Марк 14 - Библи

¹ Хоёр хоноод Паасхын һайндэр, ондоогоор хэлэбэл Эһээгдээгүй хилээмэнэй һайндэр болохо байгаа. Түрүү санаартан, Хуули заадаг багшанар Иисүүсые мэхэдээ оруулжа бариха, тиигээд алаха арга бэдэрбэ.

² Теэд улад зоной дунда буһалгаанай үүсхэгдэхэгүйн тула һайндэртэ тиимэ юумэ хэхэгүй гэжэ хэлсэбэ.

Иисүүс Бэтаанида

³ Иисүүсэй Бэтаанида һэлхэ үбшэндэ дайруулһан Симонэй гэртэ хоол барижа байхадань, нэгэ эхэнэр тон үнэтэй домбо соо һайхан хангалтай тоһо барижа оробо. Тэрэ тоһон ехэл үндэр сэнтэй һэн. Эхэнэр домбынгоо амһарынь нээгээд, Иисүүсэй толгой дээрэ тоһоёо адхаба.

⁴ Тиихэдэнь зарим айлшад дураа гутажа: – Юу гээшын ехэ тоһо гарзална гээшэб?

⁵ Энэ тоһо бидэ гурбан зуун динаряар худалдаад, мүнгыень үгытэйшүүлдэ хубаажа үгэхэ байгаабди, – гэжэ тэрэ эхэнэрые зэмэлбэ.

⁶ Харин Иисүүс тэдэ зондо хэлэбэ: – Болигты даа! Юундэ энэ эхэнэрые аягүй байдалда оруулнабта? Энэ Намда ехэл һайн юумэ хээ гээшэ.

⁷ Үгытэй ядуушуул хододоо таанартай байхал, таанад дуратайл сагтаа тэдэндэ туһалха аргатай байхат. Харин Би таанартай ходо байхагүйб.

⁸ Энэ эхэнэр шадаха зэргээрээл оролдоо: Минии бэеые хүдөөлүүлгэдэ бэлдэн тоһоор түрхеэ.

⁹ Һайн Мэдээсэлэй бүхы газар дэлхэйгээр хаа хаанагүй номногдоходо, энэ эхэнэрэй хэһэн хэрэг тухай хүнүүд дурсан һанажа байха, хэлэжэ байха гэжэ Би таанадта баталнаб.

Иуда ба түрүү санаартан

¹⁰ Арбан хоёр шабинарайнь нэгэн болохо Искариодой Иуда түрүү санаартанда ошожо, Иисүүсые барихада таанадта туһалхаб гэбэ.

¹¹ Түрүү санаартан Иудын хэлэһые ехэ дуратайгаар шагнажа, шамда мүнгэ үгэхэбди гэжэ амалба. Тиимэһээ Иуда Иисүүсые барижа үгэхэ таарамжатай нүхэсэл харгалзадаг болоо.

Иисүүс шабинартайгаа Паасхын хоол барина

¹² Эһээгдээгүй хилээмэнэй һайндэрэй түрүүшын үдэр болобо. Тэрэ үдэр Паасхын хурьга гаргаад байхада, шабинарынь Иисүүсһээ: – Паасхын хоол хаана бэлдэхэбибди? – гэжэ һураба.

¹³ Иисүүс хоёр шабидаа: – Таанад хото ошогты, тэндэ домбо соо уһа абажа ябаһан хүнтэй уулзахат, тэрэниие дахаад ябаарайт.

¹⁴ Тэрэ хүнэй ороһон гэртэ ороод, гэрэй эзэндэ: «Багшамнай шамда эльгээгээ. Шабинартаяа хамта Паасхын хоол ямар таһалгада барихабибди?» – гэхэт.

¹⁵ Тэрэтнай танда ехэ уужам, зохидоор түхеэрэгдэһэн таһалга дээдэ дабхарта харуулжа үгэхэ. Тэндэл шэрээгээ заһагты, – гэжэ хэлэбэ.

¹⁶ Хоёр шабинарынь хото орожо, Иисүүсэй хэлэһэн бүхы юумые оложо, Паасхын хоол бэлдэбэ.

¹⁷ Үдэшэ болоходо Иисүүс арбан хоёр шабинартайгаа ерэбэ.

¹⁸ Шэрээдэ һуугаад, хоол барижа байха зуураа Иисүүс: – Намтай хамта эдеэлһэн нэгэнтнай Намайе барижа үгэхэнь, Би баталан хэлэнэб, – гэбэ.

¹⁹ Тиихэдэнь шабинарынь һанаагаа ехээр зобожо: – Би бэшэ аабзаб? – гэжэ Иисүүсһээ хойно хойноһоон һуража оробо.

²⁰ Иисүүс: – Намтай хамта нэгэ табагта хилээмээ дүрэжэ эдигшэ та арбан хоёрой нэгэнь юм.

²¹ Хүн түрэлхитэнэй Хүбүүн Нангин Бэшэг соо хэлэгдэһэнэй ёһоор үхэхэ. Харин Тэрээниие барижа үгэһэн хүн аймшагтай гай зоболон амсаха: тэрэ хүнэй юрэдөө түрөөгүй һаань, өөртэнь һураггүй дээрэ байха һэн, – гэжэ хэлэбэ.

Эзэнэй үдэшын хоол

²² Хоол бариха үедөө Иисүүс гартаа хилээмэ абаад, Бурханда баяр баясхалан хүргөөд, тэрэнээ хухалаад, шабинартаа үгэхэ зуураа хэлэбэ: – Энээниие абаад эдигты. Энэ Минии бэе гээшэ.

²³ Тиигээд үзэмэй дараһан архитай аяга абаад, Бурханда баяр баясхалан хүргөөд, шабинартаа үгэбэ. Шабинарынь булта тэрэ аягаһаань амсаба.

²⁴ – Энэ болбол олоной түлөө адхарха Минии шуһан гээшэ, тиин энэ шуһаар Бурхан хүнүүдтэй Шэнэ Хэлсээ батална.

²⁵ Бурханай хаан түрэдэ шэнэ үзэмэй дараһан архи ууха үдэрэй болотор Би архи уухагүйб, – гэжэ Иисүүс хэлэбэ.

²⁶ Тиигээд тэдэнэр магтаал дуу дуулаһаар Элеон хада дээрэ гараба.

Иисүүс Пётрой Өөрһөөнь арсаха тухай уридшалан хэлэнэ

²⁷ Иисүүс шабинартаа иигэжэ хэлэбэ: – Энэл һүниндөө таанар бултадаа Намһаа арсажа холодохот, ушарынь гэбэл: «Хонишонииень дайража һалгаахадамни, һүрэг хонидынь тарашаха» гэжэ Нангин Бэшэг соо хэлэгдэнэ.

²⁸ Харин амидырһан хойноо Би таанадай түрүүндэ Галилейдэ ошохоб.

²⁹ – Бултанай Таниие орхёошье һаань, би Танһаа хэзээшье арсахагүйб, – гэжэ Пётр Тэрээндэ хэлэбэ.

³⁰ – Энэ һүни эрэ тахяагай хоёр дахин дуугархаһаань урда ши Намһаа гурба дахин арсахалши даа гэжэ баталан хэлэнэб, – гэжэ Иисүүс харюусаба.

³¹ – Тантай хамта үхэхэшье болобол, би Танһаа арсахагүйб, – гэжэ Пётр бүришье хатуугаар хэлэбэ. Бусадшье шабинарынь булта баһал тиигэжэ хэлэбэ.

Иисүүс Гефсимани сэсэрлиг соо зальбарна

³² Иисүүс шабинартайгаа Гефсимани гэдэг газарта ерээд: – Минии зальбараад ерэтэр таанад эндээ һуужа байгты, – гэжэ шабинартаа хэлэбэ.

³³ Тэрэ Пётр, Яков, Иоанн гурбые абажа ошобо. Тэрэ ехэл уйдхар гашуудалтай, ехэл һанаагаа зобоһон юумэн

³⁴ шабинартаа: – Минии ами һүнэһэн туйлай ехээр уйдажа, үхэһэндэл адли байнаб. Таанар эндэ Намтай хамта һэргэг байгты, – гэбэ.

^35-36 Тиигээд тээ хажуу тээшээ ошожо, үбдэг дээрээ һуугаад, зальбарба: – Аба, Эсэгэмни! Та ямаршье юумэ хэхэ аргатайт! Энэ аягаһаа амсуулангүй, иимэ ехэ зоболон Намһаа зайлуулыт даа. Тиигэбэшье Минии хүсэлөөр бэшэ, харин Танайхяар болог.

³⁷ Удаань шабинартаа бусажа ерэхэдэнь, тэдэнь унтажа байба. Тэрэ Пётрто: – Симон, ши унтана гүш? Гансаханшье саг соо унтангүй байха аргагүй гүш? – гэбэ.

³⁸ Тиигээд бултандань: – Хорхойтуулгада абтахагүйн тула таанад һэргэг байгты, зальбарагты: сэдьхэл дорюуншье һаа, бэе махабад ахир һула бшуу, – гэжэ хэлэбэ.

³⁹ Иисүүс дахин хажуу тээшээ ошожо, урданайгаа үгэнүүдые дабтан зальбарба.

⁴⁰ Тиигээд шабинартаа ерэхэдэнь, тэдэнь баһал унтажа байгаа. Тэдэнэй нюдэниинь анилдаад нээгдэжэ үгэнгүй, тэдэ юу хэлэхэеэшье мэдэнгүй байгаа.

⁴¹ Иисүүс гурбадахияа ерэхэдээ шабинартаа хэлэбэ: – Таанад үшөөл унтажа, амаржа байна гүт? Зай, болоо! Хүн түрэлхитэнэй Хүбүүнэй нүгэл үйлэдэгшэдэй гарта тушаагдаха сагынь ерээ!

⁴² Бодогты, ябаябди! Намда урбагша дүтэлжэ байна.

Иисүүсые барижа тушааба

⁴³ Иисүүсэй үшөө хэлэжэ байхадань, арбан хоёр шабинарайнь нэгэн болохо Иуда бии болобо. Тэрээнтэй хамта түрүү санаартанай, ахамадуудай, Хуули заадаг багшанарай эльгээһэн һэлмэ, шиидам һаднаг бариһан олон зон байба.

⁴⁴ Урбагша хамта ябаһан зондоо ямар дохёо тэмдэг үгэхэ тухайгаа хэлсэжэ: – Минии таалан мэндэшэлхэ хүн танда хэрэгтэй хүн гээшэ, Тэрэниие барижа, харуул доро абаарайгты, – гэбэ.

⁴⁵ Иуда сэхэ Иисүүстэ ойртожо: – Рабби! – гэмсээрээ Тэрээниие таалаба.

⁴⁶ Үнөөхи хүнүүд Иисүүсые барижа, харуул дооро абаба.

⁴⁷ Тэндэ зэргэлээд байгшадай нэгэн һэлмэеэ гаргаад, ахамад санаартын зарасын шэхые таһа сабшажархёо.

⁴⁸ Иисүүс тэдэ хүнүүдтэ хандан: – Таанар дээрмэшэниие барихаяа гараһандал һэлмэ, шиидам һаднагтайгаар Намайе барихаяа ерэбэ гүт?

⁴⁹ Теэд үдэр бүхэн таанадые Һүмэ соо һургахадамни Намайе барижа хаадаггүй бэлэйлта. Зүгөөр Нангин Бэшэгэй үгэнүүд хүсэлдэг лэ даа, – гэбэ.

⁵⁰ Шабинарынь булта Иисүүсые орхёод, иишэ тиишээ зугадаба.

⁵¹ Нюсэгэн бэеэ хушалгаар орёогоод ябаһан тэдэнэй нэгэнь Иисүүсэй хойноһоо ябаа. Тэрэ хүбүүе бариха гэхэдэнь,

⁵² тэрэ нэмэрһэн хушалгаа намнагшадайнгаа гарта үлээгөөд, нюсэгөөр тэндэһээ гүйбэ.

Иисүүс Зүблэлэй гэшүүдэй урда

⁵³ Иисүүсые ахамад санаартында абаашаба. Тэндэнь түрүү санаартан, ахамадууд, Хуули заадаг багшанар булта суглараад байгаа.

⁵⁴ Пётр зай баряад ахамад санаартын хорёо хүрэтэр Иисүүсэй хойноһоо гэтэн ерэбэ. Тиигээд хорёо соо орожо, харуулшадтай хамта галай хажууда дулаасажа һууба.

⁵⁵ Түрүү санаартан, дээдын Зүблэлэй гэшүүд булта Иисүүсые үхэлэй саазада хүртөөхэ һанаатай байгаа. Тиимэһээ тэдэнэр Иисүүсые гэмнэхэ гэршэ баримта бэдэрбэ, теэд юуншье олдобогүй.

⁵⁶ Олон худалша гэршэнэрэй хардажа гэршэлхэдэнь, тэдэ гэршэлгэнүүдынь хоорондоо харша байба.

⁵⁷ Һүүлдэнь хардахаяа ерэһэн хэдэн гэршэнэр бодоод:

⁵⁸ – Маанадай бариһан Һүмэ бута буулгаад, гурбан үдэр соо ямаршье хүнэй туһагүйгөөр шэнэ Һүмэ бодхохоб гэжэ Тэрэнэй хэлэһыень дуулаа һэмди, – гэжэ хэлэбэ.

⁵⁹ Теэд энэ гэршэлгэньшье баримтагүй байгаа бэлэй.

⁶⁰ Ахамад санаарта Зүблэлэй гэшүүдэй урда байгаад: – Та юундэ харюусанагүйбта? Таниие зэмэлһэн гэршэлгэнүүдые дууланагүй гүт? – гэжэ Иисүүсһээ асууба.

⁶¹ Харин Иисүүс ямаршье харюу үгэнгүй, дуугүй байба. Тиихэдэнь ахамад санаарта Тэрээндэ дахин хандан: – Та магтаалта Бурханай Хүбүүн, Бурханай табисуурта гүт? – гэжэ һураба.

⁶² – Тиимэб. Һаяар Хүн түрэлхитэнэй Хүбүүнэй Һүр хүсэтэй Бурханай баруун талада һуухыень, тэнгэриин үүлэнүүд дээгүүр заларан ерэхыень үзэхэт, – гэжэ Иисүүс тэрээндэ хэлэбэ.

⁶³ Тиихэдэнь ахамад санаарта уурлаһандаа хубсаһаяа шуу татажа: – Бидэндэ үшөө ямар гэршэ хэрэгтэйб?

⁶⁴ Бурханиие доромжолхыень дуулаа бэзэт! Таанад юун гэжэ һананабта? – гэжэ Зүблэлэй гэшүүдһээ һураба. – Үхэлэй саазада хүртэхэ ёһотой, – гэжэ булта Тэрэниие гэмнэбэ.

⁶⁵ Тиигээд зариманиинь Иисүүсые нёлбожо оробо, нюдыень боогоод, нюдаргаараа шаан: – Таниие хэн сохёоб, хэлэгты даа! – гэлдэбэ. Удаань харуулшад Тэрэнэй хасарые альгадаба.

Пётрой арсалга

⁶⁶ Пётрой хорёо соо байхадань, ахамад санаартын нэгэ зараса һамган тэндэнь ерэжэ,

⁶⁷ түүдэгэй хажууда дулаасажа байһан Пётрые анхаралтайгаар хараад: – Ши баһал Назаредэй Иисүүстэй хамта байлсаа һэнши, – гэбэ.

⁶⁸ – Шинии юун тухай хэлэжэ байһыешни би ойлгоногүйб, – гээд Пётр мэлзэбэ. Тиигээд хорёогой үүдээр гаража байхадань, эрэ тахяа дуугарба.

⁶⁹ Тэрэ зараса эхэнэр Пётрые дахин хараад, тэндэ байһан зондо: – Энэл Назаредэй Иисүүстэй хамта ябагшадай нэгэн байна, – гэжэ дабтаба.

⁷⁰ Пётр дахин мэлзэбэ. Нэгэ хэды болоод, тэндэ зогсогшод Пётрто дүтэлжэ: – Ёһоороо ши тэдэнэй нэгэниинь байнаш, юундэб гэхэдэ, ши баһал Галилейһээ байнаш, – гэлдэбэд.

⁷¹ Тиигэхэдэнь Пётр: – Тэрэ хүниие би мэдэхэгүйб, – гээд, Бурханиие дурдажа байгаад тангариглаба.

⁷² Тэрэ үедэнь эрэ тахяа хоёрдохиёо дуугарба. – Эрэ тахяагай хоёр дахин дуугархаһаань урда ши Намһаа гурба дахин арсахалши даа, – гэжэ Иисүүсэй хэлэһэниинь Пётрой һанаанда оробо. Тиимэһээ тэрэ һанаагаараа унажа, уйлаба.