харин таанар эхэ эсэгэдээ үгэжэ туһалха аргатай байһан юумэеэ: «Би Бурханда үргөөб» гэжэ хэлэбэл,

⁶ эхэ эсэгэеэ хүндэлхэ хэрэггүй гэжэ заанат. Тиигэжэ таанар Бурханай захяа заабари сахингүй, өөһэдынгөө тогтооһон ёһо заншалаар һэлгэнэт.

⁷ Хоёр нюуртан! Таанар тухай лүндэншэ Исай үнэн сохомые уридшалан хэлээ һэн лэ:

⁸ «Энэ улад зон хэлэ амаараа Намайе хүндэлнэ, харин зүрхэ сэдьхэлдээ Нам тухай огто бодоногүй.

⁹ Хүнүүдэй зохёоһон ёһо гуримуудта һургажа байхадаа, тэдэ дэмы Намда мүргэнэ даа».

Ямар юумэнүүд хүниие бузарланаб?

¹⁰ Иисүүс улад зониие дуудаад: – Хэлэһыемни шагнажа, ойлгохые хэшээгты!

¹¹ Амандатнай орожо байһан эдеэн таниие бузарладаггүй, харин аманһаатнай гаража байһан муухай үгэнүүд таниие бузарладаг, – гэжэ хэлэбэ.

¹² Тиихэдэнь шабинарынь Иисүүстэ ойртоод: – Хэлэһэн үгэнүүдтнай фарисейнүүдэй һанаанда таарабагүй гэжэ мэдэнэ гүт? – гэжэ һураба.

¹³ Иисүүс иигэжэ харюусаба: – Тэнгэридэ байгша Эсэгымни таряагүй ямаршье ургамал үндэһэтэйгөө хамта абтажа хаягдаха.

¹⁴ Тэдэн тухай һанаагаа огто бү зобогты. Тэдэнэр һохор хүнүүдэй һохор ударидагшад мүн; теэд һохор хүн һохорые хүтэлжэ ябабал, хоюулаа нүхэ руу унаха юм.

¹⁵ – Хүниие бузарладаг юумэнүүд тухай хөөрэһэнөө маанадта тайлбарилжа үгыт даа, – гэжэ Пётр гуйба.

¹⁶ – Хэлэһыемни хэнтнайшье мүнөө болотор ойлгоогүй гээшэ гү?

¹⁷ Ойлгоногүй аалта, амандаа хэһэн эдеэтнай хотондотнай ороод, һүүлдэнь бэеһээтнай гарадаг.

¹⁸ Харин аманһаатнай гараһан үгэнүүд зүрхэ сэдьхэлһэйтнай гарадаг; тэдэтнай таанадые бузарладаг ха юм.

¹⁹ Ушарынь юуб гэбэл, зүрхэнһөөтнай хара һаналнууд түрөөд, таанадые алаха, эрэдээ гү, али эхэнэртээ урбаха, забхай зальхай ябадал гаргаха, хулгай хэхэ, бусадые хардаха, муушалха гэхэ мэтын дорой хэрэгүүдтэ түлхидэг юм.

²⁰ Эдэ бүхы ябадалнууд таанадые бузарладаг. Зүгөөр угаагдаагүй гараараа юумэ эдихэдээ, таанад бэеэ бузарладаггүйт.

Эхэнэрэй һүзэг этигэл тухай

²¹ Иисүүс байһан газарһаа хүдэлжэ, Тиир Сидоон хотонуудай шадархи газар дайдада хүрэжэ ерэбэ.

²² Тэндэ ажаһуудаг нэгэ хананей эхэнэр Иисүүстэ ерэжэ: – Эзэн, Давидай үри һадаһан, намайе хайрлажа үршөөгыт! Басагамни ада шүдхэртэ барюулаад, аймшагтай зобожо байна, – гэжэ орилбо.

²³ Теэд Иисүүс тэрэ эхэнэртэ юушье хэлэбэгүй. Тиихэдэнь Тэрэнэй шабинарынь дүтэлжэ: – Энэ эхэнэрые ябуулыт, хойноһоомнай дахаад лэ, хашхараад лэ һаланагүйл, – гэжэ гуйба.

²⁴ – Би имагтал Израилиин төөрижэ хосорһон хонидто эльгээгдэһэн байгааб, – гэжэ Иисүүс харюусаба.

²⁵ Харин тэрэ эхэнэр бүри ойртоод, Иисүүсэй урда дохин мүргэжэ: – Эзэн! Намда туһалыт, – гэжэ гуйба.

²⁶ – Хүүгэдэй эдихэ хоол абаад, нохойнуудта хаяхань зохихогүй юм, – гэжэ Иисүүс тэрээндэ харюусаба.

²⁷ Тиигэхэдэнь тэрэ эхэнэрынь: – Зүб даа, Эзэн! Теэд эзэдэй шэрээһээ унаһан бутархай нохойнуудшье эдидэг бшуу, – гэжэ урдаһаань хэлэбэ.

²⁸ Тиихэдэнь Иисүүс тэрээндэ: – Ай, эхэнэр! Шинии һүзэг ехэ байна! Һанаһан хүсэһэн юумэншни бүтэхэ! – гэжэ харюусаба. Эгээл тэрэ үедэ эхэнэрэй басаганиинь эдэгэшэбэ.

Иисүүс олон зониие эдэгээбэ

²⁹ Тэндэһээ Иисүүс Галилей далайн шадар ерэбэ. Һүүлдэнь нэгэ гүбээ дээрэ гаража һууба.

³⁰ Тэрээндэ олон зон ерэжэ байгаа. Дохолон, һохор, хэлэгүй, бэртэһэн, мүн бусадшье элдэб янзын үбшэнтэй зониие Иисүүстэ асаржа, хүлэйнь дэргэдэ һуулгаба. Тэдэ үбшэн зониие Иисүүс бултыень эдэгээбэ.

³¹ Тиин хэлэгүй байһан зоной хэлэхые, бэртэһэн хүнүүдэй эдэгэхые, дохолонуудай ябахые, һохорнуудай хараатай болоһые хараһан зон аргагүй ехээр гайхаа бэлэй. Тиигээд Израилиин Бурханда алдар соло дуудаа һэн.

Иисүүс дүрбэ мянган хүниие садхааба

³² Иисүүс шабинараа дуудажа: – Би эдэ зониие хайрланаб. Тэдэ Намтай гурбан үдэр байлсаа, теэд мүнөө эдихэ юумэгүй болоод байна. Эдэниие үлэн хооһоор табиха дурагүй байнаб. Гэртээ бусаха замдаа эдэ һуларжа ядархал, – гэбэ.

³³ Теэд шабинарынь: – Теэд эзэгүй хооһон энэ газарта эдэ олон зониие бултыень садхааха хилээмэ бидэ хаанаһаа абахабибди? – гэжэ урдаһаань һураба.

³⁴ – Таанадта хэды шэнээн хилээмэ байнаб? – гэжэ Иисүүсэй һурахада, тэдэнь: – Долоон хилээмэн, хэдэхэн загаһан бии, – гэжэ харюусаба.

³⁵ Иисүүс улад зониие һуухыень захирба.

³⁶ Тиигээд байгаа долоон хилээмэ, загаһа абажа, Бурханда баяр баясхалан хүргэбэ, тэдэнииень хухалан, шабинартаа үгэбэ, шабинарынь улад зондо дам тараажа үгөө һэн.

³⁷ Хүн бүхэн дураараа эдижэ садаад, үшөө тиихэдэ эдеэнэй үлөөдэһэн долоон түрсүүгээр дүүрэн болоо.

³⁸ Эхэнэрнүүдһээ, үхибүүдһээ гадна дүрбэн мянган эрэшүүл эдеэлжэ садаһан байгаа.

³⁹ Иисүүс улад зониие табяад, онгосодо һуужа, далайгаар тамаран, Магаддаан хотын шадархи газар дайдада хүрэжэ ерэбэ.