Лука 21 - Библи

¹ Иисүүс тойрожо харахадаа, зарим баяшуулай үргэлнүүдээ Һүмын үргэлэй санда табижа байхые хараба.

² Нэгэ бэлбэһэн ядуу эхэнэрэй хоёр жэжэ мүнгэ тэндэ табихые хараад,

³ Иисүүс хэлэбэ: – Энэ үгытэй ядуу бэлбэһэн эхэнэр хэнһээш ехэ үргэл үргэбэ.

⁴ Бусад зоной үлүү гараһан юумэеэ асаржа санда табихадань, энэ эхэнэр үгытэй ядуу байбашье, хоолойгоо тэжээхэ бии үгы юумэеэ дууһан үргэбэ.

Һүмын һандаралга

⁵ Гоё һайхан үнэтэ шулуугаар, үргэлэй юумээр шэмэглэгдэһэн Һүмэ тухай зарим хүнүүдэй хөөрэлдэхэдэ:

⁶ – Эндэ үзэжэ байһан юумэнһээтнай хожом нэгэтэ ганса шулууншье үлэхэгүй, хуу баран һандаргагдаха, – гэжэ Иисүүс хэлэбэ.

Зоболон гашуудал, хашан мүрдэлгэ

⁷ – Багша аа, тиимэ юумэн хэзээ болохоб? Тэрэнэй болохын урда ямар дүлгэ тэмдэгүүд харуулагдахаб? – гэжэ Иисүүсһээ асуубад.

⁸ Иисүүс хэлэбэ: – Һэргэлэн байгты, хүнэй мэхэдэ бү орогты. Юуб гэхэдэ, олон хүнүүд Минии нэрые зүүжэ ерэхэ: «Би Бурханай табисууртаб», – гэжэ өөһэд тухайгаа гэршэлхэ, «Зарга шүүбэриин саг ойртобо», – гэжэ Минии нэрэһээ хэлэхэ. Тэдэнэй үгэдэ бү этигэгты!

⁹ Дайн тухай гү, али буһалгаан тухай дуулахадаа бү айгаарайгты: тиимэрхүү юумэнүүд эхиндэнь болохо ёһотой, зүгөөр тэрэ дары юумэнэй эсэс болохогүй.

¹⁰ Иисүүс саашань үргэлжэлүүлбэ: – Нэгэ арад нүгөө арадтаа добтолон орохо, хаан оронууд хоорондоо хёморолдон тэмсэхэ.

¹¹ Аймшагтайгаар газар хүдэлхэ, зарим газарта үхэл тахал, үлэсхэлэн зоболон дэлгэрхэ. Һүртэй үзэгдэлнүүд, муу ёрото тэмдэгүүд тэнгэридэ үзэгдэхэ.

¹² Зүгөөр, эдэ бүхы юумэнүүдэй болохын урда тээ таанадые Намтай холбоотой байһанайтнай түлөө барижа хааха, хашан мүрдэхэ. Таанадые мүргэлэй гэртэ гэмнэхэ, түрмэдэ хааха. Таанадые хаашуулда болон зонхилогшодто абаашажа мүшхүүлхэ.

¹³ Харин энэтнай таанадай Һайн Мэдээсэл айладхахынтнай тушаан болохо.

¹⁴ Тиигээд өөһэдыгөө хамгаалжа юу хэлэхэ тухай эртэнһээ һанаагаа бү зобооройгты.

¹⁵ Юу хэлэхые мэдэхэ ухаа Би таанадта үршөөхэб. Танай хэлэһэн юумые нэгэшье дайсантнай буруушаажа гү, али һөөргэдэжэ шадахагүй.

¹⁶ Тэрэ үедэ аба эжытнай, аха дүүнэртнай, түрэл һаданартнай, хани нүхэдтнай таанадта урбаха. Заримантнай алуулха.

¹⁷ Минии түлөө таанадые булта үзэн ядаха.

¹⁸ Гэбэшье тархиинтнай нэгэшье үһэн унахагүй.

¹⁹ Намда үнэн сэхэ байһанайнгаа ашаар таанад абарагдахат.

Иерусалим һандаргагдаха

²⁰ – Иерусалимай хариин сэрэгүүдээр хүреэлөөтэй байхые харахадаа, һандаржа һалаха сагынь ерээ гэжэ мэдээрэйгты.

²¹ Тиихэдэ Иудейдэ байһан хүнүүд хада гүбээ рүү тэрьедээрэйгты. Хотодо байгшад бултадаа тэндэһээ зугадажа гараарайгты. Хүдөө тосхонуудта байһан хүнүүд тэрэ хотодо бү орооройгты.

²² Юундэб гэхэдэ, Нангин Бэшэг соо хэлэгдэһэн ёһоор тэрэ «Хэһээлтын үдэрнүүд» байха юм.

²³ Тэдэ үдэрнүүдтэ хээлитэй, хүхөөр үхибүүдтэй эхэнэрнүүдтэ ехэл гай зоболон тудаха. Газар дэлхэй дээрэ хаа-хаанагүй хүнүүд гайтайгаар зобохо, аймшагтай хэһээлтэдэ орохо.

²⁴ Зарим зон һэлмээр таһа сабшуулха, нүгөө зариманиинь хариин гүрэнүүдтэ богоол болон абаашагдаха. Бусад арадуудай захирха үе сагай дүүрэтэр хариин зон Иерусалимые гэшхэжэ дэбһэжэ байха.

Хүн түрэлхитэнэй Хүбүүнэй ерэлгэ

²⁵ – Тиихэдэ нара һаратай, одо мүшэдтэй ойлгогдохогүй юумэнүүд болохо, газар дэлхэй дээрэхи хүн зон эжэ эхиеэ алдаха, уһан далай оёороороо долгилжо, аймшагтай үер халиха.

²⁶ Тиигээд гай оһол болохонь гэжэ айһан зон ухаа мэдээгээ алдаха, юундэб гэхэдэ, тэнгэриин хүсэнүүдшье тэнсүүриеэ алдаха бшуу.

²⁷ Эгээл тэрэ үедэ үүлэ дамжан Хүн түрэлхитэнэй Хүбүүнэй агуу хүсэтэйгөөр, алдар солотойгоор газарта буужа ябахань харагдаха.

²⁸ Эдэ бүгэдэ юумэнүүдэй бэелжэ эхилхэдэ таанад хүл дээрээ бодожо, толгойгоо үргөөрэйгты, юундэб гэхэдэ, абарагдаха сагтнай ерэбэ гээшэ.

Боди модонһоо абтаһан үльгэр жэшээ

²⁹ Удаань Иисүүс тэдэндэ иимэ һургаалта үгэ хөөрэбэ: – Таанад боди модон болон ондоо олон мододые хараад үзэгты.

³⁰ Модоной набша намаагайнь һалбархада, зунай саг дүтэлбэ гэжэ мэдэдэгта.

³¹ Тон тиигэжэл Минии түрүүн хэлэһэн юумэнүүдэй болохые үзэхэдөө, Бурханай хаан түрын мандахань бүри ойртоо гэжэ мэдэхэт.

³² Мүнөө ажамидаржа байһан хүнүүдэй бултанайнь үхэжэ үрдеэгүй байхада, Минии таанадта хэлэһэн бүхы юумэн тохёолдохо гэжэ баталан хэлэнэб.

³³ Огторгой тэнгэри, газар дэлхэйшье һүнэн һалаха, харин Минии хэлэһэн үгэнүүд мүнхэ оршохо.

Һэргэлэн байгты

³⁴ Хүлеэгээгүй байтартнай занга мэтээр тэрэ сагай гэнтэ дээрэтнай буужа таанадые барихагүйн тула үзэмэй дараһан архида шунангүй, хубиингаа хэрэгтэ дашуурангүй, бэеэ эртэнһээ бэлдэжэ байгаарайгты.

³⁵ Ушарынь юуб гэбэл, газар дэлхэй дээрэ ажамидарһан хүн амитанда бултандань тэрэ саг гэтэн гэнтэ ерэхэ бшуу.

³⁶ Тэрэ сагта тохёолдохо хамаг аюул дабажа гарахын тула, Хүн түрэлхитэнэй Хүбүүнэй урда зохистой байхын тула үргэлжэ зальбаржа, һэргэг хёрхо байгты!

³⁷ Иисүүс үдэртөө Һүмэ соо һургаалаа номнодог, һүүлээрнь Элеон хадада гаража, һүниеэ үнгэргэдэг байгаа.

³⁸ Тиигээд эртэ үглөөнһөө хамаг зон һургаалыень шагнахаяа Һүмэ соо суглардаг байгаа.