Марк 11 - Библи

¹ Иисүүс шабинартайгаа Иерусалимда, Элеон хадын хаяада оршодог Бэтпагээ ба Бэтаани тосхонуудта ойртоод, тиишэнь хоёр шабияа эльгээбэ.

² – Урдатнай байһан тосхон ошогты. Тэндэ оромсоороо хүн амитанай оройдоо унаагүй залуу элжэгэнэй уяатай байхые харахат. Тэрэниие уяаһаань тайлаад, наашань хүтэлжэ асарагты.

³ Хэрбээ таанарһаа: «Юу хэжэ байнабта?» – гэжэ һураа һаань, «Энэ элжэгэн Эзэндэ хэрэгтэй болоо», – гэжэ харюусаарайт, тиихэдэтнай тэрэ элжэгэ абажа ябахыетнай дары зүбшөөхэ.

⁴ Шабинарынь ошожо, гудамжада нэгэ гэрэй хажууда уяатай залуу элжэгэ олоод, тэрэниие уяаһаань тайлаба.

⁵ Тэндэ байһан зон: – Таанад юундэ энэ элжэгэ сэргэһээнь тайлабабта? – гэжэ һураба.

⁶ Шабинар Иисүүсэй захиһан ёһоор харюусаба, тиихэдэнь хүнүүд тэдэниие табиба.

⁷ Шабинар тэрэ элжэгэ асаржа, нюрган дээрэнь хубсаһаяа дэбдибэ, тиигээд Иисүүс тэрээниие унаба.

⁸ Олон зон Иисүүсэй ябаха харгы дээгүүрнь хубсаһаяа дэбдибэ, зарим зон мүшэрнүүдые отолоод, харгы дээгүүрнь хаяба.

⁹ Урдань ябаһан, хойноһоонь дахаһан зон булта: – Бурханда алдар соло! Эзэнэй нэрээр заларан Ерэгшэ үршөөл хайратай байһай!

¹⁰ Манай үбгэ эсэгэ Давид хаанай мандуулһан хаан түрэ алдар солотой байһай! Дээдын тэнгэридэ оршоһон Бурханда алдар соло! – гэжэ шанга шангаар хашхаралдаба.

¹¹ Иерусалимда ороод, Иисүүс Һүмэ ошожо, досоонь байһан бүхы юумэ анхаралтайгаар хараба. Тиигээд орой болошоһон дээрэһээ арбан хоёр элшэнэрээрээ хамта Тэрэ Бэтаани руу бусажа ошобо.

Иисүүс боди модо хараалдаа хүртөөбэ

¹² Хойто үдэрынь шабинартайгаа Бэтааниһаа гараад ябахадань, Иисүүсэй гэдэһэниинь үлдэбэ.

¹³ Тэрэ холоһоо набшаһадаар бүрхөөгөөтэй боди модо хараад, тэндэнь эдихээр юумэн олдоно аа гү гэжэ харахаяа ошобо. Теэд модондонь набшаһадһаа бэшэ юушье байбагүй, ушарынь юуб гэбэл, боди модоной үрэ жэмэс үгэхэ саг болоогүй байгаа.

¹⁴ Тиимэһээ Иисүүс тэрэ модондо: – Хойшодоо энэ модонһоо хүн хэзээдэшье жэмэс бү эдиһэй! – гэжэ хэлэбэ. Тиигэжэ хэлэхыень шабинарынь дуулаһан байгаа.

Иисүүс Һүмэ ошобо

¹⁵ Иисүүс шабинартайгаа Иерусалим ерэхэдээ Һүмэ оробо. Тэндэһээ наймаашадые, юумэ худалдажа абагшадые намнажа оробо, мүнгэ танга һолигшодой шэрээнүүдые, гулабхаа худалдагшадай һандалинуудые хүмэрюулбэ.

¹⁶ Тиигээд худалдаа наймаанай ямаршье юумэ Һүмэ соо абажа ябахые хорибо.

¹⁷ – «Минии гэр бүхы арадуудай мүргэл зальбаралай гэр гэжэ нэрлэгдэхэ», – гэжэ Нангин Бэшэг соо бэшээтэй байдаг. Харин таанад энэ гэр дээрмэшэдэй шэбээлдэг үүр болгожорхёот, – гэжэ Иисүүс хэлэбэ.

¹⁸ Тиигэжэ хэлэхыень түрүү санаартан, Хуули заадаг багшанар дуулаад, Тэрэниие хюдаха арга бэдэрбэ. Юундэб гэбэл, бүхы зон Тэрэнэй һургаал гайхан анхаржа байгаа, тиимэһээл тэдэнэр Иисүүсһээ айжа байгаа.

¹⁹ Үдэшэ болоходо Иисүүс шабинартайгаа хотоһоо гаража ошобо.

Боди модонһоо абаһан хэшээл

²⁰ Хойто үглөөгүүрынь боди модоной хажуугаар үнгэрхэдөө, шабинарынь тэрэ модоной үндэһэндөө хүрэтэр хаташоод байхые хараба.

²¹ Пётр урдань Иисүүсэй тэрэ модондо юумэ хэлэжэ байһыень һанаад: – Рабби, харыт! Танай хараалда хүртэһэн модон хаташоод байнал, – гэжэ багшадаа хэлэбэ.

²² Иисүүс харюудань хэлэбэ: – Бурханда һүзэгтэй байгты!

²³ Хэрбээ Бурханда һүзэгтэй, зүрхэ сэдьхэлдээ ямаршье һэжэг маргалтагүй һаа, уулада хандан: «Эндэһээ хүдэлөөд, далай руу һүрэ» гээ һаатнай, захирһан бүхэнтнай бүтэхэ гэжэ Би баталан хэлэнэб.

²⁴ Тиимэһээ Бурханда зальбаржа юумэ гуйхадаа, ямаршье эриһэн юумэеэ заабол абахаб гэһэн этигэлтэй байгты, тиигэбэл тэрэ юумэеэ абахат.

²⁵ Баһа таанад зальбаржа байхадаа, хэн нэгэндэ гомдолтой һаа, тэрэ хүнөө хүлисэгты. Тиигэбэл тэнгэридэ оршодог Эсэгэтнайшье танай нүгэлые хүлисэхэ.

Иисүүсэй эрхэ засаг тухай асуудал

²⁷ Иисүүс шабинартайгаа дахин Иерусалим ерэбэ. Һүмөөр ябахадань, Тэрээндэ түрүү санаартан, ахамадууд, Хуули заадаг багшанар ойртобо.

²⁸ – Та иимэ юумэ хэхэ ямар эрхэтэйбта? Иимэ эрхэ засаг Танда хэн үгөөб? – гэжэ һурабад.

²⁹ Иисүүс: – Бишье таанадһаа нэгэ юумэ һурахамни. Хэрбээ харюу үгэбэлтнай, иимэ юумэ хэхэ ямар эрхэтэй байһанаа таанарта хэлэхэб.

³⁰ Хэлыт даа, уһаар арюудхаха эрхэ Иоаннда Бурхан үгөө гү, али хүнүүд гү? – гэжэ урдаһаань асууба.

³¹ Нүгөөдүүлынь хоорондоо шэбэнэлдэбэ: – Хэрбээ Бурханһаа тиимэ эрхэ үгтөө гэбэлнай, тиигэбэл юундэ Иоаннда этигэдэггүй байгаабта гэхэл.

³² Нүгөө талаһаа, хүн зон булта Иоанные лүндэншэн гэжэ тоолодог. Тиимэһээ уһаар арюудхаха эрхэ тэрээндэ юрэ хүнүүд үгөө гэхын аргагүйбди. Тэдэнэр хүн зонһоо айжа байгаа ха юм.

³³ Тиимэһээ тэдэнэр Иисүүстэ: – Бидэ мэдэнэгүйбди, – гэжэ харюусаба. Тиихэдэнь Иисүүс: – Эдэ юумэнүүдые хэхэ эрхэ Намда хэнэй үгэһые Би баһа хэлэхэгүйб! – гэбэ.