Малаахи 3 - Библи

¹ «Харагты, шинии ябаха харгы бэлдэхыень би уридшалан Өөрынгөө Эльгээмэлые ябуулнаб. Таанарай бэдэрдэг Эзэн гэнтэ Өөрын Һүмэдэ ерэхэ болоно. Таанарай баярлан хүлеэһэн хэлсээнэй Эльгээмэл, харагты, Тэрэ ерэжэ байна» гэжэ Түмэн Сэрэгтэ Эзэн айладажа байна.

² «Гэбэшье Тэрэнэй ерэхэ үдэр хэн тэсэжэ гарахаб? Тэрэнэй үзэгдэхэдэ хэн зогсожо шадахаб? Тэрэ арюудхагша гал мэтэ, сэбэрлэгшэ сабан шэнги юм.

³ Тэрэ мүнгэ хайлуулан сэбэрлэһэн мэтэ һуужа, Левиин хүбүүдые сэбэрлэхэ болоно. Тэрэ тэдэниие алта мүнгэн хайлуулһан шэнги үнэн шударга байдалда оруулжа, Эзэндэ тахил үргэхэ болоно.

⁴ Тиин Иудын ба Иерусалимай үргэл эртын үдэрнүүдтэ, урдын жэлнүүдтэ шэнги Эзэнэй нюдэндэ дулаан, урин болохо.

⁵ Удаань шүүлгэ хэхэеэ Би таанарта ойртохо болоноб. Би мэргэлдэг хүнүүдтэ, садарлагшадта, хэрэг шүүлгэдэ хуурмагаар тангариглагшадта, хүлһэнэй ажалшадые луйбардагшадта, бэлбэһэн эхэнэрнүүдые ба үншэн хүүгэдые дарлагшадта, ерүүл хүнүүдые харшалагшадта болон Намһаа нарилан айдаггүй хүнүүдтэ эсэргүү гэршэ болохоб», – гэжэ Түмэн Сэрэгтэ Эзэн айладажа байна.

Зөөриингөө арбанай нэгэ хубиие Эзэндээ үргэхэеэ бү мартагты

⁶ «Юуб гэхэдэ, хубилдаггүй Эзэнби, тиимэһээ Яковай хүбүүд һүнэхэгүй.

⁷ Анханһаа таанад минии хуули сахяагүйт. Танай үбгэ эсэгэнэршье Минии захяа заабари сахихаяа болёо һэн. Нам тээшэ бусажа ерэгты, Бишье таанадта бусажа ерэхэб» гэжэ Түмэн Сэрэгтэ Эзэн айладажа байна. «Бидэ яажа бусан ерэхэ болонобибди?» гэжэ таанад асуужа болохот.

⁸ Хүнүүд Бурханиие мэхэлхэ ёһогүй. Гэбэшье таанад Намайе мэхэлжэ байнат. «Яахадаа Таниие мэхэлһэн болонобибди?» гэнэт. Таанад бүхы зөөриингөө арбанай нэгэ хубиие үгэхэ, мүн Намда онсо үргэл хэхэ ёһотой байгаат.

⁹ Тиигэжэ танай үндэһэтэн бүхэлидөө Намайе мэхэлжэ байгаа хадаа хараалда ороһон байнат. Иигэжэ Түмэн Сэрэгтэ Эзэн айладажа байна.

¹⁰ «Минии үргөөдэ зөөриингөө арбанай нэгэ хубиие асаржа ерэгты. Тиигэжэ Намайе туршагты. Би таанадай түлөө тэнгэриин сонхо нээжэ, эбигээл үршөөл халитар хүртөөхэб» гэжэ Түмэн Сэрэгтэ Эзэн айладажа байна.

¹¹ «Ургасыетнай хорхой шумуул эдихээ болихо, үзэмэй модон жэмэсээ унагаахагүй» гэжэ Түмэн Сэрэгтэ Эзэн айладажа байна.

¹² «Нютаг оронтнай баяртай хүүртэй болохо, бүхы үндэһэ яһатан таанадые үреэлдэ хүртэһэн гэжэ дуудаха болоно» гэжэ Түмэн Сэрэгтэ Эзэн айладажа байна.

Үнэн шударга зондо шагнал

¹³ «Таанарай үгэ Минии урдаһаа эсэргүү бардам байгаа» гэжэ Түмэн Сэрэгтэ Эзэн айладажа байна. Гэбэшье таанар «Бидэ Танда эсэргүү юу хэлээ һэмбибди?» гэнэт.

¹⁴ «Бурханда үйлэ бүтээхэ гээшэ ашаггүй. Тэрэнэй һургаал сахижа, Түмэн Сэрэгтэ Эзэнэй үмэнэ гашуудан ябахань ямар ашаг үрэ үгэхэ гээшэб?

¹⁵ Мүнөө ехэрхүү бардам хүнүүдые үреэлдэ хүртэһэн гэжэ хэлэнэ. Муу үйлэ хэгшэд урда гарана. Тэдэ Бурханиие туршажа, нүгэл үйлэдэнэ, харин Бурхан тэдэниие хэһээнэгүй» гэдэг.

¹⁶ Бурханһаа хэмшээрхэдэг хүнүүдэй бэе бэетэйгээ хөөрэлдэхэдэ, Эзэн анхаралаа табин шагнадаг. Эзэндэ һүгэдэдэг болон Тэрэнэй нэрэ үнэлдэг хүнүүдэй түлөө дурдалгын ном Тэрэнэй урда бэшэгдээ бэлэй.

¹⁷ «Өөрын эзэмшэлһэн орон байгуулхадам, тэдэ Минии байха болоно. Өөртэнь үйлэ бүтээдэг хүниие үршөөдэгтэй адли Би тэдэниие үршөөхэб» гэжэ Түмэн Сэрэгтэ Эзэн айладажа байна.

¹⁸ Тиихэдэ таанар дахяад Намда ерэхэт, һайн муугай, зүб буруугай хоорондохи илгаа, Бурханда һүгэдэдэг үнэн шударга хүнэй ба нүгэл үйлэдэгшын хоорондохи илгаа ойлгохот.