Марк 6 - Библи

¹ Тэндэһээ Иисүүс шабинартайгаа хамта түрэһэн хотодоо бусажа ерэбэ.

² Тэрэ суббото болоходо хүн зониие һургахаяа мүргэлэй гэртэ ошобо. Тэрэниие шагнаһан олон зон гайхалдажа: – Яажа эдэ бүхэниие Энэмнай бүтээнэ гээшэб? Иимэ гайхамшагта үйлэ хэрэгүүдые бүтээхэ сэсэн ухаан, хүсэ шадал Тэрээндэ хаанаһаа заяагдаа гээшэб?

³ Үгы, Энэмнай дархан бэшэ һэн гү? Мариягай хүбүүниинь, Яковай, Ёшияагай, Иудын, Симонэй ахань бэшэ һэн гү? Дүү басагадынь энэ хотодо маанадаар ажаһууна бэшэ аал? – гэлсэбэ. Тиигэжэ зон Тэрэнэй талаар һэжэглэбэ.

⁴ Харин Иисүүс тэдэндэ: – Лүндэншэдые нютагайхидһаань, түрэлхидһөөнь, гэр бүлэһөөнь бусад зон булта хүндэлжэ ябадаг юм, – гэжэ хэлэбэ.

⁵ Иимэл ушарһаа Иисүүс нютагтаа гайхамшагта хэрэгүүдые бүтээхэ аргагүй боложо, үсөөхэн лэ үбшэнтэниие адислан эдэгээбэ.

⁶ Иисүүс нютагайнгаа зоной этигэл һүзэггүй байхыень гайхан мэдэрбэ. Иисүүс оршон тойрон тосхонуудаар ябажа, зониие һургаба.

Иисүүс арбан хоёр элшэнэртээ захяа заабари үгэнэ

⁷ Тэрэ арбан хоёр шабинараа дуудаад, ада шүдхэрнүүдые дараха эрхэ засаг олгон, хоёр хоёроорнь иишэ тиишэнь эльгээбэ.

⁸ Тиигэхэ зуураа тэдэндээ иимэ захяа үгэбэ: – Замдаа гансал тулга таягтай гараарайгты. Эдихэ юумэшье, туулмаг сүүмхэшье, алта мүнгэшье абаад ябаха хэрэггүй.

⁹ Сандаали үмдөөд ябагты, һэлгэхэ хубсаһа абаад ябаха хэрэггүй.

¹⁰ Ямар нэгэн гэртэ уригдаһан байбал, хотоһоо гаража ошотороо тэрэл айлдаа байха ёһотойт.

¹¹ Хэрбээ ямар нэгэ нютагта таанадые угтажа абаха дурагүй гү, али хэлэһыетнай дуулаха дурагүй байбал, хүлдэтнай халдаһан тооһо һэжэрэн дурагүйлхэһэнөө мэдүүлээд, тэрэ нютагһаа гаража ошогты.

¹² Тиихэдэнь элшэнэр замда мордожо, нүгэлөө орхёод, Бурханда хандагты гэжэ хүн бүхэндэ номнобо.

¹³ Тэдэнэр ада шүдхэрнүүдые олоор гаргажа, үбшэн зониие олива тоһоор түрхеэд, эдэгээбэ.

Уһаар Арюудхагша Иоанн нүгшэбэ

¹⁴ Иисүүс тухай һураг хаа хаанагүй таража, Иродойшье һонорто хүрэбэ. Зарим хүнүүд: – Энэ Уһаар Арюудхагша Иоанн амидыраад, иимэ гайхамшагта хэрэгүүдые бүтээнэ, – гэлсэбэ.

¹⁵ Нүгөө зариман: – Энэ Элияа байна, – гэбэ. Үшөө нүгөөдүүлынь: – Эртэ урда үеын лүндэншэдтэл адли лүндэншэн хаш, – гэлсэбэ.

¹⁶ Харин Ирод энээн тухай дуулахадаа: – Энэ намда толгойгоо таһа сабшуулһан Иоанн амидыраа, – гэжэ хэлэбэ.

^17-18 Ушарынь хэлэбэл, Ирод Филипп дүүгэйнгээ Иродиада һамгатай һууһан байгаа. Тиихэдэнь Иоанн: – Ши дүүгэйнгээ һамгатай гэрлэхэ ёһогүйш, – гэжэ Иродтэ хэлээ һэн. Тиимэһээл Ирод Иродиадын һайшаалда хүртэхын тула Иоанные түрмэдэ һуулгаһан байгаа.

¹⁹ Иродиада Иоаннда ехээр хороо бусалжа, тэрэниие алахаяа һанаба, гансал Иродһээ боложо хүсэлөө бэелүүлхэ аргагүй байгаа.

²⁰ Иоаннай эрхим һайн, гэгээн хүн байһыень ойлгоод, Ирод тэрээнһээ айдаг, мүн хамгаалдаг бэлэй. Иоаннай хэлэһэн үгэнүүдэй һанааень зобоодогшье һаань, Ирод тэрэниие шагнаха дуратай байгаа, шагнадагшье һэн.

²¹ Одоошье Иродиадада таарамжатай саг тудаба. Ирод түрэһэн үдэртөө дашарамдуулан, бүхы түшэмэлнүүд, сэрэгэй дарганар, Галилейн нэрэ хүндэтэй хүнүүдые суглуулаад, ехэ найр хэбэ.

²² Тэндэ Иродиадын басаган хатаржа, Иродтэ, айлшадтань ехээр һайшаагдаба. Тиимэһээ Ирод тэрээндэ: – Дуратай юумэеэ эри, хүсэһэн лэ юумыешни үгэхэб! – гэбэ.

²³ – Эриһэн лэ юумыешни үгэхэб, хаан оронойнгоо хахадыеньшье үгэхэдэ бэлэнби, – гэжэ Ирод тангариглаһан байгаа.

²⁴ Басаган эжыдээ ошожо: – Юу эрихэбиб? – гэжэ һураба. – Уһаар Арюудхагша Иоаннай толгой эри, – гэжэ эхэнь харюусаба.

²⁵ Басаган һөөргөө хаанда түргэхэн ошожо: – Уһаар Арюудхагша Иоаннай толгой табаг дээрэ табяад, намда энэ гэһээр үгэхыешни хүсэнэб, – гэбэ.

²⁶ Ирод хаан һанаата болобошье, бүхы айлшадай урда үгөө үгэһэн тула басаганай хүсэл дүүргэнгүй байха аргагүй байба.

²⁷ Ирод тэрэ дороо харуулайнгаа сэрэгшэдэ түрмэдэ байһан Иоаннай толгой таһа сабшаад, абаад ерэхыень захирба.

²⁸ Тэрэ сэрэгшэнь Иоаннай толгойе табаг дээрэ табяад, басаганда асаржа үгэбэ, тэрэнииень басаган эхэдээ үгэбэ.

²⁹ Иоаннай шабинарынь энээниие дуулаад, бэеыень агы нүхэн хуурсагта абаашажа хүдөөлүүлбэ.

Иисүүс табан хилээмээр таба мянган хүниие садхааба

³⁰ Элшэнэр Иисүүстээ бусажа ерээд, юу хэһэнээ, улад зондо юу зааһанаа хөөрэбэ.

³¹ Ехэ олон зоной ерэжэ ошожол байһан хада Иисүүс элшэнэртэйгээ эдихэ уухашье сүлөөгүй байгаа. Тиимэһээ Тэрэ шабинартаа: – Эзэгүй газарта ошожо, нэгэ бага амарая, – гэжэ дурадхаба.

³² Тиигээд тэдэнэр онгосоор тамаржа эзэгүй зэлүүд газарта ошобо.

³³ Теэд олон зон тэдэнэй тамаржа ябахые хараад, хайшаа ошохыень багсаажа байгаа. Тиимэһээ элдэб хотын зон Иисүүсэй ба шабинарайнь урда гаража нуурай эрьеэр гүйлдэбэ.

³⁴ Иисүүс онгосоһоо буухадаа, тэндэ олон зоной сугларһые хараба, хонишонгүй хонидтол мэтэ байһан тэдэниие хайрлан, олон юумэнүүдтэ һургажа эхилбэ.

³⁵ Үдэшэ болоходо шабинарынь багшадаа ойртоод: – Мүнөө орой болошоо, энэ эзэгүй газар байна.

³⁶ Тиимэһээ хажуугаархи тосхон, отогуудаар ябажа, эдихэ юумэ худалдажа абахыень эдэ зоноо табиит даа, – гэбэ.

³⁷ – Таанад өөһэдөө эдэндэ эдихэ юумэ үгэгты, – гэжэ Иисүүс харюусаба. – Эдэ зониие эдеэлүүлхын тула хоёр зуун динари мүнгөөр хилээмэ худалдажа абахамнай гээшэ гү? – гэжэ шабинарынь гайхаба.

³⁸ – Хэды хилээмэтэй байнабта, хараад ерэгты, – гэбэ Иисүүс. Тэдэнь ошожо хараад: – Табан монсогор хилээмэтэй, хоёр багахан загаһатай байнабди, – гэжэ дуулгаба.

³⁹ Тиигэхэдэнь Иисүүс эдэ зоноо бүлэг бүлэгөөр хубаагаад, зүлгэ ногоон дээрэ һуулгагты гэжэ шабинартаа захирба.

⁴⁰ Хүн зон зуу зуугаар, али таби табяар хубааралдан, бүлэгүүд болон һуубад.

⁴¹ Тиигээд Иисүүс үнөөхи табан монсогор хилээмэеэ, хоёр загаһаяа абаад, тэнгэри өөдэ шэртэн, Бурханда баяр баясхалан хүргэбэ. Хилээмэеэ хухалан, хүн зондо хүртөөжэ хубаахыень шабинартаа үгэбэ. Удаань хоёр загаһаяа хухалжа, хүн зондо хүртүүлбэ.

⁴² Хүнүүд булта эдеэлжэ садаа.

⁴³ Тиигээд үлөөдэһыень суглуулхадань, арбан хоёр түрсүүгээр дүүрэн хилээмэнэй, загаһанай үлөөдэһэ сугларба.

⁴⁴ Хамта дээрээ эдеэлһэн зоной тоодо табан мянга шахуу ганса эрэшүүл байлсаа бшуу.

Иисүүс уһан дээгүүр ябана

⁴⁵ Тиигээд Иисүүс шабинараа онгосодо һуулгажа, нуурай нүгөө бэедэ оршоһон Бэтсаидаа хото руу Өөрһөөнь түрүүлэн тамархыень захирба. Харин Өөрөө улад зоной таратар үлөө бэлэй.

⁴⁶ Зоной тарахада Иисүүс хада өөдөө зальбархаяа гараба.

⁴⁷ Үдэшэ болоходо Тэрэ үнөөхи газартаал гансаараа байба, харин шабинарынь онгосоороо далайн тэгэндэ хүрэжэ байгаа.

⁴⁸ Урдаһаань үлеэһэн һалхинтай тулалдажа байһан шабинараа харахадаа, Иисүүс һүниин дүрбэдэхи харуулай үеэр уһан дээгүүр ябаад, шабинартаа ошобо.

⁴⁹ Тэрэнэй уһан дээгүүр ябаһыень хараһан шабинарынь сошожо, хии үзэгдэл гэжэ һанаад, айһандаа хашхаралдаба,

⁵⁰ ухаа алдаба. Зүгөөр Иисүүс тэдэндэ: – Зоригтой байгты. Энэ Биб, бү айгты, – гэбэ.

⁵¹ Тиигээд Иисүүсэй шабинарайнгаа онгосодо һуухатайнь сасуу һалхин намдаба. Харин шабинарынь гайхахын ехээр гайхаба.

⁵² Тэдэнэр хилээмэнтэй бүтээһэн гайхамшагта хэрэгэй үнэн удхые ойлгоогүй, ухаан бодолынь үшөөл баларшаг байгаа бшуу.

Иисүүс Гэннэсарээдэй газарта үбшэн зониие эдэгээнэ

⁵³ Иисүүс шабинартайгаа далайе гаталжа, Гэннэсарээдэй газарта хүрэжэ ерээд, онгосоо эрье дээрэ гаргаба.

⁵⁴ Онгосоһоо буухатайнь сасуу тэндэхи улад зон Иисүүсые таниба.

⁵⁵ Тиигээд оршон тойронхи бүхы нютагуудаар гүйжэ, Иисүүсэй хаана байһыень дуулахадаал, тиишэнь үбшэн зониие дэбисхэртэйнь асаржа байгаа.

⁵⁶ Иисүүсэй хаанашье ябахада, хото хүдөөдэшье байхада, хүнүүд үбшэн зониие асаржа, хубсаһандатнай халташье хүрэхые зүбшөөгыт даа гэжэ гуйдаг байгаа. Тиин хубсаһандань гараараа хүрөөд абаһан бүхы хүнүүд эдэгэшэдэг бэлэй.