Марк 8 - Библи

¹ Дахин тэдэ үдэрнүүдтэ ехэ олон зон Иисүүсые тойроод сугларба. Зоной эдихэ юумэгүй болоходо, Иисүүс шабинараа дуудажа хэлэбэ:

² – Би эдэ зониие хайрланаб. Тэдэ Намтай гурбан үдэр байлсаа, теэд мүнөө эдихэ юумэгүй болоод байна.

³ Тэдэнэй зариманиинь холоһоо ерээ. Тиимэһээ үлэн хооһон гэртэнь табибални, тэдэ замдаа һуларжа ядаржа магадгүй.

⁴ – Теэд эзэгүй хооһон энэ газарта эдэ зониие бултыень садхааха хилээмэ хүн хаанаһаа олохоб? – гэжэ шабинарынь асууба.

⁵ – Таанадта хэды шэнээн хилээмэ байнаб? – гэбэ Иисүүс. – Долоон жэжэхэн монсогор хилээмэн байна, – гэлдэбэ шабинарынь.

⁶ Иисүүс улад зониие һуухыень захирба. Тиигээд байгаа долоон хилээмэ абаад, Бурханда баяр баясхалан хүргэбэ. Хилээмэеэ хухалан, хүн зондо хүртөөжэ хубаахыень шабинартаа үгэбэ. Шабинарынь хубааба.

⁷ Үшөө тэдэ хэдыхэн загаһатай һэн. Иисүүс тэдэнэй түлөө Бурханда баясхалан хүргөөд, тэрэ загаһа хубаажа үгэхыень шабинартаа захиба.

^8-9 Дүн хамтадаа дүрбэн мянган шахуу ганса эрэшүүл дураараа эдижэ садаа, үшөө тиихэдэ эдеэнэй үлөөдэһэн долоон түрсүүгээр дүүрэн суглараа. Иисүүс хүн зоноо тараагаад,

¹⁰ шабинартайгаа хамта онгосодо һуужа, Далманутаагай газар нютаг руу тамарба.

Тэнгэриһээ баталагдаһан гайхамшагта тэмдэг

¹¹ Хэдэн фарисейнүүд Иисүүстэ ерэжэ, үгөөр буляасалдаба. Тиигээд Тэрэниие туршахаяа һэдэжэ, тэнгэриһээ баталагдаһан гайхамшагта дүлгэ тэмдэг харуулыт даа гэбэ.

¹² Иисүүс хүндөөр һанаа алдажа: – Оршон үеын зон яахадаа гайхамшагта дүлгэ тэмдэг харуулхые шаарданаб? Зүб даа, ямаршье тиимэ юумэн тэдэ зондо харуулагдахагүй, – гэжэ хэлээ һэн.

¹³ Тиигэмсээрээ Тэрэ фарисейнүүдые орхёод, дахин онгосодоо һуугаад, далайн нүгөө эрье руу тамарба.

Фарисейнүүдэй ба Иродэй эһээбэри

¹⁴ Шабинарынь хилээмэ абахаяа мартаһан байба, тиимэһээ онгосодонь оройдоол гансахан монсогор хилээмэн байгаа.

¹⁵ – Һэргэг байгты! Фарисейнүүдэй, Иродэй эһээбэриһээ болгоомжолжо ябагты, – гэжэ Иисүүс шабинараа һэргылбэ.

¹⁶ – Маанадта хилээмэнэй үгы байһан дээрэһээ тиигэжэ хэлээ ёһотой, – гэжэ шабинарынь өөһэд хоорондоо тухайлба.

¹⁷ Юун тухай хэлсэжэ байһыень мэдээд, Иисүүс тэдэндээ хэлэбэ: – Таанар хилээмэ абаагүйбди гэжэ юундэ хоорондоо хэлсээбта? Мүнөө болотор мэдэбэ, ойлгобогүй гээшэ гүт? Ухаан бодолтнай тиимэ мунхаг байна гээшэ гү?

^18-19 Нюдэтэй байгаад, харанагүй гээшэ гүт? Шэхэтэй аад лэ, дууланагүй гээшэ гүт? Табахан монсогор хилээмэ табан мянган хүндэ хубаажа үгэхэдэмни, хэды түрсүүгээр дүүрэн үлөөдэһэ суглуулһанаа һананагүй аалта? – Арбан хоёр түрсүүг, – гэжэ шабинарынь харюусаба.

²⁰ – Тиигээд долоон хилээмэ дүрбэн мянган хүндэ хубаахадамни, хэды түрсүүгээр дүүрэн үлөөдэһэ суглуулаа һэмта? – гэжэ Иисүүс һураба. – Долоон түрсүүг, – гэжэ шабинарынь харюусаба.

²¹ – Теэд юун тухай хэлэһыемни мүнөөшье болотор ойлгоногүй гээшэ гүт? – гэжэ Иисүүс дахин һураба.

Бэтсаидаа хотодо Иисүүс һохор хүниие эмнэбэ

²² Иисүүсэй шабинартайгаа Бэтсаидаа хото ерэхэдэнь, хэдэн хүн тэрээндэ һохор хүниие хүтэлжэ асараад, адис хүртүүлэн эдэгээхыень гуйба.

²³ Иисүүс тэрэ һохор хүниие гарһаань барижа, тосхонһоо хүтэлэн гаргаба. Тиигээд нюдэндэнь нёлбоод, дээрэнь гараа табин адислаад: – Зай, юумэ харана гүш? – гэжэ һураба.

²⁴ Тэрэнь иишэ тиишээ хараад: – Хүнүүдые харанаб, теэд тэдэ тойроод ябаһан мододтол адли үзэгдэнэ, – гэжэ хэлэбэ.

²⁵ Иисүүс дахин нюдэндэнь гараараа хүрэбэ. Тиигэхэтэйнь сасуу үнөөхи хүн хараатай болобо; нюдэнь эдэгэжэ, тэрэ бүхы юумэ эли тодоор харадаг болобо.

²⁶ – Зай, ши гэртээ хари, тосхондо бү ороорой, – гэжэ захин, Иисүүс тэрэ хүниие ябуулба.

Иисүүс гээшэмнай хэн бэ?

²⁷ Иисүүс шабинартайгаа Филиппэй Кесари хотын хажуудахи тосхонуудта ошобо. – Хүнүүд Намайе хэн гэжэ һананаб? – гэжэ Иисүүс шабинарһаа замдаа ябахадаа асууба.

²⁸ – Зариманиинь Уһаар Арюудхагша Иоанн байнат, нүгөөдүүлынь Элияа гээшэт, үшөө бусадынь лүндэншэдэй нэгэниинь байнат гэжэ хэлсэнэ, – гээд шабинарынь харюусаба.

²⁹ – Теэд таанар Намайе хэн гэжэ һананабта? – гээд Иисүүс һураба. – Та Бурханай табисууртат, – гэжэ Пётр харюусаба.

³⁰ – Хэн байһан тухаймни хэндэшье ама бү гарагты, – гэжэ Иисүүс шабинартаа захирба.

Иисүүс зобохо, алуулха тухайгаа хэлэнэ

³¹ Иисүүс Өөртэйнь юу болохо тухай шабинартаа хөөрэжэ эхилбэ: – Хүн түрэлхитэнэй Хүбүүн аргагүй ехээр зобохо, ахамадууд, ахамад санаарта болон Хуули заадаг багшанар Тэрээнһээ арсаха. Тэрээниие алаха, теэд гурбадахи үдэртөө Тэрэ амидырха.

³² Тиигэжэ Иисүүс шабинартаа тон эли тодоор хэлэжэ байгаа. Тиимэһээ Пётр Тэрэниие хажуу тээшэнь дуудажа абаашаад, иигэжэ хэлэхэеэ болиит гэбэ.

³³ Харин Иисүүс шабинар тээшээ эрьен хараад, Пётрые зэмэлэн: – Холо боло Намһаа, сатана! Шинии һанал бодолнуудшни Бурханһаа үршөөгдэнэ бэшэ, харин хүн шанарһаашни бүрилдэнэ! – гэбэ.

³⁴ Удаань Иисүүс улад зониие, шабинараа дуудаад хэлэбэ: – Намтай ябалсаха дуратай хүн өөр тухайгаа бодохоёо болёод, үдэр бүхэн хэрээһэеэ үргэлөөд, хойноһоомни яба.

³⁵ Ушарынь хэлэбэл, ами наһаяа абарха һанаатай хүн тэрэнээ алдаха, харин Минии түлөө, мүн Һайн Мэдээсэлэй түлөө ами наһаяа үгэбэл, абарагдаха.

³⁶ Хэрбээ танай бүхы дэлхэйе олзолоод, ами һүнэһэеэ алдабалтнай, танда ашагтай гү? Үгыл даа!

³⁷ Таанад ямаршье юумэ түлөөд, ами һүнэһэеэ бусаажа шадахагүйлта.

³⁸ Хэрбээ забхай, нүгэлтэ энэ дэлхэйн зоной дунда байхадаа Намһаа, Минии һургаалһаа эшэбэлтнай, Хүн түрэлхитэнэй Хүбүүн Эсэгынгээ алдартай Бурханай Эльгээмэлнүүдтэй хамта ерэхэдээ, таанадһаа эшэхэл.