Матвей 14 - Библи

¹ Тэрэ үедэ Галилей можын Ирод захирагша Иисүүс тухай һураг дуулаад:

² – Энэ Уһаар Арюудхагша Иоанн байна. Тэрэ амидыраа, тиимэһээл гайхамшагта хэрэгүүдые бүтээнэ, – гэжэ албатандаа хэлэбэ.

³ Урдань Ирод Филипп дүүгэйнгээ Иродиада һамганһаа боложо Иоанные барижа хүлеэд, түрмэдэ хаахыень захирһан байгаа.

⁴ Юундэб гэхэдэ, Иоанн: «Ши Иродиадатай һууха ёһогүйш», – гэжэ Иродтэ хэлэһэн байгаа.

⁵ Ирод Иоанные алахаяа һанабашье, улад зонһоо айгаа, шалтагааниинь гэхэдэ, Иоанн лүндэншэн гэжэ тоологдодог байгаа.

⁶ Иродэй түрэһэн үдэрэй найрта Иродиадын басаганиинь айлшадай урда хатаржа, Иродтэ ехээр һайшаагдаба.

⁷ Тиимэһээ басаганай ямаршье эриһэн юумые үгэхэб гэжэ Ирод амалба.

⁸ Эхынгээ һургаһан ёһоор басаган: – Мүнөө эндэ Уһаар Арюудхагша Иоаннай толгойе табаг дээрэ табяад намда үгэ! – гэжэ хэлэбэ.

⁹ Тиихэдэнь Ирод хаан һанаата болобошье, бүхы айлшадай урда үгөө үгэһэн тула басаганай хүсэл дүүргэгты гэжэ захирба.

¹⁰ Тиимэһээ түрмэ соо Иоаннай толгойе таһа сабшаба.

¹¹ Тиигээд толгойень табаг дээрэ табяад, басаганда асараа, тэрэнь эхэдээ абаашажа үгөө.

¹² Иоаннай шабинарынь шарилыень абажа хүдөөлүүлээ бэлэй. Тиигээд энээн тухай Иисүүстэ ошожо дуулгаа һэн.

Иисүүс таба мянган хүниие садхааба

¹³ Иисүүс Иоанн тухай дуулаад, байһан газарһаа гансаараа онгосоор тамаржа эзэгүй зэлүүд газарта ошобо. Энээн тухай улад зон дуулаад, тура хотонуудһаа гаража, хойноһоонь ябагаар ошобо.

¹⁴ Иисүүс онгосоһоо буухадаа олон зоной сугларһые хараад, тэдэниие хайрлан, үбшэнтэнииень аргалжа эдэгээбэ.

¹⁵ Үдэшэ болоходо, шабинарынь Иисүүстэ ерэжэ: – Энэ эзэгүй газар байна, тиигээдшье орой болоо. Хүдөө тосхонуудта ошожо, эдихэ юумэ худалдажа абахыень сугларһан зониие табиит, – гэбэ.

¹⁶ Зүгөөр Иисүүс тэдэндэ: – Улад зоной ошоһоной хэрэггүй, таанад тэдэндэ эдихэ юумэ үгэгты, – гэжэ хэлэбэ.

¹⁷ Тиихэдэнь шабинарынь: – Бидэ оройдоол табахан монсогор хилээмэтэй, хоёр загаһатай байнабди, – гэжэ харюусаба.

¹⁸ – Тэдэнээ иишэнь Намда абажа ерэгты, – гэжэ Иисүүс хэлэбэ.

¹⁹ Тэрэ улад зондо ногоон дээрэ һуухыень дурадхаба. Тиигээд табан хилээмэ, хоёр загаһа абажа, тэнгэри өөдэ шэртэн, Бурханда баяр баясхалан хүргэбэ. Удаань хилээмэ хухалжа, шабинартаа үгэбэ, тэдэнь улад зондо дам тарааба.

²⁰ Хүнүүд булта эдеэлжэ садаа. Үлөөдэһыень суглуулхадань, арбан хоёр түрсүүг болоо һэн.

²¹ Эхэнэрнүүдһээ, үхибүүдһээ гадна тэндэ табан мянга шахуу эрэшүүл эдеэлһэн байба.

Иисүүсэй уһан дээгүүр ябалга

²² Тиигээд Иисүүс шабинараа онгосодо һуулгажа, нуурай нүгөө бэедэ өөрһөөнь түрүүлэн тамархыень захирба. Харин өөрөө улад зоной таратар үлөө һэн.

²³ Зоной тарахада, Иисүүс гансаараа хада өөдөө зальбархаяа гараба. Үдэшэндөөшье Тэрэ тэндэ гансаараа байгаа.

²⁴ Эгээл тэрэ үедэ шабинарайнь тамаржа байһан онгосо далайн тэгэндэ хүрөөд, урдаһаань һалхинай үлеэхэдэ, долгиндо сохюулжа байба.

²⁵ Үүр сайхын урдахана Иисүүс далайн уһан дээгүүр ябаад, шабинартаа ошоо.

²⁶ Шабинарынь тэрэнэй уһан дээгүүр ябаһыень хараад, ехээр мэгдэжэ: – Энэ хии үзэгдэл, – гэжэ айһандаа хашхаралдаба.

²⁷ Зүгөөр Иисүүс тэдэндэ: – Зоригтой байгты. Энэ Биб, бү айгты, – гэбэ.

²⁸ Пётр тэрээндэ: – Эзэн аа, хэрбээ энэ үнэхөөрөө Та юм һаа, намайе уһан дээгүүр ябаад, Танда ерэхыемни захирыт, – гэбэ.

²⁹ Тиихэдэнь Иисүүс: – Ерэ, – гэбэ. Пётр онгосоһоо гараад, багшынгаа урдаһаа уһан дээгүүр ябаба.

³⁰ Теэд шанга һалхинай үлеэхэдэ айгаад, уһанда шэнгэжэ эхилбэ. – Эзэн! Намайе абарыт, – гэжэ тэрэ хашхарба.

³¹ Иисүүс тэрэ дороо гараа һарбайжа, Пётрые дүнгэн баряад: – Ямар бирагүй һүзэгтэйбши! Юундэ һэжэглэбэш? – гэбэ.

³² Тэдэ хоёрой онгосодо һуухатайнь сасуу һалхин намдаба.

³³ Онгосодо байһан шабинарынь Иисүүстэ мүргэжэ: – Та үнэхөөрөөл Бурханай Хүбүүн байнат, – гэлдэбэ.

Иисүүс Гэннэсарээдтэ үбшэнтэниие эдэгээбэ

³⁴ Иисүүс шабинартайгаа далай гаталжа, Гэннэсарээдэй газарта хүрэжэ ерэбэ.

³⁵ Тэндэхи зон Иисүүсые таняад, бүхы оршон тойронхи газарта хүнүүдые эльгээжэ, хамаг үбшэнтэниие Тэрээндэ асаржа байгаа.

³⁶ Хубсаһандатнай халташье хүрэхые зүбшөөгыт даа гэжэ тэдэ Иисүүсые гуйба. Тиин хубсаһандань гараараа хүрөөд абаһан бүхы хүнүүд эдэгэшэдэг бэлэй.