Лука 23 - Библи

¹ Зүблэлэй гэшүүд булта бодожо, Иисүүсые Пиладта абаашаад,

² – Энэ хүн арад зонииемнай үймүүлнэ, худхуулна, Римэй хаанда алба татабари түлэхые хорино, Өөрыгөө Бурханай табисууртаб гэжэ нэрлэнэ, – гэжэ Тэрэниие зэмэлбэ.

³ – Та еврейнүүдэй хаан гүт? – гэжэ Пилат Иисүүсһээ һураба. – Та тиигэжэ хэлэнэт, – гэжэ Иисүүс тэрээндэ харюусаба.

⁴ – Энэ хүниие зэмэлхээр ямаршье баримта олоногүйб, – гэжэ Пилат түрүү санаартанда ба арад зондо хэлэбэ.

⁵ – Энэтнай хүн зониие үймүүлхэ, хүлгөөхэ үгэ Галилейһээ эхилээд, эндэ хүрэтэр бүхы Иудей соогуур тараажа ябана, – гэжэ тэдэнь үсэдөөр хэлэбэ.

Иисүүс Иродэй урда

⁶ Иигэжэ хэлэхыень шагнаад: – Энэ хүнтнай Галилейн юм гү? – гэжэ Пилат һураба.

⁷ Иисүүсые Иродэй захирдаг можоһоо ерэһэн хүн байна гэжэ мэдэхэдээ, Ирод хаандань эльгээбэ. Эгээл тэрэ үедэ Ирод өөрөө Иерусалим ерээд байгаа.

⁸ Иисүүсые харахадаа, Ирод аргагүй баярлаба, юундэб гэхэдэ, урдань Тэрээн тухай дуулаһан, Тэрэниие хараһайб гэжэ үнинэй хүсэдэг һэн. Ямар нэгэн гайхамшагша хэрэг бүтээхыень үзэхэ гэжэ найдадаг байгаа.

⁹ Ирод Тэрээнһээ олон юумэ асууба, теэд Иисүүс тэрээндэ харюу үгэбэгүй.

¹⁰ Хажуудань байһан түрүү санаартан ба Хуули заадаг багшанар Иисүүсые хатуугаар зэмэлжэл байба.

¹¹ Ирод сэрэгшэдтэеэ хамта Иисүүсые баһан доромжолоод, хаанай хубсаһа үмдэхүүлжэ, Пиладта һөөргэнь эльгээбэ.

¹² Энээнэй урда тээ хоорондоо дайсан харша байһан Ирод Пилат хоёр тэрэ үдэрһөө ехэ хани нүхэд болоо бэлэй.

Иисүүсые үхэлэй саазада хүртөөбэ

¹³ Пилат түрүү санаартаниие, ноёдые, арад зониие дуудажа хэлэбэ:

¹⁴ – Израилиин зониие үймүүлжэ ябана гэжэ зэмэлэн, таанад Энэ Хүниие намда асарбат. Харин би танай хараһаар байтар мүрдэлгэ хэхэдээ, танай тохоһон тиимэ зэмэтэй байһыень тодоруулбагүйб.

¹⁵ Тиихэдэ Ирод хааншье зэмыень олонгүй, Энээниие намда эльгээгээ. Энэ хүн саазада хүртэхөөр ямаршье муу юумэ хээгүй.

¹⁶ Тиимэ хадань, Энэ Хүниие хэһээгээд, табихаб, – гэжэ Пилат хэлэбэ.

¹⁸ Теэд бүхы зон: – Энээниие саазалагты, харин Бараббаае бидэндэ табигты! – гэжэ хашхаралдаба.

¹⁹ Иерусалимда буһалгаан үүсхээд, хүнүүдые алаһанайнь түлөө Бараббаае шорондо хааһан байгаа.

²⁰ Иисүүсые табиха хүсэлэнтэй Пилат дахяад зондо хандажа, үгэ хэлэбэ.

²¹ – Тэрээниие хэрээһэндэ хада, хэрээһэндэ хада! – гэжэ тэдэнь хашхаралдаба.

²² – Ямар гэмтэй юумэ Тэрэ хээб? Саазада хүртэхөөр гэмтэй байһыень би тодоруулаагүйлби. Тиимэһээ Энээниие хэһээгээд лэ табихаб, – гэжэ Пилат гурбадахияа тэдээндэ хэлэбэ.

²³ Гэбэшье тэндэ байһан зон Иисүүсые хэрээһэндэ хадажа алаха ёһотой гэһэн эрилтэ табижа, шангаар хашхаралдаба. Саашадаа тэдэнэй хашхаралдаан улам шангадажа байба.

²⁴ Тиимэһээ Пилат тэдэнэй эрилтые дүүргэхэ гэжэ шиидэбэ.

²⁵ Буһалгаа татажа, хүнүүдые алаһанай түлөө түрмэдэ һууһан Бараббаа гэгшые Пилат зоной шаардаһан ёһоор табиба, харин Иисүүсые тэдэ зоной хүсэһэн ёһоор саазада хүртөөхэ болобо.

Иисүүсые хэрээһэндэ хадаба

²⁶ Иисүүсые сэрэгшэдэй абаад ябахадань, замдань Хэрээн нютагай Симон гэжэ хүн хээрэ ажаллаад бусажа ябаа. Тэрээндэ хэрээһэ үргэлүүлээд, Иисүүсэй хойноһоо ябуулба.

²⁷ Иисүүсэй хойноһоо тоолошогүй олон зон дахажа, эхэнэрнүүдынь Тэрээниие хайрлаһандаа үбсүүгээ шаан уйлалдаба.

²⁸ Иисүүс тэдээн тээшэ эрьен, иигэжэ хэлэбэ: – Иерусалимай эхэнэрнүүд, Намайе хайрлажа бү уйлалдагты; өөһэдыгөө хайрлажа, үхибүүдээ хайрлажа бархиралдагты.

²⁹ «Хэбэлдээ үри бүрилдүүлээгүй, үхибүү түрөөгүй, хүхөө хүхүүлжэ үзөөгүй эхэнэрнүүд амар жаргалтай!» – гэхэ саг ойртожо байна.

³⁰ Тиимэ сагай ерэхэдэ: «Маанад дээрэ уныт» гэжэ хада уулануудта, «Маанадые хушыт» гэжэ гүбээнүүдтэ хүнүүд хандаха.

³¹ Зэмэгүй хүнтэй тиимэ юумэнэй боложо байхада зэмэтэй хүнтэй юун болохоб гэжэ һананат?

³² Иисүүстэй хамта үшөө хоёр хүниие – хоёр гэмтэниие саазалхаяа абаашаа.

³³ «Хохимой» гэдэг газарта ерээд, Тэрэниие хэрээһэндэ хадаба, харин нүгөө гэмтэдэй нэгыень баруун таладань, нүгөөдыень зүүн таладань хэрээһэндэ хадажархиба.

³⁴ – Эсэгэ Бурхамни, эдэниие хүлисыт. Эдэ юуш хэжэ байһанаа өөһэдөө мэдэнэгүй, – гэжэ Иисүүс зальбарба. Харин саазалагшад жээрэб татажа, хубсаһыень дундаа хубаажа абаба.

³⁵ Арад зоной хаража байтар еврейнүүдэй ноёд: – Бурханай табисуурта юм һаа, бусадые абарһандаал адли Өөрыгөө абарыт! – гэжэ доромжолон хэлэбэ.

³⁶ Сэрэгшэдшье элдэбээр баһажа, уксус үгэхэ зуураа:

³⁷ – Хэрбээ Та еврейнүүдэй хаан юм һаа, Өөрыгөө абарыт! – гэлдэбэ.

³⁸ Иисүүсэй дээрэнь «Энэ еврейнүүдэй хаан» гэжэ грек, рим, еврей хэлэнүүдээр бэшэгдэһэн хабтагай үлгөөтэй байгаа һэн.

³⁹ – Та Бурханай табисуурта бэшэ аалта? Өөрыгөөшье, манииешье абарыт! – гэжэ хэрээһэндэ хадуулһан гэмтэнэй нэгэн Иисүүсые шоглон баһаба.

⁴⁰ Харин нүгөөдэхинь тэрэ нүхэрөө зэмэлэн: – Өөрөө саазалуулжа байһан аад, иигэжэ дуугархаяа Бурханһаа айнагүй аалши?

⁴¹ Ехэ гэм хэһэн маниие зүб иигэжэ хэһээжэ байна, харин энэ Иисүүс ямаршье муу юумэ хээгүй, – гэбэ.

⁴² Тиигээд Иисүүстэ хандажа: – Иисүүс аа, Та Хаан шэрээдээ һуухадаа намайе һанажа байгаарайт, – гэжэ тэрэ хэлэбэ.

⁴³ – Мүнөөдэр ши Намтай диваажан орондо ошолсохош гэжэ шамда үнэниие хэлэнэб! – гэжэ Иисүүс тэрээндэ харюусаба.

Иисүүс ами табиба

⁴⁴ Хахад үдэр боложо байгаа. Гэнтэ бүхы газар дэлхэй дээрэ үдын гурбан саг болотор шэб харанхы болошобо:

⁴⁵ наран хиртэшэбэ. Тиигээд Һүмэдэ хоёр хүшэгын нэгэниинь тэг дундуураа шуу хахарба.

⁴⁶ – Эсэгэмни, Танай мэдэлдэ һүнэһөө ябуулнаб! – гэжэ Иисүүс шангаар үгэлэн, ами табиба.

⁴⁷ Эдэ бүгэдые хараһан зуунай дарга Бурханиие алдаршуулан магтаад: – Энэ хүн үнэхөөрөө үнэн сэдьхэлтэн байгаал даа, – гэбэ.

⁴⁸ Аймшагтай үзэсхэлэн һонирхон харахаяа эндэ сугларһан бүхы зон болоһон бүгэдые хаража сошолдон, үбсүүгээ шаажа уйлалдаһаар гэр гэртээ тарабад.

⁴⁹ Иисүүсые таниха, мэдэхэ зон, Галилейһээ Тэрэниие дахажа ерэһэн эхэнэрнүүд тээ холохоно зогсоод, хаража байгаа һэн.

Иисүүсые хүдөөлүүлбэ

^50-51 Тэндэ баһа Иудей можын Аримафей хотын Иосиф гэдэг хүн байба. Тэрэ үнэн сэхэ, сагаан сэдьхэлтэй хүн Бурханай хаан ороной мандахые ехэл хүлеэжэ байгаа. Тэрэ баһа Зүблэлэй гэшүүн аад, Зүблэлэй гаргаһан шиидхэбэриие, үйлэдэһэн хара хэрэгые яашье зүбшөөжэ шадахагүй байба.

⁵² Тэрэ Пиладта ошожо, Иисүүсэй бэе үгэхыень гуйба.

⁵³ Тиигээд хэрээһэнһээ Иисүүсэй шарилые буулгажа, бүдөөр орёогоод, хабсагайда түнхигдэһэн, урдань хэнэйшье хэбтээгүй агы нүхэндэ абаашажа хадагалаа һэн.

⁵⁴ Тэрэ үдэр болбол субботын бэлэдхэл үдэр, пятница байгаа.

⁵⁵ Галилейһээ Иисүүстэй ерэлсэһэн эхэнэрнүүд Иосифой мүрөөр ошожо, түнхинэгдэһэн агы нүхэ, Иисүүсэй шарилые тэндэ хадаглахые хараба.

⁵⁶ Тиигээд тэдэнэр гэртээ харижа, элдэб янзын хангалтай ургамалай тоһо бэлдэбэ. Теэд субботодо тэдэнэр Хуулида заагдаһан ёһоор амарба.