Матвей 1 - Библи

¹ Абраһаамай үри һадаһан болохо Давидай үри һадаһан Иисүүс Христоосой уг гарбалынь иимэ:

² Абраһаам болбол Исаагай эсэгэ, Исаак – Яковай эсэгэ, Яков – Иудын ба тэрэнэй аха дүүнэрэй эсэгэ байгаа.

³ Иуда болбол Тамаар гэдэг эхэнэрһээ Пээрэц Зээрах хоёр хүбүүтэй байгаа. Пээрэц – Хэцроон хүбүүтэй, Хэцроон – Араам гэдэг хүбүүтэй,

⁴ Араам – Амминадааб хүбүүтэй, Амминадааб – Нахшоон хүбүүтэй, Нахшоон – Салмоон хүбүүтэй байгаа.

⁵ Салмоон болбол Рахааб гэдэг эхэнэрһээ Бооһаз хүбүүтэй болоо. Бооһаз Рүүт хоёрһоо Обээд хүбүүн түрөө. Обээдһээ Ишай хүбүүн түрөө.

^6-11 Ишайн уг тэрэнэй хүбүүн Давид хаан залгамжалаа. Давидай сагһаа эхилээд, Вавилоон руу сүлэгдэһэн саг хүрэтэр Иисүүсэй элинсэг үбгэ эсэгэнэрынь иимэ: Давидай уг Соломоон залгамжалаа. Соломооной эхэнь түрүүн Урияа гэдэг хүнэй һамганиинь һэн. Соломоонһоо Рэхобаам хүбүүн, Рэхобаамһаа – Абияа, Абияаһаа – Асаа, Асааһаа – Ёшапаат, Ёшапаадһаа – Иораам, Иораамһаа – Уззияа, Уззияаһаа – Ётаам, Ётаамһаа – Ахааз, Ахаазһаа – Хэзэкияа, Хэзэкияаһаа – Мэнашшээ, Мэнашшээһээ – Аммоон, Аммоонһоо – Ёшияа түрөө. Ёшияаһаа Ехонияа болон тэрэнэй аха дүүнэрынь түрэһэн юм.

¹² Вавилоон руу хүсөөр нүүлгэгдэһэнһэйнь хойшо Ехонияаһаа Шалтиээл гараа, Шалтиээлһээ Зэрубабээл,

¹³ Зэрубабээлһээ – Абиһууд, Абиһуудһаа – Элиакиим, Элиакиимһаа – Азоор,

¹⁴ Азоорһоо – Цадоок, Цадоокһоо – Ахиим, Ахиимһаа – Элиһүүд,

¹⁵ Элиһүүдһээ – Эльазаар, Эльазаарһаа – Маттаан, Маттаанһаа – Яков,

¹⁶ Яковһаа Мариятай һууһан Иосиф түрөө. Марияһаа Бурханай табисуурта гэжэ алдаршаһан Иисүүс хүбүүн түрөө.

¹⁷ Иигээд, Абраһаамһаа Давид хүрэтэр арбан дүрбэн үе болоно. Мүн Давидһаа эхилээд, Вавилоондо нүүлгэгдэһэн саг болотор арбан дүрбэн үе, Вавилоондо нүүлгэгдэһэнһээ хойшо Бурханай табисууртын түрэтэр баһал арбан дүрбэн үе болоно.

Иисүүсэй түрэһэн тухай

¹⁸ Бурханай табисуурта Иисүүс Христоосой түрэһэн түүхэ иимэ: Мария эжынь хадагаа табиһан Иосиф нүхэртэйгөө гэрлэхынгээ урда Арюун Һүлдэһөө хээлитэй болоһоноо мэдэрбэ.

¹⁹ Мариягай Иосиф нүхэрынь үнэн шударга хүн байжа, зоной урда басаганай нэрэ муугаар хэлүүлэн бузарлахагүйн тула түрэ хуримаа шэмээгүйхэн болюулха гэжэ шиидэбэ.

²⁰ Тиигэжэ бодоод, Иосифой дууран хэбтэхэдэнь, Бурханай Эльгээмэл зүүдэндэнь үзэгдөөд, иигэжэ хэлэбэ: – Давидай үри һадаһан Иосиф, Мариягай түрэхэ хүбүүн Арюун Һүлдэһөө бүрилдэһэн юм. Тиимэһээ ши тэрэниие һамган болгожо абахаяа бү ай.

²¹ Тэрэшни хүбүү түрэхэ, Тэрээндэ Иисүүс гэжэ нэрэ үгэхэш, юундэб гэбэл, Тэрэ арад зоноо нүгэл хилэнсэгһээ абарха.

²² Тиигэжэл Эзэнэй лүндэншөөрөө иигэжэ дамжуулжа айладхаһаниинь бүтэбэ даа:

²³ «Басаган хээлитэй болоод, хүбүү түрэхэ, Тэрээниие Эммануил гэжэ нэрлэхэ», энэ нэрэнь Бурхан бидэнтэй хамта гэһэн удхатай.

²⁴ Иосиф нойрһоо һэреэд, Бурханай Эльгээмэлэй захирһан ёһоор Мариятайгаа гэрлэжэ һууба.

²⁵ Хүбүүнэйнгээ түрэтэр Иосиф һамгантайгаа хамта унтаагүй һэн. Хүбүүндээ тэрэ Иисүүс гэжэ нэрэ үгөө һэн.