Марк 9 - Библи

¹ – Эндэ байгшадай зариманиинь һүр хүсэтэй Бурханай хаан түрэ үзөөгүйдөө үхэхэгүй гэжэ таанарта үнэниие хэлэнэб, – гэбэ Иисүүс.

Иисүүсэй бодото һүр хүсэн

² Зургаан хоногой үнгэрхэдэ, Иисүүс Пётрые, Яков Иоанн хоёр аха дүүнэрые абажа, үндэр хада өөдэ гараба. Тэндэ Иисүүс шабинарайнгаа урда эрид хубилба.

³ Хубсаһаниинь туяа мэтэ һаргама сагаан болоо, газар дэлхэй дээрэ ямаршье будаг тиигэжэ сагааруулжа шадахагүйл.

⁴ Иисүүстэй хөөрэлдэжэ байһан Моисей Элияа хоёр бии болобо.

⁵ Тиихэ зуура Пётр Иисүүстэ: – Рабби! Эндэ байхадамнай манда ямар һайн гээшэб. Гурбан майхан бодхоое: нэгыень Танда, нэгыень Моисейдэ, үшөө нэгыень Элияада, – гэбэ.

⁶ Пётр юушье хэлэһэнээ мэдэнгүй тиигэжэ хэлээ бшуу, юундэб гэхэдэ, шабинар ехээр айн һүрдэһэн байгаа.

⁷ Тиигэжэ байтарнь үүлэн бии боложо, тэдэниие хушаад, тэндэһээнь иимэ абяан дуулдаба: – Энэ Минии инаг хайрата Хүбүүмни юм, үгыень дуулажа байгты.

⁸ Шабинарайнь тойроод харан гэхэдэнь, Иисүүсһээ ондоо хэншье үгы байба.

⁹ Хадаһаа буужа ябахадаа Иисүүс шабинартаа: – Хүн түрэлхитэнэй Хүбүүнэй үхөөд амидыртар энэ үзэһэн хараһанаа хэндэшье бү хэлээрэйгты, – гэжэ захирба.

¹⁰ Шабинарынь энэ нюуса хадагалжа ябаа, теэд «үхөөд амидырхань» ямар удхатайб гэжэ бэе бэеһээн һурадаг байгаа.

¹¹ – Хуули заадаг багшанар юундэ Бурханай табисуурта Христоосой ерэхын урда тээ Элияа лүндэншэ ерэхэ ёһотой гэдэг бэ? – гэжэ шабинарынь Иисүүсһээ асууба.

¹² Иисүүс харюусаба: – Үнэхөөрөө Элияа түрүүн ерэжэ, бүхы юумэ бэлдэхэ ёһотой. Тиихэдээ юундэ Хүн түрэлхитэнэй Хүбүүн ехээр зобохо, Тэрээнһээ арсаха юм гэжэ Нангин Бэшэг соо хэлээтэй байдаг бэ?

¹³ Элияа ерээ, тиин Нангин Бэшэг соо хэлэгдэһэнэй ёһоор хүнүүд дура зоргоороо тэрээнтэй болоо гэжэ таанадта хэлэнэб.

Иисүүс досоогоо ада шүдхэртэй хүбүүе эдэгээбэ

¹⁴ Иисүүсэй гурбан шабинартайгаа хамта бусад шабинартаа ерэхэдэнь, тэдэнииень ехэ олон зон тойроод, Хуули заадаг багшанарай тэдээнтэйнь арсалдажа байхань харагдаба.

¹⁵ Иисүүсые харахадаа улад зон ехээр гайхалдажа, Тэрэниие мэндэшэлхэ гэжэ гүйлдэбэ.

¹⁶ – Таанад эдэнтэй юун тухай арсалданабта? – гэжэ Иисүүс шабинарһаа асууба.

¹⁷ Улад зоной дундаһаа нэгэ хүн харюусаба: – Багша, би Танда хүбүүгээ абажа ерээб. Тэрэнииемни ада шүдхэр дараад, хэлэгүй болгоод байна.

¹⁸ Ада шүдхэр добтолходоол хүбүүемни газараар мухарюулна, аманһаань хөөһэ бурана, шүдэнь хабирна, бэень хүшэлдэнэ. Тэрэ ада шүдхэрые намнажа үгыт гээд шабинарыетнай гуйхадамни, тэдэтнай оролдоод шадабагүй.

¹⁹ Иисүүс улад зондо хандан: – Этигэл һүзэггүй зон аа! Үшөө хэды шэнээн таанадтай байхабиб? Үшөө хэды болотор таанадые тэсэжэ тэбшэжэ байхабиб? Тэрэ хүбүүе Намда асарагты! – гэжэ хэлэбэ.

²⁰ Хүбүүе асарба. Иисүүсые харамсаараа ада шүдхэр хүбүүе таталзуулан һалагануулба. Хүбүүнэй аманһаа хөөһэ буран, тэрэ газараар мухариба.

²¹ – Үнинэй иимэ болоо һэн гү? – гэжэ Иисүүс хүбүүнэй эсэгэһээ һураба. Тэрэнь: – Багаһаал тиимэ һэн.

²² Ада шүдхэр хүбүүемни оло дахин галда, уһанда шэдээд, алахаяа забдаа. Маанадые хайрлажа, шадахал һаа, туһалыт даа! – гэжэ гуйба.

²³ – Юундэ «шадахал һаа» гэбэш? Этигэл һүзэгтэй һаашни, хүсэһэн лэ юумэншни бүтэхэ юм! – гэжэ Иисүүс харюусаба.

²⁴ Тиигэхэтэйнь сасуу хүбүүнэй эсэгэ: – Би этигэнэб! Бүри ехэ этигэл һүзэг хайрлан туһалыт! – гэжэ хашхарба.

²⁵ Улад зоной үшөө олоор сугларжа байхые харахадаа, Иисүүс ада шүдхэртэ захирба: – Хэлэгүй, дүлии ада шүдхэр! Би шамда захирнаб: энэ хүбүүнһээ гара, хойшодоо тэрээндэ бү оро!

²⁶ Ада шүдхэр хашхараад, хүбүүе ехээр һалагануулан, досооһоонь гараба. Хүбүүн үхэшэһэн шэнги байба, хүнүүд: – Тэрэ үхэшөө, – гэлдэбэ.

²⁷ Харин Иисүүс гарһаань баряад, хүл дээрээ бодоходонь туһалба.

²⁸ Һүүлдэ Иисүүсэй шабинартайгаа гэртээ ерээд, гансаараа байхадань, тэдэнь: – Яахадаа бидэ тэрэ ада шүдхэр даража шадаагүйбибди? – гэжэ асууба.

²⁹ – Иимэрхүү ада шүдхэрнүүдые имагтал зальбаралаар даража болохо юм, – гэжэ Иисүүс харюусаба.

Иисүүс дахин үхэхэ тухайгаа хэлэнэ

³⁰ Иисүүс шабинартайгаа тэндэһээ гараад, Галилейе үнгэржэ ябаба. Хаана ябаһанаа хүнүүдтэ мэдүүлхэгүй гэжэ Тэрэ оролдоо.

³¹ Ушарынь юуб гэбэл, Тэрэ шабинараа һургажа байгаа. – Хүн түрэлхитэнэй Хүбүүн хүнүүдэй гарта тушаагдахань, тиигээд Тэрэ алуулаад, гурбадахи үдэртөө амидырха, – гэжэ хэлэбэ.

³² Гэбэшье шабинарынь хэлэһэн үгэнүүдэйнь удха ойлгобогүй, тиин һурахаяашье зүрхэлбэгүй.

Эгээн ехэнь хэн гээшэб?

³³ Иисүүс шабинартайгаа гэртээ Капернаум хото ерэбэ. Гэртээ ороод Тэрэ: – Хэлэгты даа, таанад замдаа юун тухай арсалдаабта? – гэжэ шабинарһаа һураба.

³⁴ Хоорондоо хэмнай агууехэб гэжэ арсалдаһан байгаа, тиимэһээ багшынгаа урда шэмээгүй байба.

³⁵ Иисүүс һуугаад, арбан хоёр шабинараа дуудаад: – Хүндэтэй газарта һууха дуратай хүн һүүл хабида байха, бусадай зараса болохо, – гэбэ.

³⁶ Тиигээд Иисүүс нэгэ үхибүүе шабинарайнгаа дунда байлгаад, тэрэниие тэбэреэд хэлэбэ:

³⁷ – Минии нэрээр иимэ нэгэ үхибүүе тогтоожо абаһан хүн Намайе тогтоожо абаһан болоно. Тиихэдэ Намайе тогтоожо абаһан хүн Намайе иишэ эльгээһэн Бурханиие тогтоожо абана гээшэ.

Манда эсэргүүсээгүй зон манай талада юм

³⁸ – Багша, Танай нэрээр ада шүдхэрнүүдые дарадаг хүниие бидэ хараабди. Тэрэ хүн маанадаар суг ябалсаагүй, тиимэһээ бидэ тэрэниие хорёобди, – гэжэ Иоанн хэлэбэ.

³⁹ Иисүүс шабинартаа хэлэбэ: – Тэрэниие хорихо гэжэ бү оролдогты. Минии нэрээр гайхамшагта үйлэ бүтээһэн хүн тэрэ дороо Намайе муудхажа шадахагүй.

⁴⁰ Танда эсэргүүсээгүй хүн танай талада байна.

⁴¹ Бурханай табисууртын шабинар хадатнай таанадта аяга уһа хэжэ үгэһэн хүн өөрынгөө шагнал заабол абаха гэжэ Би баталнаб.

⁴² Зүгөөр Намда этигэгшэ эдэ багашуулай нэгыеньшье нүгэл хилэнсэдэ түлхиһэн хүн дээрэ аймшагтай хэһээлтэ бууха. Тэрэ хүнэй хүзүүндээ тээрмын шулуу уюулаад, далайн оёорто хаюулбалнь, тэрээндэ өөртэнь дээрэ байха һэн.

⁴³ Хэрбээ гарайшни шамайе нүгэлдэ оруулаа һаань, тэрэнээ таһа сабшаад хая. Хоёр гартайгаа залирдаггүй гал тамада орожо хосоронхаар, ганса гартайгаар мүнхын амидарал амсабалшни шамда дээрэ байха.

⁴⁵ Хэрбээ хүлэйшни шамайе нүгэлдэ оруулаа һаань, тэрэнээ таһа сабшаад хая. Хоёр хүлтэйгөө гал тамада орожо хосоронхаар, ганса хүлтэйгөө амиды ябаһан дээрэ.

⁴⁷ Хэрбээ нюдэнэйшни шамайе нүгэлдэ оруулаа һаань, тэрэнээ һуга тата. Хоёр нюдэтэйгөө гал тама руу хаюуланхаар, үрөөһэн нюдэтэйгөө Бурханай хаан түрэдэ ороболшни шамда дээрэ.

⁴⁸ Гал тама соо нүгэлтэдые эдидэг үтэ хорхойнууд хэзээшье үхэдэггүй, галыньшье залирдаггүй.

⁴⁹ Ямаршье тахил яажа дабһаар дабһалуулан арюудхагдадаг бэ, тон тиигэжэл хүн бүхэн галаар туршуулан арюудхагдаха.

⁵⁰ Дабһан болбол һайн юумэн гээшэ, теэд амтаяа гээгээ һаань, яажа дахин гашуун болгохобта? Таанад досоогоо дабһатай байгты, хоорондоо эбтэй эетэй ажамидарагты.