Лука 14 - Библи

Иисүүс үбшэнтэниие эдэгээбэ

¹ Субботодо фарисейнүүдэй хүндэтэй нэгэ даргында хоол барихаяа Иисүүсэй ерэхэдэ, фарисейнүүд хойноһоонь ажаглан хаража һуубад.

² Нэгэ хабадашаһан хүл гартай хүн орожо, урдань зогсобо.

³ Хуули заадаг багшанарта болон фарисейнүүдтэ Иисүүс хандажа: – Манай Хуулиин ёһоор субботодо хүниие аргалжа болохо бэлэй гү, али үгы гү? – гэжэ асууба.

⁴ Тэдэнэр абяа гарабагүй. Иисүүс үбшэнтэниие гараараа хүрөөд, эдэгээжэрхибэ.

⁵ – Танай хэнтнай хүбүүнэйгээ гү, али сарайгаа худаг руу унашабалынь, субботошье һаань, тэрэ дороо татажа гаргахагүйб? – гэжэ Иисүүс тэдээндэ хэлэбэ.

⁶ Тэдэнь тороод, юуншье гэжэ хэлэжэ шадабагүй.

Даруу номгон байха, айлшадые угтажа абаха тухай

⁷ Уряалаар ерэһэн хүнүүдэй дээгүүр һуурида һуухыень хараад, Иисүүс иимэ һургаалта үгэ хөөрэбэ:

⁸ – Шамайе хэн нэгэнэй түрэ найрта урихада, дан дээгүүр гаража бү һуу, юундэб гэхэдэ, уряалаар ерэһэн хүнүүдэй дунда шамһаа хүндэтэй хүн байжа болохо.

⁹ Тиигээд шамайе болон тэрэ хүниие уриһан гэрэй эзэн ерээд: «Энэ һуурида тэрэниие һуулгыш даа», – гэхэдээ болохо. Тиихэдэнь ши аягүйрхэһөөр адагай захын һуурида ошожо һуухаш.

¹⁰ Уряалаар ошоходоо, эгээн һүүлшын һуурида һуудаг байгаарай. Тиихэдэшни шамайе уриһан эзэн хараад: «Хани нүхэрни, дээшээ гаража һуу», – гэжэ урихадань, найрай зоной дунда ехэ хүндэтэй хүн гэжэ мэдэгдэхэш.

¹¹ Ушарынь юуб гэхэдэ, өөрыгөө дээгүүр абхуулһан хүн доошоо даруулагдаха, харин даруу доогуур хүн дээшээ үргэгдэхэ бшуу.

¹² Гэртээ уриһан фарисейдэ Иисүүс иигэжэ хэлэбэ: – Үдын гү, али үдэшын хоол бэлдээд, хани нүхэдөө, аха дүүнэрээ, түрэл саданараа, баян хүршэнэрөө бү ури. Юуб гэхэдэ, тэдэшни хожомынь шамайгаа урижа, харюу үгэхэ болоно.

¹³ Зүгөөр найрай шэрээ татахадаа, үгытэйшүүлые, үбшэн үлбэр, һохор дохолон хүнүүдые ури.

¹⁴ Тэдэ ядуу зон ашыеш харюулжа шадахагүй. Гэбэшье Бурхан шамда буян хэшэгээ хайрлаха, тиигээд захяа заабарииень дүүргэжэ ябадаг хүнүүдээ амидыруулхадаа, шамайе шагналда хүртөөхэл.

Найрай шэрээ тухай һургаалта үгэ

¹⁵ Сугтаа хоол барижа байһан нэгэ хүн Иисүүсэй хөөрэжэ байһые дуулаад: – Бурханай хаан орондо хоол бариха хүнүүд аза жаргалтай! – гэжэ хэлэбэ.

¹⁶ Иисүүс тэрээндэ хэлэбэ: – Нэгэ хүн аргагүй томо найрай шэрээ заһаад, олон айлшадые уриба ха.

¹⁷ Шэрээдэ һууха сагай ерэхэдэ, уриһан айлшадтаа барлагаа эльгээжэ, «Хоол бэлэн болоо, морилжо хайрлагты», – гэжэ захюулба гэхэ.

¹⁸ Урилгатай хүнүүдынь булта хоорондоо хэлсэһэн юумэндэл, ерэхэ аргагүй байһандаа хүлисэл гуйжа: «Би газар худалдажа абаад, тэрэнээ ошожо хараагүйдэм аргагүй. Намайе хүлисэхыетнай гуйнаб», – гэжэ нэгэниинь захюулба.

¹⁹ «Би табан паара сар худалдажа абаад, тэдэнээ ажаллуулжа туршахам, намайе хүлисэжэ хайрла», – гэжэ нүгөөдэхинь захюулба.

²⁰ «Би һаял һамга абабаб, тиимэһээ ошожо шадахагүй байнаб», – гэжэ гурбадахинь захюулба.

²¹ Барлагынь ерэхэдээ, айлшадай ерэхэ аргагүй байһан тухай эзэндээ дуулгаба. Тиихэдэнь сухалаа хүрэһэн эзэн: «Түргэхэн хотын гудамжада гараад, үгытэйшүүлые, эрэмдэг үбшэнтэниие, һохор дохолон зониие дуудажа асара», – гэжэ барлагтаа хэлэбэ.

²² «Эзэмни, хэлэһэн ёһоортнай хамаг юумэ хэбэб, теэд үшөөшье олон һуури сүлөө байна», – гэжэ барлагынь хэлэбэ.

²³ «Ши хотоһоо гараад, харгыгаар ябаһан, хото хорёондоо байһан хүнүүдые аргадажа, гэрэймни дүүрэтэр зониие абажа ерэ.

²⁴ Уряалтай байһан хүнүүдэй хэнииньшье манайда хоол барихагүй!» – гэжэ эзэниинь барлагтаа хэлэбэ.

Иисүүсэй шаби болохын үнэ сэн

²⁵ Иисүүстэй хамта олон хүн ябаа һэн. Иисүүс тэдэ зондо хандажа, иигэжэ хэлэбэ:

²⁶ – Намда ерэһэн хүнүүд эхэ эсэгэһээ, һамга үхибүүдһээ, аха дүүнэрһээ, ами наһанһаа үлүү ехээр лэ Намда дуратай һаа, шабинарни болохо аргатай.

²⁷ Хэрээһээ үргэлөөд, Намтай ябалсаагүй хүн Минии шаби боложо шадахагүй.

²⁸ Жэшээнь, таанадай хэн нэгэн үндэр гэр бариха һанаатай байбал, түрүүн һуугаад, хэды шэнээн гаргаша гаргахаб гэжэ тооложо үзөөд, барилгаяа дүүргэжэ шадаха үгы байһанаа бодогты.

²⁹ Тиигээгүй һаа, һуурииень табяад, самхагаа саашань барижа дүүргэхэ шадалгүй байхыетнай зон хараад:

³⁰ «Шимнай барилга эхилээд, дүүргэжэ шадахагүй хүн байбалши», – гэжэ энеэдэ наадан болгохо бшуу.

³¹ Үгышье һаа, нэгэ хаан нүгөөдэ хаанда дайгаар орохынгоо урда тээ арбан мянган сэрэгтэйгээ добтолоо һаа, хори мянган сэрэгтэй дайсаниие диилэхэ гүб гэжэ уридшалан һуужа һайн бодохо бэшэ гү?

³² Хэрбээ диилэжэ шадахагүйгөө ойлгоо һаа, нүгөөдэдөө өөрынгөө элшэн һайдуудые эльгээжэ, эб найрамдал тухай гуйха болоно бшуу.

³³ Энэ мэтээр таанадай хэнтнайшье бии байһан хамаг юумэнһээ арсаагүй һаа, Минии шаби боложо шадахагүй.

Хэрэггүй дабһан

³⁴ Дабһан болбол һайн юумэн гээшэ, зүгөөр дабһанай амтаяа гээгээ һаань, яажа дахин гашуун болгохобта?

³⁵ Тиимэ дабһан хэндэшье хэрэггүйл, угайдхадаа тэрээгээр газараашье үтэгжүүлхэгүйлши. Тэрэниие миил хаяжархихал! Шэхэтэй юм һаа, анхаран шагныта!