Малаахи 2 - Библи

¹ Таанад санаартад, энэ хадаа захяа заабари гээшэ, анхаран шагнагты.

² Түмэн Сэрэгтэ Эзэн айладажа байна: «Хэрбээ таанад хэлэһыем шагнахагүй, Минии нэрэ хүндэлхын тулада энээниие сэдьхэлдээ хүлеэн абахагүй һаатнай, Би хэһээлтэ буулгахаб. Минии алдар нэрэ үргөөгүй байбал, танай абаһан үреэл һөөргэ сухаряад хараал болохо. Ушарынь хадаа таанад Минии нэрэ хүндэлнэгүйт.

³ Хаража байгты, би таанадай уг удамуудые хэһээхэб. Найрай үедэ санаартад үргэл хэһэн малай гэдэһэ дотор, шабааһа шээһэ хаядаг. Танай нюурта шабааһыень нялажа, тэрэ хог шабааһантай адли таниие гаргажа хаяха.

⁴ Левийтэй баталһан хэрээ хэлсээ үргэлжэлүүлхын тулада Минии һургаал заабари ябуулһаниие таанад мэдэжэ байгты», – гэжэ Түмэн Сэрэгтэ Эзэн айладажа байна.

⁵ – Би Левийтэй хэлсээ баталхадаа, ами наһа ба энхэ амгаланиие үршөөжэ, айха түбэгшөөхэ зүйл болгожо үгөө һэм. Тиимэһээ тэрэ Намайе хүндэлэн, Минии нэрэһээ айдаг байгаа.

⁶ Тэрэ үнэн һургаал хэдэг байгаа, үнэн шударга бэшэ юумэн тэрэнэй аманһаа унаагүй. Тэрэ Намтай суг энхэ амгаланда эрмэлзэн, үнэн шударга замаар алхажа, олониие гэм нүгэлһөө зайлуулаа.

⁷ Санаартан Бурханай һургаал хамгаалха, тэрэнэй аманһаа гараһан заабари үгые хүнүүд бэдэрхэ ёһотой. Ушарынь хадаа тэрэ Эзэнэй элшэ болоно.

⁸ Харин таанад, санаартад, харгыһаа хадууржа, зониие бүдэрүүлжэ, нүгэл хүүлэжэ байнат. Таанад Минии Левийтэй баталһан хэлсээ эбдэжэ байһан зонта, – гэжэ Эзэн хэлэнэ,

⁹ – Тиигэжэ таанад Минии зам сахинагүйт, харин заабари элдэбээр тайлбарилан гуйбуулжа байнат. Тэрээнэйтнай түлөө Би таанадые арад түмэнэй урда хүндэгүй болгожо, баһамжалуулхаб.

Хариин бурханай үхинтэй гэрлэлгэ буруушаагдана

¹⁰ Бидэ булта нэгэ эсэгэтэй бэшэ гүбди? Нэгэ Бурхан бидэниие бүтээгээ. Яахадаа аха дүүнэр бэе бэедээ урбан, үбгэ эсэгэнэрэймнай Бурхантай баталһан хэлсээ эбдэхэ болооб?

¹¹ Иуда эсэргүү бодол гаргажа, Израильда болон Иерусалимда жэгшүүритэ үйлэ хэгдэбэ. Тэрэ Эзэниие шүтэдэг газарые бузарлажа, хариин бурханай үхинтэй гэрлээ.

¹² Иимэ үйлэ хэдэг уладые, Эзэндэ үргэл хэдышье хээ һаань, Эзэн Яковай майханһаа зайлуулха.

Залуугайнгаа хани халуун нүхэртэ бү урба

¹³ Таанар Эзэнэй үргэлэй шэрээ нулимсаар, уйлаан ёологоор бүтээдэг, тиимэһээ Тэрэ саашадаа үргэлыетнай харанашьегүй, танай гарһаа талархалтайгаар абахашьегүй байна.

¹⁴ «Юундэ Эзэн манай үргэл абанагүйб?» гэжэ асуужа болохот. Юундэб гэхэдэ, Эзэн шинии нүгэл хэлгын гэршэ болоно. Өөрынгөө һамгые мэхэлхыеш хараһан байна. Ши залуудаа тэрэ һамга абаа һэнши. Тэрэ шинии хани халуун нүхэр байгаа, хожомынь заяата эхэнэршни болоо. Эзэн тэрээнэй гэршэ болоно.

¹⁵ Үбгэн һамган хоёр хадаа бэе хүсэл ниилүүлжэ, нэгэ сэдьхэлтэй, һүнэһэ һүлдэтэй боложо, үри удамтай болог гэжэ Бурхан хүсөө. Тиигэбэл һүнэһэндөө анхаралаа таби. Залуудаа абаһан эхэнэртээ хара һанаа һанаашалжа бү бай.

¹⁶ Ушарынь хадаа Би һамганһаа һалахые, эрэшүүлэй хүсэрхэлые үзэн ядадагби, – гэжэ Эзэн, Израилиин Бурхан айладажа байна. «Өөрын һүнэһөөр өөрыгөө хамгаалжа, этигэлдээ урбажа бү байгты» гэжэ Түмэн Сэрэгтэ Эзэн айладана.

Эзээн зарга шүүлгэ хэхэеэ ерэхэ

¹⁷ Таанар өөрын үгөөр Эзэниие ядараагаат. «Муу юумэ үйлэдэһэн хүн бүхэн Эзэнэй мэлмыдэ һайн, Тэрэ тэдэниие өөгшөөдэг» гэжэ гү, али «Үнэн шударга ёһын Бурхан хаана байнаб?» гэжэ хэлэжэ байхадаа, Эзэнэй уур хүргэнэт.