Марк 16 - Библи

¹ Субботын үнгэрһэн хойно Магдалай Мария, Саломия, Яковай эхэ Мария гэгшэд Иисүүсэй бэе түрхихөөр хангалтай зүйлнүүдые худалдажа абаба.

² Субботын хойто үдэрэй эртэ үглөөгүүр нара гарахын урда тээхэнэ агы нүхэн хуурсагта ошобо.

³ Замдаа тэдэнэр: – Агы нүхэ хааһан шулууе хэн бидэндэ хажуу тээшэнь үмхирүүлжэ үгэхэб? – гэжэ бэе бэеһээ һуража байгаа.

⁴ Зүгөөр, ерэжэ харахадань, асари томо тэрэ шулуун хажуу тээшээ болгогдоһон байба.

⁵ Тэдэнэр агы соо ороод, үүдэнэй баруун талада саб сагаан хубсаһатай залуу хүнэй һуухые харабад. Эхэнэрнүүдэй айн мэгдэхэдэ,

⁶ тэрэ хүн: – Бү айгты! Таанад хэрээһэндэ хадуулһан Назаредэй Иисүүсые бэдэрнэт гэжэ би мэдэнэб. Тэрэтнай эндэ үгы, амидыраа. Энэ бэеыень табиһан газар харыт.

⁷ Мүнөө шабинартань, илангаяа Пётрто ошожо: «Таанадта хэлэһэнэйнгээ ёһоор, Тэрэ түрүүн Галилей ошохо, тэндэ Тэрэниие харахат», – гэжэ дуулгагты.

⁸ Эхэнэрнүүд агы сооһоо айхабтар ехээр сошоһон һүрдэһэн юумэд гүйлдэжэ гарабад. Тон ехээр мэгдэһэн дээрэһээ тэдэ хэндэшье юумэ дуулгабагүй.

Иисүүс Магдалай Марияда ерэбэ

⁹ Субботын хойто үдэрэй эртэ үглөөгүүр Иисүүс амидыраад, анха түрүүн Магдалай Марияда ерэбэ. Урдань Иисүүс тэрэ эхэнэр сооһоо долоон ада шүдхэрые намнажа гаргаһан байгаа.

¹⁰ Мария Иисүүстэй хамта ябалсаһан шаналжа, уйлажа байһан хүнүүдтэ ошожо,

¹¹ Иисүүсэй амидырһан тухай, өөрөө Тэрэниие хараһан тухайгаа хөөрэбэ. Гэбэшье тэдэнь үнэншэбэгүй.

Иисүүс хоёр шабидаа ерэбэ

¹² Удаань Иисүүс ондоо шарай шарайлаад, хотоһоо гараад ябаһан хоёр шабидаа ерээ.

¹³ Тэдэнь бусажа ерээд, ушарһан бүгэдые нүгөө шабинартаа хөөрэбэ, харин тэдэнь этигэбэгүй.

Иисүүс арбан нэгэн шабинартаа ерэбэ

¹⁴ Һүүлдэнь Иисүүс үдэшын хоол барижа байһан арбан нэгэн шабинартаа ерэбэ. Амидырһан хойнонь хараһан зондо үнэншэжэ үгэнгүй зүрюутэһэнэйнь түлөө, этигэлгүй байһанайнь түлөө шабинараа Тэрэ харааба.

¹⁵ Тиигээд тэдэндээ иигэжэ хэлэбэ: – Бүхы газар дэлхэйгээр ябажа, хүн бүхэндэ Һайн Мэдээсэл номногты.

¹⁶ Намда этигэһэн, уһан арюудхалгада хүртэһэн хүн бүхэн абарагдаха. Харин Намда этигэхэеэ арсаһан хүн бүхэн гэмнэгдэхэ.

¹⁷ Намда этигэһэн хүн бүхэн гайхамшагта үйлэ хэрэгүүдые бүтээхэ аргатай байха. Минии нэрээр тэдэ ада шүдхэрнүүдые намнажа гаргаха, танигдахагүй хэлэнүүдээр дуугарха.

¹⁸ Тэдэ могойнуудые барибашье, хоро уубашье, өөһэдыгөө гэмтээхэгүй. Мүн гараа үбшэн зон дээрэ табяад, тэдэниие эдэгээжэ байха.

Иисүүс тэнгэридэ дэгдэбэ

¹⁹ Эдэ бүгэдые шабинартаа хэлээд, Эзэн Иисүүс тэнгэридэ дэгдэжэ, Бурханай баруун таладань һууба.

²⁰ Тиигээд шабинарынь хаа хаанагүй ябажа, эндэ тэндэ номножо байба. Эзэн тэдэндэ хамһалсажа, хэлэһэн үгэнүүдэйнь үнэн зүб байһые гайхамшагта үйлэ хэрэгүүдээр баталдаг байгаа.