Марк 1 - Библи

¹ Энэ болбол Бурханай Хүбүүн Иисүүс Христоос тухай Һайн Мэдээсэл юм.

² Тэрэнь Исай лүндэншын ном соо Бурханай иигэжэ айладаһанай ёһоор эхилнэ: «Шинии ябаха харгы бэлдэхыень Би түрүүндэшни Эльгээмэлээ ябуулнаб»,

³ баһа «Эзэнэй ябаха замыень бэлдэгты, алхаха харгыень дардам сэхэ болгогты гэжэ хэн бэ даа сүл губида хашхарба».

⁴ Сүл губида Уһаар Арюудхагша Иоанн бии боложо: – Нүгэл шэбэлнүүдээ хүлисүүлхын тула Бурханда хандан, уһаар арюудхуулагты, – гэжэ айладхаба.

⁵ Иудейн можоһоо, Иерусалимһаа олон зон Иоанные шагнахаяа ошобо. Тэдэнэр нүгэл шэбэлнүүдээ мэдэрэн гэмшэбэ, тиин Иоанн тэдэниие Иордан голдо шунгуулан уһаар арюудхаба.

⁶ Иоанн тэмээнэй нооһон хубсаһа үмдөөд, һур бэһэ бэһэлээд ябадаг, таршаагаар ба зэрлиг зүгын балаар хооллодог бэлэй.

⁷ – Хойноһоомни ерэхэ Хүн намда орходоо аргагүй ехэ һүр жабхалантай юм. Би бүгтыгөөд, Тэрэнэй гуталайнь ооһорыешье тайлаха эрхэгүйб.

⁸ Би таанадые уһаар арюудханаб, харин Тэрэ таанадые Арюун Һүлдөөр арюудхаха юм, – гээд Иоанн номнодог бэлэй.

Иисүүсые уһаар арюудхалга

⁹ Уданшьегүй тэдэ үдэрнүүдтэ Галилей можын Назарет хотоһоо Иисүүсэй ерэхэдэнь, Иоанн Тэрэниие Иордан голдо шунгуулан уһаар арюудхаба.

¹⁰ Уһанһаа гарахатайгаа сасуу Иисүүс огторгойн нээгдэхые, Арюун Һүлдын гулабхаагай дүрсэтэйгөөр дээрэнь буухые хараба.

¹¹ – Ши хайрата Хүбүүмниш, сэдьхэлыемни баярлуулнаш, – гэһэн абяан тэнгэриһээ дуулдаба.

¹² Тиигэмсээрнь Һүлдэ Иисүүсые сүл губи руу ябуулба.

¹³ Тэндэ Иисүүс дүшэн үдэрэй туршада шолмосоор туршуулан, зэрлиг ан арьяатанаар хамта байлсаа, зүгөөр Бурханай Эльгээмэлнүүд Тэрээндэ туһалжа байгаа.

Иисүүс дүрбэн загаһашадые дуудана

¹⁴ Иоанные барижа түрмэдэ хааһан хойнонь Иисүүс Галилей можо ерэжэ, Бурханай Һайн Мэдээсэл номнобо.

¹⁵ – Таарамжатай саг ерэбэ! Бурханай хаан түрэ мандаха дүтэлөө. Нүгэл шэбэлээ орхижо, Һайн Мэдээсэлдэ этигэгты! – гэжэ Тэрэ айладхаба.

¹⁶ Нэгэтэ Галилей далайн хажуугаар ябахадаа, тэрэ Симон ба Андрей гэдэг тэрэнэй ахые хараба. Тэдэ хоёр загаһашад гүльмэеэ далайда хаяжа байгаа.

¹⁷ – Намтай ябалсагты, Би таанадые загаһа барихын орондо хүнүүдые Намда хандуулхада һургахаб, – гэжэ Иисүүс тэдэ хоёрто хэлэбэ.

¹⁸ Тэдэнэр дары гүльмэеэ орхёод, Иисүүсэй хойноһоо ябаба.

¹⁹ Тэндэһээ саашалжа ябатараа, Тэрэ Зэбэдэйн хүбүүдые, Яков ба Иоанн гэдэг аха дүүнэрэй онгосо соо һуугаад, гүльмэеэ заһажа байхыень харамсаараа,

²⁰ дуудаба. Тэдэнь Зэбэдэй эсэгэеэ хүдэлмэришэдтэйнь хамта онгосодонь орхёод, Иисүүстэй ябаба.

Ада шүдхэртэ дайруулһан хүн

²¹ Иисүүс шабинартайгаа хамта Капернаум хото ерэжэ, субботын болоходо мүргэлэй гэртэ орожо, хүн зониие һургаба.

²² Тэрэнэй һургаал шагнаһан хүнүүд булта ехээр гайхадаг һэн, юундэб гэхэдэ, тэрэ Хуули заадаг багшанарта адляар бэшэ, харин эрхэ засаг баригшада адляар улад зониие һургажа байгаа.

²³ Тэрэ мүргэлэй гэртэ ада шүдхэртэ барюулһан хүн орожо:

²⁴ – Назаредэй Иисүүс, Та бидэниие яаха гээбта? Та маниие хосороохоёо ерээ гүт? Би Таниие мэдэхэб, Та Бурханай Арюун Хүбүүнта, – гээд хашхарба.

²⁵ – Абяа аниргүй болоод, энэ хүнһөө гара! – гэжэ Иисүүс шангаар ада шүдхэртэ захирба.

²⁶ Тиигэхэдэнь ада шүдхэр үнөөхи хүнөө ехээр орилуулан, шангаар хашхараад, бэеһээнь гаража арилба.

²⁷ Хүн зон булта аргагүй ехээр гайхажа, бэе бэедээ: – Энэ юун бэ? Һүр хүсэтэй шэнэ һургаал байнал! Яаһан ехэ эрхэ засагтайб? Ада шүдхэрнүүдшье Тэрэнэй үгэ дууланал, – гэлдэбэ.

²⁸ Уданшьегүй Иисүүс тухай һураг бүхы Галилейн можоор хаа хаанагүй тараба.

Иисүүс олон хүнүүдые аргалан эдэгээбэ

²⁹ Иисүүс Яков Иоанн хоёр шабинартайгаа хамта мүргэлэй гэрһээ гараад, Симон Андрей хоёройдо ошобо.

³⁰ Иисүүсэй ерэхэдэ Симонэй хадам эжын ехэ халууржа хэбтэбэ.

³¹ Иисүүс тэрэ эхэнэрэй хажууда ерэжэ, гарһаань баряад бодхообо. Тиихэдэнь халууниинь бууража, эхэнэр айлшадаа хүндэлжэ оробо.

³² Үдэшэлэн, наранай ороходошье, Иисүүстэ үбшэн зониие, ада шүдхэрнүүдтэ барюулһан хүнүүдые асаржал байгаа.

³³ Хотын зон бултадаа шахуу гэрэй үүдэндэ сугларба.

³⁴ Иисүүс элдэб үбшэнтэй олон зониие эдэгээбэ, олон ада шүдхэрнүүдые намнажа гаргаба. Тэрэнэй Бурханай табисуурта байһыень ада шүдхэрнүүдэй мэдэжэ байһан хадань, юумэ хэлэхыень тэдээндэ Тэрэ хорибо.

Иисүүс Галилейн можоор номноно

³⁵ Иисүүс хойто үглөөнь хара үүрээр бодоод, гэрһээн гаража нэгэ эзэгүй газарта ошоод, Бурханда зальбарба.

³⁶ Тиихэдэнь Симон ба Тэрээнтэй ябаһан зон хойноһоонь гаража бэдэрбэ.

³⁷ Һүүлдэнь Тэрээниие олоод: – Бүхы зон Таниие бэдэрнэл, – гэбэ.

³⁸ – Дүтэ оршодог ондоо тосхонуудаар ябая, Би тэндэхи зондо баһал номнохо ёһотой хүм, тиимэ зорилготойгоор иишэ ерээб, – гэжэ Иисүүс харюусаба.

³⁹ Тиигэжэ Тэрэ бүхы Галилей можын мүргэлэй гэрнүүд соо һургаалаа номножо, ада шүдхэрнүүдые даража байгаа.

Иисүүс үбшэнтэй хүниие аргалан эдэгээбэ

⁴⁰ Иисүүстэ арһанай бузар үбшэнтэй хүн ерэжэ, үбдэглэн урдань унаад, Тэрэниие гуйба: – Хэрбээ Та хүсэбэл, намайе арюудхан эдэгээхэ аргатайт.

⁴¹ Иисүүс тэрэ хүниие хайрлаад, гараа һарбайжа тэрээндэ хүрөөд: – Эдэгээхэ хүсэлтэйб, арюун болыш даа, – гэбэ.

⁴² Тэрэ дары арһанайнь бузар үбшэниинь арилжа, үнөөхи хүмнай арюун сэбэр болобо.

⁴³ Тиигээд эмнүүлһэн хүндөө хэлэбэ:

⁴⁴ – Энээн тухай ши хэндэшье бү хэлээрэй. Зүгөөр санаартада сэхэ ошожо, бэеэ үзүүлэ, тиигээд аргалуулһанаа хүн бүхэндэ гэршэлхын тула ши Моисейн зарлигай ёһоор үргэл хээрэй.

⁴⁵ Зүгөөр үнөөхи хүниинь гараад, эмнүүлһэн тухайгаа хүн бүхэндэ хөөрэбэ. Тиимэһээ Иисүүсэй энэ хотодо үзэгдэхэ байхын аргагүй болоходо, Тэрэ хотоһоо гаража эзэгүй газарта ошоо һэн. Тиигэбэшье хүн зон Тэрээндэ газар бүхэнһөө ерэжэ байгаа.