Лука 2 - Библи

¹ Тэрэ үедэ Римэй хаан Август гэгшэ орон дайдынгаа бүхы зоной тоо бүридхэхэ гэһэн зарлиг гаргаба һэн ха.

² Тэрэнь Сири уласые Квириниин зонхилжо байха үедэ хэгдэһэн хүн зоной анха түрүүшын тоо бүридхэл бэлэй.

³ Хүн зон булта нэрээ бэшүүлхэеэ өөһэдынгөө түрэһэн хото ошожо байгаа.

⁴ Давидай обогһоо уг гарбалтай Иосиф гэгшэ Галилейн Назарет хотоһоо гаража, Давид хаанай тоонто нютаг болохо Иудейн Бэтлэһээм хото руу мүн лэ нэрээ бэшүүлхэеэ ошобо.

⁵ Тиихэдээ үхибүү түрэхөө байһан, һамганиинь болохо Мариятайгаа хамта ошобо.

⁶ Бэтлэһээмдэ ерээд байхадань, Мариягай хүнгэрхэ сагынь ерэжэ,

⁷ тэрэ ууган хүбүүгээ түрөө һэн. Тэрэнээ мансылаад, малай эдюур соо абаашажа табиба, юундэб гэхэдэ, зоной буудаг газарта тэдээндэ һуури хүртөөгүй һэн.

Малшад

⁸ Тэрэ сагта Бэтлэһээмһээ холо бэшэ талада малшад һүниндөө малаа манажа хонодог һэн ха.

⁹ Тэдээндэ гэнтэ Бурханай Эльгээмэл буужа, Эзэн Бурханай алдарай гэрэлэй туяархада, малшад айхын ехээр айн һүрдэбэ.

¹⁰ Эльгээмэл тэдээндэ хэлэбэ: – Бү айгты! Би бүхы арад зониие ехэтэ баясуулха һайн мэдээсэл таанадта дуулгахаяа ерээб:

¹¹ мүнөөдэр Давид хаанай хотодо танай Абарагша түрэбэ, Бурханай табисуурта Эзэн мүндэлбэ.

¹² Тэрэниие иимэ дүлгэ тэмдэгээр танихат: мансытай Тэрэ Хүбүүхэнэй малай эдюур соо хэбтэхые харахат.

^13-14 Гэнтэ дээрэһээ үй түмэн Бурханай Эльгээмэлнүүд буужа: – Дээдын огторгойдо Бурхан алдаршаһай! Бурханай хайра дура татадаг хүн бүхэн газар дэлхэй дээрэ амгалан тэнюун ажаһууһай! – гэжэ Бурханда магтаал соло дуудаба.

¹⁵ Эльгээмэлнүүдэй огторгойдоо бусахадань: – Бэтлэһээм хото ошожо, энэ ушарһан бүхэниие хараял, Эзэнэй хэлээшыень үзэел! – гэжэ малшад бэе бэедээ хэлэбэ.

¹⁶ Тиигээд тэдэнэр яаралтайгаар хото ошожо, Мария Иосиф хоёрые, мүн малай эдюур соо хэбтэһэн Хүбүүхэниие хараба.

¹⁷ Иисүүсые хараад, тэдэ малшад Энэ Хүбүүн тухай Эльгээмэлэй хэлээшые зондо хөөрэбэ.

¹⁸ Малшадай хэлэһэн юумэ дуулаһан хүнүүд булта гайхажа байгаа.

¹⁹ Тиин Мария эдэ үгэнүүдыень сэдьхэл зүрхэндөө бүхөөр хадуужа, һанажа дурдажа ябадаг һэн.

²⁰ Малшад Эльгээмэлэй дуулгаһые нюдөөрөө хараһанайнгаа, шэхээрээ дуулаһанайнгаа түлөө Бурханда алдар соло дуулан, магтан гэртээ харибад.

Хүбүүндэ Иисүүс гэжэ нэрэ үгэбэ

²¹ Хүбүүхэнэй түрэһөөр найман үдэрэй үнгэрһэн хойно бэлгэ отолуулха ёһололой болоходо, эхынь хээлитэй болохын урда тээ Эльгээмэлэй айладхаһан ёһоор нарай нялхада Иисүүс гэжэ нэрэ үгтөө һэн.

Симеон Эзэндэ магтаал соло дуудана

^22-24 Моисейн Хуулида бэшэгдэһэнэй ёһоор: «Эхын хээлиһээ гараһан ууган хүбүүдээ Эзэн Бурханда зорюулха ёһотой». Тиихэдээ хоёр түүтэй шубуу гү, али хоёр залуу тагтаа тахил болгон үргэхэ зэргэтэй. Тиин Моисейн Хуулиин ёһоор арюудхалгын ёһолол хэхэ болзор Мария Иосиф хоёртошье тудаба. Тэдэ хоёр Иисүүс хүбүүгээ Эзэндэ зорюулха гэжэ Иерусалим абажа ерэбэ.

²⁵ Боди һайхан сэдьхэлтэй, Бурханда бэшэрэн һүгэдэдэг, Арюун Һүлдэдэ хүртэһэн Симеон гэжэ хүн Иерусалим хотодо ажаһуугаа. Тэрэ хүн Израилиин абарагдахые хүлеэжэ байгаа.

²⁶ «Эзэн Христоосые хараагүйдөө ши үхэхэгүйш!» – гэжэ Арюун Һүлдөөр Симеондо элирхэйлэгдэһэн байгаа.

²⁷ Арюун Һүлдөөр хүтэлэгдэн, Симеоной Һүмэ соо ороод байхада, эхэ эсэгэ хоёр Хуулида заагдаһан ёһо бүтээхэ гэжэ нялха Иисүүс хүбүүгээ асарба.

²⁸ Симеон Тэрэ хүбүүень гар дээрээ абажа, Бурханда баяр баясхалан хүргэбэ:

²⁹ – Эзэмни, Та амалһанаа дүүргэбэт, богоол намайгаа мүнхэдөө амархыемни мүнөө табижа байнат.

³⁰ Эльгээһэн Абарагшыетнай би нюдөөрөө үзэбэб.

³¹ Бусад арадуудшье булта Тэрэ Абарагшыетнай харахал:

³² Тэрэтнай бүхы угсаатаниие гэгээрүүлхэ гэрэл болохол, Израилиинтнай арадта алдар соло асархал.

³³ Иисүүс тухай Симеоной хэлэһэн эдэ үгэнүүдые дуулахадаа, Иосиф Мария хоёр ехээр гайхаба.

³⁴ Симеон тэдэ хоёрые адислаад, Иисүүсэй эхэ Марияда хэлэбэ: – Израильда олониие унагаажа һүнөөхын, мүн олониие һэргээжэ абархын тула Бурхан энэ Хүбүүниие шэлэжэ абаа. Энэ Хүбүүн һэргылһэн һүлдэ тэмдэг болохо. Олон зон Энээниие буруушаажа,

³⁵ сэдьхэл һаналаа элирхэйлхэ. Мүн шиниишье зүрхэ сэдьхэлые уйдхар зоболон хурса жадаар хадхаһандал адляар зобоохо.

³⁶ Һүмэ соо Ашээр обогой Фануил гэдэг хүнэй удам болохо Анна лүндэншэн байгаа. Тэрэ наян дүрбэтэй хүгшэн залуудаа хадамда гарабашье, долоон жэл нүхэртэеэ һуугаад, һүүлдэнь бэлбэһэн боложо үлөө.

³⁷ Мүнөө тэрэ үдэр һүнигүй Бурханда мүргэжэ, масаг сахижа, Һүмэһөө холододоггүй һэн.

³⁸ Энэшье үедэ эндэ ерэжэ, Бурханда магтаал соло дуудажа, Иерусалимай эрхэ сүлөөтэй болохые хүлеэжэ найдажа байһан хүн бүхэндэ Иисүүс нялха тухай хөөрэжэ үгэбэ.

Назарет хото руугаа хариба

³⁹ Эзэнэй Хуулида тогтоогдоһон бүхы юумые хэжэ дүүргээд, Мария Иосиф хоёр Галилейн Назарет хото гэртээ бусажа ерэбэ.

⁴⁰ Хүбүүхэн боргожон бэежэжэ, һүбэлгэн, хурса ухаатай, Бурханай буян хэшэгтэй үхибүүн ургажа байба.

Иисүүс Һүмэ соо

⁴¹ Жэл бүри Паасхын һайндэртэ Иисүүсэй аба эжынь Иерусалим ошодог байгаа.

⁴² Хүбүүнэйнгээ арбан хоёртойдо тэдэ жэл бүри һайндэртэ ошодог заншалаараа Иерусалим ошобо.

⁴³ Һайндэрэй дүүрэхэдэ Иисүүс Иерусалимда үлэбэ, гэбэшье гэртээ бусажа ябаһан түрэлхидынь хүбүүнэйнгээ үлэшэһые ойлгоогүй бэлэй.

⁴⁴ Хүбүүмнай суг ябаһан хүнүүдээрээ ябаа юм ааб даа гэжэ һанаад, бүхэли үдэртөө замда ябаһанайнгаа һүүлээр түрэл гарал болон танил хүнүүдэйнгээ дунда Тэрэнэйнгээ үгы байхые ойлгожо,

⁴⁵ бэдэрхэеэ һөөргөө Иерусалим бусаа һэн.

⁴⁶ Хэдэн хоног бэдэрээд, гурбадахи үдэртөө Иисүүс хүбүүгээ Һүмэ соо олобо. Тэрэнь багшанарай дунда һуушанхай, номнолынь шагнажа, Өөрөө тэдэнһээ юумэ һуража байгаа.

⁴⁷ Өөртэнь табигдаһан асуудалнуудта хурса тодо харюу үгэхыень шагнаад, Һүмэ соо байгшад булта сэсэн ухаатайень гайхажа байба.

⁴⁸ Хүбүүгээ хараад, Иосиф Мария хоёр ехэтэ гайхаба. – Хүбүүмни, юундэ бидэниие иигэжэ зобообош? Эсэгэ бидэ хоёршни шамайгаа үгы болгоод, һанаагаа зобоһон, бэдэрһэн гээшэмнай! – гэжэ эхэнь хэлэбэ.

⁴⁹ – Юундэ Намайе бэдэрээ зомта? Намайе Эсэгынгээ гэртэ байха ёһотой гэжэ мэдэхэгүй аалта? – гэжэ хүбүүниинь харюусаба.

⁵⁰ Түрэлхидынь хүбүүнэйнгээ хэлэһэн үгэнүүдэй үнэн удха ойлгобогүй.

⁵¹ Иисүүс аба эжытэйгээ Назарет хотодоо бусажа ерээд, үгөөрнь байба. Мария эхэнь тэрэ болоһон ушар мартахагүйгөөр ой ухаандаа хадуун абаа.

⁵² Харин Иисүүс сэсэн ухаагаараа, энэрхы сэдьхэлээрээ Бурхандашье, хүн зондошье һайшаагдан үдэжэ, ехэ боложо байгаа һэн.