Матвей 12 - Библи

¹ Нэгэ субботын үдэр Иисүүс шабинартайгаа таряалангаар ябаба. Шабинарынь гэдэһэ үлдөөд ябаһан дээрэһээ таряанай залаа таһалан эдижэ байгаа.

² Фарисейнүүд энээниие хараад: – Үгы, харыт, шабинартнай субботодо хэжэ болохогүй юумэ хэнэл, – гэжэ Иисүүстэ хэлэбэ.

³ Тиихэдэнь Иисүүс тэдэндэ иигэжэ харюусаба: – Давид хаанай хамта ябалсагшадтайгаа үлэсхэлэн ябахадаа юу хэһэн тухайнь таанар уншаагүй аалта?

⁴ Давид Бурханай гэртэ ороод, хамта ябаһан хүнүүдтэйгээ үргэлэй хилээмэ абажа эдеэ һэн. Харин Хуулиин ёһоор Давидшье, тэрээнтэй хамта ябалсагшадшье тэрэ хилээмэ эдихэ ёһогүй байгаа, гансал санаартан тэрэниие эдихэ эрхэтэй бэлэй.

⁵ Мүн суббото бүхэндэ Һүмэ соо алба хэжэ байһан санаартан субботын үдэрэй тогтоол эбдэнэ гэжэ Моисейн Хуули соо хэлэгдэһые таанар уншаагүй аалта? Тиигэһэншье мүртөө тэдэнэр зэмэгүй гээшэ гү?

⁶ Зүгөөр Һүмэдэ ороходоо агууехэ юумэн эндэ байна гэжэ танда хэлэнэб.

⁷ Хэрбээ таанар: «Намда тахил тахихын орондо бусад зондо үршөөл хайратай байхыетнай хүсэнэб» гэжэ Нангин Бэшэг соо хэлэгдэһэн үгын үнэн удха мэдэжэ байбал, зэмэгүй зониие буруушаахагүй һэнта.

⁸ Ушарынь хэлэбэл, Хүн түрэлхитэнэй Хүбүүн субботыншье Эзэн мүн.

Хатаһан гартай хүн тухай

⁹ Иисүүс тэндэһээ ябажа, мүргэлэй гэртэ оробо.

¹⁰ Тэндэнь нэгэ хатаһан гартай хүн байба. Буруу юумэ хэһэнэйнь түлөө Иисүүсые зэмэлхэ һанаатайшуул тэрээнһээ: – Субботодо хүниие эмшэлхэнь зүб гү? – гэжэ һураба.

¹¹ Иисүүс тэдэндэ иигэжэ харюусаба: – Танай хэнтнай нэгэ хонитой аад, тэрэнэйнгээ субботын үдэр гүнзэгы нүхэ руу унашабалынь, тэрэнээ дээшэнь татажа гаргахагүйб?

¹² Тиихэдэ хүн гээшэмнай хониндо ороходоо бүри үнэ сэнтэй юм. Тиимэһээ субботын үдэр һайн юумэ бүтээхэнь зүб даа.

¹³ Тиигээд Иисүүс нүгөө хатаһан гартай хүндэ: – Гараа һарбай, – гэбэ. Тэрэнь гараа һарбайба; тиин хатаһан гарынь нүгөө гартайгаа адли һайн болошобо.

¹⁴ Харин фарисейнүүд мүргэлэй гэрһээ гаража ошоод, Иисүүсые яажа алаха тухай зүбшэн хэлсэбэ.

Шэлэгдэжэ абтаһан Бурханай зараса

¹⁵ Зүгөөр Иисүүс тэдэнэй хэлсээн тухай мэдээд, тэндэһээ гаража ошобо. Хойноһоонь олон зон дахажа ябаба. Иисүүс үбшэн хабшантай байһан зониие бултыень эмшэлэн эдэгээгээд,

¹⁶ Бурханай табисуурта байһыемни нэгэшье хүндэ бү мэдүүлэгты гэжэ улад зондо захирба.

¹⁷ Иигэжэл лүндэншэ Исайгаар дамжуулан Бурханай найдуулһаниинь бүтэбэ даа:

¹⁸ «Энэ болбол Минии шэлэжэ абаһан зараса, сэдьхэлдэмни таарама инаг хайрата Хүбүүмни гээшэ. Арюун Һүлдэеэ тэрээндэ хайрлахаб, Тэрэ бүхы арадуудта Зарга шүүбэри тухаймни айладхаха.

¹⁹ Тэрэ арсалдахагүй, хашхархагүй, гудамжануудта шангаар хүрхирхэгүй,

²⁰ хухарһан хулһые таһа татахагүй, залиржа байһан дэн унтараахагүй. Үнэн зүб зарга шүүбэри илалтада хүргэхэ,

²¹ тиин бүхы арадууд Тэрээндэ найдажа байха».

Иисүүс ба шолмос тухай

²² Нэгэтэ хүнүүд ада шүдхэртэ барюулһан дээрэһээ һохор, хэлэ амагүй хүниие Иисүүстэ асарба. Иисүүс тэрэ хүниие эдэгээбэ: тэрэ юумэ хэлэдэг, харадаг болобо.

²³ Тиихэдэнь хамаг зон гайхажа: – Энэмнай найдуулагдаһан Давидай үри һадаһан бэшэ гү? – гэлсэбэ.

²⁴ Теэд фарисейнүүд энээниие дуулаад: – Энэтнай Бээлзэбүүлэй, ада шүдхэрнүүдэй ноёной хүсөөр лэ ада шүдхэрнүүдые дарана, – гэжэ хэлэбэ.

²⁵ Тэдэ фарисейнүүдэй һанал бодол мэдэжэ байһан Иисүүс тэдээндэ иигэжэ хэлэбэ: – Хэдэн бүлэг боложо хубааралдаад, хоорондоо хёморолдоһон алишье хаан орон хооһорон, бутаран һалаха. Баһа хоорондоо хубааралдажа хёморолдоһон алишье хото, үгы һаа гэр бүлэ мүн лэ бутаран һалаха.

²⁶ Хэрбээ шолмосой хаан оронойхин хоорондоо хубааралдаад, хёморолдожо барисалдажа байбал, хаан орониинь хэр удаан тогтоборитой бүтэн байхаб?

²⁷ Хэрбээ Би танай хэлэһэн ёһоор Бээлзэбүүлэй хүсөөр ада шүдхэрнүүдые хүнэй бэеһээ зайлуулдаг байбал, танай шабинар хэнэй хүсөөр тэдэниие намнажа гаргадаг гээшэб? Шабинарайтнай хэжэ байһан хэрэгүүд буруу байһыетнай баталха.

²⁸ Хэрбээ Бурханай Арюун Һүлдөөр ада шүдхэрнүүдые дарадаг һаамни, тэрэ Бурханай хаан түрын эндэтнай тогтоод байһые баталха.

²⁹ Ямар хүн бар хүсэтэй хүнэй гэртэ ороод, түрүүн эзэнииень хүлижэ уяагүй һаа, эд зөөрииень тоножо гаргахаб? Эзэнииень хүлиһэн хойноол гэр барааень дээрмэдэхэ бшуу.

³⁰ Минии тала баряагүй хүн Намда эсэргүү гээшэ. Намтай хамта ургаса суглуулаагүй хүн тэрэ ургасые үрижэ һалгаана гээшэ.

³¹ Тиимэһээл Би таанарта иигэжэ хэлэхэ байнаб: ямаршье харата үгэ хэлэһэн, али нүгэлтэ хэрэг үйлэдэһэн хүн бүхэн хүлисэгдэхэ; харин Арюун Һүлдые хараажа муушалһан хүн хүлисэгдэхэгүй.

³² Тиихэдэ Хүн түрэлхитэнэй Хүбүүндэ харша юумэ хэлэһэн хүн бүхэн хүлисэгдэхэ; харин Арюун Һүлдэдэ харша юумэ хэлэһэн хүн энэшье наһандаа, мүн хэтэ заяандаашье хүлисэгдэхэгүй.

Модон ба тэрэнэй үрэ жэмэс тухай

³³ Һайн модон һайн үрэ жэмэс үгэдэг, муу модон муу үрэ жэмэс асардаг. Модоной шанарынь тэрэнэй үрэ жэмэсээрнь танигдадаг юм.

³⁴ Ай, хорото могойн түрэлтэн! Таанар хара һанаатайшуул аад, һайн юумэ яажа хэлэхэбта? Ушарынь юуб гэбэл, зүрхэ сэдьхэлдэ байһан юумэн хэлэнэй үзүүртэ гарадаг ха юм.

³⁵ Һайн хүн үнэтэ баялиг сооһоо һайнииень гаргадаг, харин хара һанаатай хүн харата дорой суглуулбариһаа мууень гаргадаг.

³⁶ Зарга шүүбэриин болохо Үдэр таанад хэзээшьеб дэмы шашаһан үгэ бүхэнэйнгөө түлөө тоосоо хэжэ харюусахат гэжэ таанарта баталан хэлэнэб.

³⁷ Тиигэжэ таанад өөһэдынгөө үгэнүүдһээ боложо зүбтэнэй тоодо гү, али үгы һаа, буруутаһан зэмэтэнэй тоодо орохот.

Гайхамшагта дүлгэ тэмдэг харуулха тухай эрилтэ табина

³⁸ Тиигээд зарим Хуули заадаг багшанар болон фарисейнүүд: – Багша аа! Манда нэгэ гайхамшагта дүлгэ тэмдэг үзүүлхыетнай хүсэнэбди, – гэбэ.

³⁹ Тиихэдэнь Иисүүс тэдэндэ харюусаба: – Харата муухай, забхай оршон үеын зон, гайхамшагта дүлгэ тэмдэг харахаяа һанаба гүт? Теэд Иона лүндэншэтэй ушарһан гайхамшагта дүлгэ тэмдэгһээ ондоо дүлгэ тэмдэг таанадта үгтэхэгүй.

⁴⁰ Яажа Иона халим загаһанай гэдэһэн дотор гурбан үдэр, гурбан һүни үнгэргөө һэм, тон тиигэжэл Хүн түрэлхитэнэй Хүбүүн гурбан үдэр, гурбан һүни соо газарай гүндэ оршохо.

⁴¹ Зарга Шүүбэри болохо Үдэр Нинэвээ хотынхид тус үеынхидтэй бодожо, таанадые буруушааха. Ионын номнол шагнаад, тэдэнэр нүгэлһөөн зайлажа, Бурханда хандаһан байгаа бшуу. Теэд эндэ байгаашань Ионаһоо бүри шухала нэгэн байна гэжэ таанадта хэлэнэб.

⁴² Зарга шүүбэриин болохо Үдэр Урда зүгэй хатан бодожо, таанадые буруушаан гэмнэхэ. Тэрэ хатан Соломоон хаанай сэсэн үгые шагнахаяа газарай мухарһаа ерэһэн байгаа бшуу. Теэд мүнөө эндэ Соломоонһоо бүри шухала нэгэн байна.

Хорото ада шүдхэрэй бусажа ерэһэн тухай

⁴³ Хүнэй бэеһээ гараһан ада шүдхэр уһагүй сүл губяар тэнэжэ, амар заяа бэдэрээд, олохогүйдөө:

⁴⁴ «Байһан гэртээ бусахам даа», – гэдэг. Бусажа ерэхэдэнь, гэрынь эзэлэгдээгүй, хамагдаһан, сэбэрлэгдэһэн байдаг.

⁴⁵ Тиигээд тэрэ ада шүдхэр өөрһөөн һураггүй хоротой ондоо долоон ада шүдхэрые абажа ерэдэг. Тэдэнь үнөөхи гэртэнь орожо байрладаг. Тиигэхэдэнь тэрэ хүниинь урдынхидаа орходоо бүри ехээр тамаа үзэдэг. Тон энээндэл адляар энэ оршон үеын зон иимэ дорой байдалтай болохо, – гэжэ Иисүүс хэлэбэ.

Иисүүсэй эжы ба аха дүүнэрынь

⁴⁶ Иисүүсэй иимэ мэтээр улад зониие һургажа байха үедэнь Тэрэнэй эжы, дүүнэрынь Тэрээнтэеэ хөөрэлдэхэ һанаатай ерээд, гэрэй газаа зогсобо.

⁴⁷ Тиимэһээ нэгэ хүн Иисүүстэ: – Харыт даа, эжытнай, дүүнэртнай газаа зогсоно. Тантайгаа хөөрэлдэхэ һанаатай байна, – гэбэ.

⁴⁸ Иисүүс тэрэ хэлэһэн хүндэ: – Эжымни хэн бэ, аха дүүнэрни хэд бэ? – гэжэ хэлэбэ.

⁴⁹ Тиигээд шабинар тээшээ гараараа заагаад: – Хара даа, эжымни, аха дүүнэрни эдэ гээшэ.

⁵⁰ Огторгойдо оршодог Эсэгымни эрхэ хүсэл бүтээгшэд Минии аха дүүнэр, эгэшэ дүүнэр, эжымни гээшэ, – гэбэ.