Марк 15 - Библи

¹ Үүр сайха үеэр түрүү санаартан, ахамадууд, Хуули заадаг багшанар яаралтайгаар Зүблэлэй гэшүүдтэй уулзажа хуралдаба. Тэдэ Иисүүсые хүлижэ, Пиладта абаашажа тушаагаа.

² – Та еврейнүүдэй хаан гүт? – гэжэ Пилат Иисүүсһээ асууба. – Та тиигэжэ хэлэнэт, – гэжэ Иисүүс харюусаба.

³ Түрүү санаартан Иисүүстэ олон зэмэ тохожо байгаа.

⁴ Тиимэһээ Пилат: – Та харюу үгэхэгүй гүт? Таниие иимэ олон хэрэгүүдтэ гэмнэжэ байһые Та дууланагүй гүт? – гэжэ хэлэбэ.

⁵ Харин Иисүүс харюу үгэнгүй Пиладые гайхуулба.

Иисүүсые үхэлэй саазада хүртүүлбэ

⁶ Паасхын һайндэрөөр Пилат хаалтада һуугшадай нэгыень зоной дурадхалаар сүлөөдэ табидаг заншалтай байгаа.

⁷ Тэрэ үедэ Бараббаа гэдэг хүн түрмэдэ һуугаа. Хотодо үймөөнэй болоходо тэрэниие үшөө хэдэн үймүүлэгшэдтэй хамта алуур һүйдхэл гаргаһанайнь түлөө барижа хааһан байгаа.

⁸ Улад зон сугларжа, урданайнгаа заншалаар хаалтада һууһан нэгэ хүниие табихыень Пиладһаа гуйба.

⁹ – Еврейнүүдэй хааниие танда табихыемни хүсэнэ гүт? – гэжэ Пилат тэдэнһээ һураба.

¹⁰ Иисүүстэ атаархажа байһан дээрэһээ түрүү санаартан Тэрээние барижа асараа гэжэ Пилат һайн ойлгожо байгаа бшуу.

¹¹ Теэд түрүү санаартан Бараббаае табихыень Пиладһаа гуйгты гэжэ улад зониие идхаба.

¹² – Еврейнүүдэй хаан гэжэ таанадай нэрлэдэг хүниие би яаха болонобиб? – гэжэ Пилат улад зонһоо асууба.

¹³ – Тэрэниие хэрээһэндэ хада! – гэжэ зон хашхарба.

¹⁴ – Ямар гэмтэй юумэ Тэрэ хээб? – гэжэ Пиладай һурахадань, улад зон харюудань: – Тэрээниие хэрээһэндэ хада! – гэжэ бүри шангаар, гааралдан хашхарба.

¹⁵ Пилат улад зоной һайшаалда хүртэхэеэ һанажа, тэдэндэ Бараббаае табиба, харин Иисүүсые сохёод, хэрээһэндэ хадахыень захирба.

Сэрэгшэд Иисүүсые баһаба

¹⁶ Сэрэгшэд Иисүүсые Пиладай ордоной хэрэмэй хорёодо абаашажа, тиишэнь бүхы бүлэг сэрэгшэдээ дуудаба.

¹⁷ Тэдэ Иисүүстэ улаан суба үмдэхүүлбэ, үүргэнээр гүрлөө гүрэжэ, толгойдонь углаба.

¹⁸ Тиигээд Тэрэниие баһажа: – Еврейнүүдэй хаан мандаха болтогой! – гэжэ байгаад хашхарба.

¹⁹ Тиигээд сэрэгшэд Тэрэнэй тархи түрүүень таягаар сохижо, урдаһаань нёлбожо, мүн үбдэг дээрээ унан дохибо.

²⁰ Тиигэжэ сэрэгшэд Иисүүсые ханатараа баһаад, удаань үнөөхи улаан субыень тайлаба. Тиигээд Өөрынь хубсаһа үмдэхүүлээд, хэрээһэндэ хадахаяа абаашаа һэн.

Иисүүсые хэрээһэндэ хадаба

²¹ Харгыдаа тэдэнэр хээрэһээ гэртээ бусажа ябаһан Хэрээн нютагай Симон гэдэг хүнтэй уулзаба. Сэрэгшэд тэрэниие Иисүүсэй хэрээһэ үргэлөөд ябахыень баалаба. (Симон болбол Александр Рүүф хоёрой эсэгэ байгаа.)

²² Сэрэгшэд Иисүүсые «Хохимой» (еврей хэлээр «Голгофо») гэдэг газарта асараа.

²³ Тиигээд үбшэнэй мэдэрэл алдуулдаг эмтэй холиһон үзэмэй дараһан архи уухыень үгэхэдэнь, Иисүүс уубагүй.

²⁴ Удаань сэрэгшэд Иисүүсые хэрээһэндэ хадаад, жээрэб татажа, хубсаһыень дундаа хубаажа абаа.

²⁵ Тэрэниие хэрээһэндэ хадахада үглөөнэй юһэн саг боложо байгаа.

²⁶ Юундэ хэрээһэн дээрэ хадуулааб гэжэ тайлбарилһан модон хабтагай дээрэнь «Еврейнүүдэй хаан» гэжэ бэшээтэй байба.

²⁷ Иисүүстэй хамта үшөө хоёр хоротониие саазалба: нэгыень баруун таладань, нүгөөдыень зүүн таладань хэрээһэндэ хадаба.

²⁹ Хажуугаарнь үнгэрһэн зон толгойгоо һэжэржэ, Иисүүсые шоолон: – Зай, Та Һүмые һандаргаад, гурбан үдэр соо бодхоохоб гээ бэлэйт.

³⁰ Та түрүүн хэрээһэнһээ буужа, Өөрыгөө абарыт! – гэжэ хашхаралдаба.

³¹ Тон тиигэжэл Иисүүсые түрүү санаартан, Хуули заадаг багшанар шоолон, бэе бэедээ: – Бусадые абардаг аад, харин Өөрыгөө абаржа шаданагүйл.

³² Хэрбээ Израилиин хаан, Бурханай табисуурта юм һаа, хэрээһэнһээ бууг лэ! Тиигэбэл бидэ нюдөөрөө хараад, этигэхэбди, – гэлдэжэ байба. Мүн Иисүүстэй хамта хэрээһэндэ хадуулһан дээрмэшэдшье Тэрээниие шоглон баһаба.

Иисүүс наһа бараба

³³ Хахад үдэрэй багһаа үдэрэй гурбан саг болотор бүхы газар дэлхэй шэб харанхыда хушагдаба.

³⁴ Гурбан сагай багаар Иисүүс: – Элои! Элои! Лема сабахтани? (Бурхамни, Бурхамни! Юундэ Намайе орхибот?) – гэжэ шангаар хашхарба.

³⁵ Хажуудань зогсожо байһан зарим зон хэлэһыень дуулаад: – Шагныта, Тэрэ Элияае дуудана! – гэлдэбэ.

³⁶ Тэдэнэй нэгэниинь гүйжэ ошоод, бамбагар юумэн дээрэ уксус адхаад, тэрэнээ тулуурай үзүүртэ табяад, Иисүүстэ уухыень үгэхэ зуураа: – Хүлеэгты, Элияа Тэрээниие хэрээһэнһээнь буулгахаяа ерэгшэ аа гү, харая! – гэбэ.

³⁷ Иисүүс шанга абяа гаргаад, амяа табиба.

³⁸ Тиихэдэнь Һүмэ соо Хамагай Нангин газарта ороходо үлгөөтэй хүшэгэ дээрэһээ доошоо шууража, хоёр боложо хахарба.

³⁹ Иисүүсэй сэхэ урдань зогсожо байһан зуунай дарга Тэрэнэй хашхараад, амяа табихыень харахадаа: – Энэ хүн үнэхөөрөө Бурханай Хүбүүн байгаа, – гэбэ.

^40-41 Тээ холохоно зогсоод эдэ бүгэдые хэдэн эхэнэрнүүд хаража байгаа. Тэдэ Иисүүстэй хамта Иерусалим ерэһэн юм. Тэдэ үшөө энэ ушарай тохёолдохын урда, Иисүүсэй Галилейдэ байхада Тэрэниие дахажа ябадаг, Тэрээндэ туһаламжа үзүүлдэг һэн. Тэдэнэй дунда Магдалай Мария, балшар Яков Ёшияа хоёрой эхэ Мария ба Саломия гэгшэд байлсаба.

Иисүүсые хүдөөлүүлбэ

⁴² Тиихэдэ субботын урдахи үдэшэ бэлэй. Тиимэһээ еврейнүүд энэ нангин үдэртэ бэлдэжэ байгаа.

⁴³ Аримафейн Иосиф гэдэг хүн Пиладта орохоёо зүрхэлжэ, тэрээнһээ Иисүүсэй бэе үгэхыень эрибэ. Иосиф өөрөө дээдын Зүблэлэй ехэ хүндэтэ гэшүүниинь һэн, тиин тэрэ Бурханай хаан түрын мандахые хүлеэжэ байгаа.

⁴⁴ Иисүүсэй тиимэ түргөөр үхэһэн тухай дуулаад, Пилат гайхаба. Тиигээд зуунай нэгэ даргые дуудаад, Иисүүс хэзээ үхөөб гэжэ һураба.

⁴⁵ Пилат тэрэ даргые шагнаад, Иисүүсэй бэе абахыень Иосифто зүбшөөбэ.

⁴⁶ Иосиф нарин улһаар нэхэһэн бүд худалдажа абаа. Удаань Иисүүсэй бэе хэрээһэн дээрэһээ буулгаад, бүдөөр орёогоод, хабсагайда түнхинэгдэһэн агы нүхэн соо хадагалаа һэн. Тиигээд агы нүхэнэй амһартые томо шулуугаар хааба.

⁴⁷ Иисүүсэй бэеын хаана хадаглагдахые Магдалай Мария, Ёшияагай эхэ Мария гэгшэд ажаглан хаража байгаа.