Матвей 11 - Библи

¹ Арбан хоёр шабинартаа эдэ заабаринуудые үгэһэн хойноо Иисүүс тэрэ газарһаа хүдэлжэ, улад зониие хото турануудаар ябажа һургаба.

² Түрмэдэ хаалтатай Уһаар Арюудхагша Иоанн Христоосой бүтээжэ байһан хэрэгүүд тухай дуулаад, хоёр шабинараа

³ иигэжэ асуухыень тэрээндэ эльгээбэ: – Ерэхэ ёһотойнь Та гээшэ гүт, али бидэ ондоое хүлеэхэ ёһотой гүбди?

^4-5 Тиихэдэнь Иисүүс тэдэндэ иигэжэ харюусаба: – Һохор хүнүүдэй дахин харадаг болоһые, дохолон хүнүүдэй ябадаг болоһые, арһанай халдабарита үбшэнтэй хүнүүдэй арюудхагдаһые, дүлии хүнүүдэй һонор болоһые, үхэһэн хүнүүдэй үндын бодоһые, үгытэй хүнүүдэй Бурханай хаан түрэ тухай номнол дуулаһые, хаража байһанаа, мүн дуулажа байһанаа Иоаннда ошожо хэлэгты.

⁶ Нам тушаа һэжэг түрөөгүй хүн жаргалтай юм.

⁷ Иоаннай шабинарай ябахадань, Иисүүс Иоанн тухай улад зондо иигэжэ хэлэбэ: – Иоаннда сүл губи руу ошоходоо, ямархан юумэ харахаяа найдаабта? Һалхинда найгалзажа байһан хулһа харахаяа гү?

⁸ Таанар юу үзэхэеэ тиишэ ошообта? Зөөлэн хубсаһа үмдөөд ябаһан хүниие гү? Теэд зөөлэн хубсаһа үмдөөд ябадаг хүнүүд хаанай үргөөдэ ажаһуунал.

⁹ Таанар юу үзэхэеэ тиишэ ошообта? Лүндэншые гү? Тиимэ даа, тиихэдэ таанад лүндэншэһөө дээгүүр хүниие хараалта гэжэ таанарта хэлэнэб.

¹⁰ Иоанн тухай Нангин Бэшэг соо: «Шинии ябаха харгы бэлдэхыень Би түрүүндэшни Өөрынгөө Эльгээмэлые ябуулнаб гэжэ Бурхан хэлэнэ», – гээд бэшээтэй юм.

¹¹ Уһаар Арюудхагша Иоаннһаа агууехэ хүн эхын умайһаа түрөөгүй юм гэжэ баталан таанадта хэлэнэб. Тиимэшье һаа, Огторгойн хаан ороной мэдэлдэ һуугшадай эгээлэй багань тэрээнһээ агууехэ юм даа.

¹² Уһаар Арюудхагша Иоаннай мэдээсэлээ номноһон үдэрнүүдһээ эхилээд, мүнөөдэр болотор Огторгойн хаан орон һүр хүсэ нэмэнэ, тиин хүсэ шадал гаргаһан зон энээниие туйлана.

¹³ Иоаннай ажамидарха үе саг хүрэтэр юунэй болохо тухай лүндэншэдэй номууд соо болон Моисейн Хуули соо бүрин хэлэгдээтэй юм.

¹⁴ Хэрбээ таанад тэдэ номуудта этигэжэ байбал, мэдэгты: Иоанн болбол ерэхэ ёһотой гэжэ уридшалан хэлэгдэһэн Элияа гээшэ.

¹⁵ Шэхэтэй юм һаа, анхарагты!

¹⁶ Мүнөө, энэ оршон үеын зониие хэнтэй жэшэхэбиб? Эдэнэр газаа һууһан үхибүүдтэ адли. Нэгэ бүлэгынь нүгөө бүлэгтөө иигэжэ хашхарна:

¹⁷ «Бидэнэй жэмбүүрээр наадахада, таанар хатараагүйт. Бидэнэй гунигтай дуу дуулахада, таанар бархираагүйт».

¹⁸ Иоаннай ерээд, масагладаг, үзэмэй дараһан архи амсадаггүй байхадань, хүн бүхэн: «Ада шүдхэртэ барюулһан хүн» гэлсээ.

¹⁹ Хүн түрэлхитэнэй Хүбүүнэй ерээд, юумэ эдидэг, үзэмэй дараһан архи болгодог байхадань, хүн бүхэн: «Харагты даа! Энэтнай эдимэр, архиншан, алба татаашадай, нүгэл хэгшэдэй нүхэр» гэлсэбэ. Тиигэбэшье Бурханай сэсэн мэргэниинь хэрэгүүдэйнь үрэ дүнгөөр баталагдадаг юм.

Этигэл һүзэггүй хотонууд тухай

²⁰ Иисүүсэй гайхамшагта хэрэгүүдээ үлэмжэ олоор бүтээһэн хотонуудта зоной нүгэл үйлэдэхэеэ болижо, Бурханда хандахагүйдэнь, Иисүүс тэдэниие зэмэлэн хэлэбэ:

²¹ – Хоразиин хотынхид, таанад уй гашуудал үзэхэт! Бэтсаидаа хотынхид, таанад баһал уй гашуудал үзэхэт! Хэрбээ танай хотонуудта бүтээһэн гайхамшагта хэрэгүүдээ Тиир Сидоон хотонуудта үзүүлһэн байбални, тэдэ хотын зон үни гэһээр Бурханда хандаха һэн. Тэдэнэр хахархай хубсаһа үмдэжэ, тархи дээрээ үнэһэ адхажа, нүгэлнүүдээ гэмшэһэнээ баталха бэлэй.

²² Зарга шүүбэриин Үдэрэй болоходо Бурхан Тиир, Сидоон хотынхидто таанадта орходоо бүри үршөөл хайратайгаар хандаха гэжэ баталан хэлэнэб.

²³ Капернаум хотынхид, таанад огторгойдо алдаршаха һанаатай байна гүт? Таанад тамын оёорто унахат. Хэрбээ танай хотодо бүтээһэн гайхамшагта хэрэгүүдээ Содомдо харуулһан байбални, тэрэ хотынхид гэмээ наманшалаад, хотонь мүнөөшье хүрэтэр бүтэн байха бэлэй.

²⁴ Зарга шүүбэриин Үдэрэй болоходо, Бурхан Содом хотынхидто таанадта орходоо үлүү үршөөл хайратайгаар хандаха гэжэ танда баталан хэлэнэб.

Намда ерэжэ, һанаагаа амарагты

²⁵ Баһа тэрэ сагта Иисүүс иигэжэ хэлэбэ: – Газар тэнгэриин Эзэн, Эсэгэмни! Сэсэн мэргэн, эрдэм номтой зонһоо далдалан нюуһан юумэеэ эгээлэй юрын зондо нээжэ элирүүлһэнэйтнай түлөө Танда баяр баясхалан хүргэнэб.

²⁶ Зүб даа, Эсэгэмни! Та иимэл юумэнэй болохые хүсэжэ байгаа ха юмта.

²⁷ Бүхы юумые Эсэгэмни Намда үгөө. Эсэгэһээ ондоо хэншье Хүбүүе мэдэхэгүй, мүн Хүбүүнһээ, баһа Хүбүүнэй дуулгаһан хүнүүдһээ ондоо хэншье Эсэгые мэдэхэгүй.

²⁸ Хүшэр хүндэ ашаанда даруулжа ядарһан зон булта Намда ерэгты, Би танай һанаа амаруулхаб.

²⁹ Минии хазаар абажа өөһэдыгөө хазаарлагты, Намһаа һуража абагты, ушарынь юуб гэбэл, Би даруу, номгон сэдьхэлтэйб, тиин таанад һанаагаа амархат.

³⁰ Минии таанадта үгэхэ хазаар хашар бэшэ юм даа, таанадта ашаха ашаан хүнгэн юм даа.