Марк 5 - Библи

¹ Иисүүс шабинартайгаа Галилей далай гаталаад, Гераса хотын шадар ерэбэ.

² Тэрэнэй онгосоһоо буухатайнь сасуу досоогоо ада шүдхэртэй нэгэ хүн агы нүхэн хуурсагуудһаа шамдуухан гаража ерэбэ.

³ Тэрэ хүнэй агы нүхэн хуурсагуудта байрладаг хадань, хэншье тэрэниие хүлин барижа шададаггүй бэлэй.

⁴ Тэрэнэй гар хүл оло дахин гэнжээр хүлибэшье, тэрэ гэнжэнүүдые таһа татадаг, түмэр шүдэрнүүдые эбдэдэг байгаа. Хэншье тэрэниие диилэжэ мэдэлдээ абажа шададаггүй бэлэй.

⁵ Тэрэ хүн үдэр һүнигүй хада уулаар гү, али агы нүхэн хуурсагуудаар тэнэжэ, хашхаржа, бэеэрээ шулуу нэшэжэ байдаг һэн.

⁶ Тэрэ хүн Иисүүсые холоһоо хараһаар хажуудань гүйжэ ерээд, хүлдэнь унажа:

⁷ – Иисүүс, Дээдэ Бурханай Хүбүүн, би Танда ямар хамаатай хүнбиб? Намайе бү зобоогыт даа гэжэ Бурханай нэрээр гуйнаб! – гэжэ байгаад бархирба.

⁸ Тиигэжэ бархирһанайнь ушар гэбэл, Иисүүс тэрэ хүндэ ороһон ада шүдхэрнүүдтэ: – Энэ хүнһөө зайлагты! – гэжэ захирһан байгаа.

⁹ Тиигээд Иисүүс: – Нэрэшни хэн бэ? – гэжэ һураба. – Үй түмэн гэжэ нэрэтэйб, юундэб гэхэдэ, бидэ угаа олонбди, – гэжэ үнөөхи хүниинь харюусаба.

¹⁰ – Энэ орон нютагһаа ада шүдхэрнүүдые бү үлдыт даа, – гэжэ тэрэ дахин дахин Иисүүсые гуйба.

¹¹ Тэрэ үедэ хадын хаяагаар һүрэг гахай бэлшэжэ байгаа.

¹² – Маанадые энэ гахайн һүрэгтэ эльгээгыт даа, гахайнууд соо орохыемнай зүбшөөгыт даа, – гэжэ ада шүдхэрнүүд Иисүүсые гуйба.

¹³ Иисүүсэй зүбшөөхэдэ, ада шүдхэрнүүд үнөөхи хүнһөө гараад, гахайнууд руу оробо. Тиин хоёр мянган тооной шахуу гахайн һүрэг эгсэ эрьеһээ далай руу һүрэжэ шэнгэшоо бэлэй.

¹⁴ Гахай манаашад хото хүдөөгөөр ябаад, энэ ушар тухай зондо дуулгаба. Тиигээд хүн зон юунэй болоһые харахаяа тэрэ газарта ерэбэ.

¹⁵ Тэдэнэй Иисүүстэ ерэхэдэнь, үй түмэн ада шүдхэрнүүдтэ барюулаатай байһан хүн хубсалаад, элүүр ухаантай һууба, тиимэһээ хүн зон ехээр айжа һүрдэбэ.

¹⁶ Ада шүдхэрнүүдтэ барюулаатай байһан хүнтэй, гахайн һүрэгтэй юунэй болоһые хараһан зон суглараашадта хөөрэжэ үгэбэ.

¹⁷ Тиихэдэнь зон Иисүүсые нютагһаань гаража ошохыень гуйба.

¹⁸ Иисүүсэй онгосодоо һуужа байхадань, урдань досоогоо ада шүдхэрнүүдтэй байһан хүн суг ябалсахаар зүбшөөл гуйба.

¹⁹ Теэд Иисүүс зүбшөөбэгүй, харин: – Гэртээ харижа, шамда Эзэнэй хэды ехэ юумэ бүтээһэн тухай, үршөөл хайратай байһан тухай гэртэхиндээ хөөрэжэ үгэ, – гээ һэн.

²⁰ Тиимэһээ тэрэ хүн Арбан хотын оршон тойроноор ябажа, тэрээндэ Иисүүсэй хэды ехэ юумэ бүтээһэн тухай хүн бүхэндэ хөөрэбэ. Энэ ушар тухай дуулаһан лэ хүн ехээр гайхажа ханаба.

Үхэһэн басаган ба үбшэн эхэнэр

²¹ Иисүүс онгосоороо дахин Галилейн далай гаталжа, нүгөө эрьедэнь гараба. Тэндэнь Тэрэниие тойроод олон зон суглараа бэлэй.

²² Мүргэлэй гэрэй дарганарай нэгэн болохо Яһиир гэжэ нэрэтэй хүн тиишэ ерээ. Иисүүсые хараад, тэрэ хүлдэнь унажа,

²³ ехээр гуйжа оробо: – Үхимни үхэхэеэ хэбтэнэ. Ошожо, адислыт даа, тиигээ һаатнай эдэгэхэ, амиды ябахал.

²⁴ Иисүүс тэрэ хүнтэй гэртэнь ошобо. Хойноһоонь үнөөхил олон зон дахасалдан, эндэ тэндэһээнь түрисэлдэн ябаба.

²⁵ Тэрэ зоной дунда арбан хоёр жэлэй турша соо шуһа гоожоод тогтодоггүй үбшэнтэй нэгэ эхэнэр ябалсаа.

²⁶ Тэрэ эхэнэр олон эмшэдээр ябажа, бүхы алта мүнгэеэ бараһаншье һаа, оройдоо һайжараагүй, харин бүри муудажал байгаа.

²⁷ Иисүүс тухай дуулахадаа, тэрэ улад зоноор түрисэлдэн Иисүүсэй араһаа дүтэлөөд, мэдүүлэнгүйгөөр хубсаһандань халта хүрэбэ.

²⁸ Иисүүсэй хубсаһандань халташье хүрөө һаа эдэгэхэб гэжэ тэрэ этигэжэ байгаа.

²⁹ Тиигэхэтэйнь сасуу үнэхөөрөө шуһаниинь гарахаяа болижо, тэрэ эдэгэһэнээ мэдэрбэ.

³⁰ Тэрэ үедэ Иисүүс хүсэ шадалайнгаа буураһые ойлгобо. – Хэн Намайе хүрөөб? – гэжэ Тэрэ асууба.

³¹ Багшынгаа юун тухай һураһыень ойлгоогүй шабинарынь: – Таниие тойроод байһан зон эндэ тэндэһээтнай түринэл. «Хэн Намайе хүрөөб» гэжэ юундэ асуугаа юмта? – гэбэ.

³² Тиихэдэнь Иисүүс хубсаһандань хүрэһэн хүниие харахаяа тойрон шэртэбэ.

³³ Үнөөхи эхэнэр өөртэйнь юунэй ушарһые тухайлаад, айһан һүрдэһэн, шэшэрһэн юумэ Иисүүстэ дүтэлэн, урдань һүгэдэн унажа, сэхыень хэлэбэ.

³⁴ – Басаган, этигэлшни шамайе абараа. Ши амгалан тайбан, элүүр энхэ, үбшэ хабшангүй ябыш даа, – гэжэ Иисүүс эхэнэртэ хэлэбэ.

³⁵ Тиигэжэ байтарнь мүргэлэй гэрэй даргада хэдэн хүн ерэжэ: – Басагантнай наһа бараа, та багшые бү тухашаруулыт, – гэжэ хэлэбэ.

³⁶ Зүгөөр Иисүүс хэлээшыень тоонгүй: – Бү ай. Этигээд лэ бай, – гэжэ Яһиирта хэлэбэ.

³⁷ Тиигээд Пётр, Яков, тэрэнэй Иоанн дүү гурбанһаа ондоо хэндэшье хойноһоонь ябахые Иисүүс зүбшөөбэгүй.

³⁸ Тэдэ мүргэлэй гэрэй даргында ерээд, зоной хөөрсэгэнэхые, бахардан үймэхые, шангаар уйлалдахые, бархиралдахые хараба.

³⁹ Иисүүс гэртэ ороод: – Юундэ иитэрээ бархиралдана гээшэбта? Басаган үхөөгүй, миин лэ унтажа байна, – гэбэ.

⁴⁰ Тиигэхэдэнь тойроод байһан улад зон Иисүүсые наада барин энеэлдэбэ. Иисүүс бүгэдэ зониие гаргаад, үнөөхи басаганай аба эжытэй, гурбан шабинартайгаа басаганай хэбтэһэн таһалгада оробо.

⁴¹ Тиигээд басаганай гарһаань баряад: – Талита кум! – гэбэ (энэнь: «Басаган, бодо!» – гэһэн удхатай).

⁴² Басаган тэрэ дороо бодоод, таһалгаараа ябаба. Тэрэ арбан хоёр наһатай байгаа. Энэ ушарай гэршэ болоһон зон ехэ гайхажа ханаба.

⁴³ Иисүүс энээн тухай нэгэшье хүндэ бү дуулгагты гэжэ захираа һэн. Тиигээд: – Басаганда эдихэ юумэ үгэгты, – гэбэ.