Лука 10 - Библи

¹ Тэрэнэйнгээ һүүлээр Иисүүс үшөө далан хоёр хүниие шэлэжэ абаад, Өөрынгөө ошохо гэһэн хото хүдөө руу хоёр хоёроор эльгээхэдээ, иигэжэ захиба:

² – Ургаса ехэ байна, теэд тэрэниие суглуулха хүнүүдынь үсөөн лэ. Тиимэһээ ургасаяа суглуулха хүдэлмэрилэгшэдые ябуулхыень Ургасын Эзэндэ зальбарагты.

³ Ябагты даа! Һүрэг шононууд руу хурьгадые тууһан мэтэл таанадые эльгээнэб.

⁴ Мүнгэншье, туламшье, гуталшье бү абажа ябагты, харгыдаа хүниие мэндэшэлжэ сагаа бү гээгты.

⁵ Ямаршье айлда ороходоо, анха түрүүн: «Танай гэр бүлынхид амгалан тайбан һуухатнай болтогой!» – гэжэ юрөөгөөрэйгты.

⁶ Хэрбээ тэндэ амгалан тайбаниие хүсэдэг хүнүүдэй ажамидардаг юм һаань, танай юрөөһэн амгалан тайбантнай тэдэн дээрэ тогтохо; харин амгалан тайбаниие хүсэдэггүй зоной байбалнь, тэрэтнай таанартаа бусаха.

⁷ Бууһан айлдаал хоножо, үгэһэн юумыень эдижэ, уужа байгты: хүдэлмэрилэгшэ ажалайнгаа түлөөһэ абаха эрхэтэй бшуу. Айлнуудые һэлгэжэ бү гүйгты.

⁸ Тиигээд али нэгэн хотодо ороходотнай, хүн зоной таанадые угтажа абабал, үгэһэн юумыень эдигты.

⁹ Тэндэхи үбшэнтэниие эдэгээгты, тиигээд: «Бурханай хаан түрэ эндэтнай мандаха дүтэлөө», – гэжэ зондо хэлэжэ ябагты.

¹⁰ Али нэгэн хотодо ороходотнай, тэндэхи зоной таанадые угтажа абаха дурагүй байбалнь, гудамжада гараад:

¹¹ «Таанадые һэргылэн, хүлдэмнай халдаһан хотынтнай тооһыешье гүбижэ таанадта орхинобди. Зүгөөр Бурханай хаан түрэ мандаха дүтэлөө гэжэ мэдэгты!» – гээрэйгты.

¹² Зарга шүүбэриин болохо Үдэр таниие угтажа абаагүй хотынхид Содом хотынхидһоо бүри үлүү аймшагтай хэһээлтэдэ хүртэхэ. Зүгөөр Содом хотынхидые ямар аймшагтайгаар хэһээхэб гэжэ бодоод үзэгты.

Һүзэггүй хото

¹³ Хоразиин хотынхид, таанад уй гашуудал үзэхэт! Бэтсаидаа хотынхид, таанад уй гашуудал үзэхэт! Хэрбээ танай хотонуудта бүтээһэн гайхамшагта хэрэгүүдээ Тиир Сидоон хотонуудта үзүүлһэн байбални, тэдэ хотын зон үни гэһээр Бурханда хандаха һэн. Тэдэнэр хахархай хубсаһа үмдэжэ, тархи дээрээ үнэһэ адхажа нүгэлнүүдээ гэмшэһэнээ баталха бэлэй.

¹⁴ Тиин Зарга шүүбэриин болохо Үдэр Бурхан Тиир, Сидоон хотынхидтэ таанадта орходоо бүри үршөөл хайратайгаар хандахал.

¹⁵ Капернаум хотынхид, таанад огторгойдо алдаршаха һанаатай байна гүт? Таанад тамын оёорто унахат!

¹⁶ Түлөөлэгшэдни, таанадые шагнажа байһан хүнүүд Намайешье шагнана, таанадые буруушааһан хүнүүд Намайешье буруушаана. Харин Намайе буруушааһан хүнүүд Намайе иишэ эльгээһэн Бурханиие буруушаана, – гэжэ хэлэбэ.

Далан хоёр түлөөлэгшэд бусажа ерэбэ

¹⁷ Далан хоёр түлөөлэгшэдынь хото хүдөөгөөр ябаһанаа ехэ баяртай бусажа ерээд: – Эзэн аа, Танай нэрэһээ захирхадамнай ада шүдхэрнүүдшье үгыемнай дуулана, – гэжэ хэлэбэд.

¹⁸ Тиихэдэнь Иисүүс тэдээндээ хэлэбэ: – Тэнгэриһээ сатанагай сахилгаан мэтээр доошоо унаһые Би хараһан байнаб.

¹⁹ Шагнагты даа, могой болон хорото абаахайнуудые, мүн хамаг дайсадай хүсые дараха засаг таанадта барюулааб. Тиимэһээ таанадта ямаршье хүсэн хоро хэжэ шадахагүй.

²⁰ Таанад ада шүдхэрнүүдые мэдэлдээ оруулһандаа бэшэ, харин нэрэеэ тэнгэридэ бэшүүлһэндээ баярлагты!

Иисүүс Эсэгэдээ баяр баясхалан хүргэнэ

²¹ Энэ үедэ Арюун Һүлдын Иисүүсые баяраар дүүргэхэдэ, Тэрэ: – Газар тэнгэриин Эзэн, Эсэгэмни! Сэсэн мэргэн, эрдэм номтой зонһоо далдалан нюуһан юумэеэ эгээлэй юрын зондо нээжэ элирүүлһэнэйтнай түлөө Танда баяр баясхалан хүргэнэб. Зүб даа, Эсэгэмни, Та иимэл юумэнэй болохые хүсэжэ байгаа ха юмта.

²² Бүхы юумэ Эсэгэмни Намда үгөө. Эсэгэһээ ондоо хэншье Хүбүүе мэдэхэгүй, мүн Хүбүүнһээ, баһа Хүбүүнэй дуулгаһан хүнүүдһээ ондоо хэншье Эсэгые мэдэхэгүй, – гэжэ айладхаба.

²³ Тиигээд Иисүүс шабинартаа аминдань хандан хэлэбэ: – Таанадай хаража байһан юумые хараһан хүн аза жаргалтай.

²⁴ Олон лүндэншэд, хаашуул таанадай хаража байһан юумые харахые ехээр хүсэбэшье, хараагүй, таанадай дуулажа байһан юумые дуулаха дуратай байгаад, дуулажа шадаагүй гэжэ таанадта хэлэнэб.

Энэрхы сэдьхэлтэй самаряан хүн

²⁵ Нэгэ Хуули заадаг багша һууриһаа бодожо, Иисүүсые туршаха хүсэлтэйгөөр: – Багша аа, мүнхэ амидаралтай байхын тула би юу хэхэ ёһотойбиб? – гэжэ асууба.

²⁶ – Хуули соо юун гэжэ бэшээтэй байдаг бэ? Тэрэниие яажа ойлгодогбта? – гэжэ Иисүүс урдаһаань һураба.

²⁷ – «Эзэн Бурхандаа бүхы зүрхэ сэдьхэлээрээ, бүхы амин һүлдөөрөө, бүхы хүсэ шадалаараа, бүхы ухаан бодолоороо дуратай бай», баһа «Дүтын хүндөө өөртөөл адли дуратай бай» гэжэ тэндэ бэшээтэй байдаг, – гэжэ тэрэнь харюусаба.

²⁸ – Ши зүб харюусабаш. Эдэ заабаринуудые дүүргэжэ ябаа һаа, ши мүнхэ амидаралтай байхаш, – гэжэ Иисүүс тэрээндэ хэлэбэ.

²⁹ Харин Хуули заадаг багша бэеэ сагааруулхые оролдон: – Дүтымни хүн хэн болоноб? – гэжэ Иисүүсһээ һураба.

³⁰ Иисүүс тэрэ дороо харюусаба: – Нэгэ хүн Иерусалимһаа Ерихоон хото руу ошожо ябаба ха. Харгыдаа тэрэ дээрмэшэдтэ баригдашаба гэхэ. Дээрмэшэд байһан юумыень буляажа абаад, зада сохёод, арай амиды голтой юумые орхёод зугадаба.

³¹ Тушаан боложо нэгэ санаартан тэрэ харгыгаар ябаа. Гэбэшье тэрэниие хараад, хажуугаарнь гарашаба.

³² Баһа нэгэ левит хүн тэрэ газартань ерэжэ, хэбтэһэн хүниие хараад, хажуугаарнь гарашаба.

³³ Мүн тэрэл харгыгаар ябаһан нэгэ самаряан хүн гэмтэгшые хараад, хажуудань ерээд, аргагүй ехээр хайрлаба.

³⁴ Шархыень улаан архяар угаагаад, тоһо түрхин уяба, элжэгэндээ һуулгажа, зоной буудаг газарта абаашаад, тэрэ хүнөө харууһалжа хонобо.

³⁵ Хойто үдэрынь айлшадай буудаг газарай эзэндэ хоёр динари мүнгэ үгөөд, «Энэ хүниие харууһалжа байгаарай, үлүү гаргаша гаргаа һааш, бусаха замдаа түлэхэб», – гэбэ.

³⁶ Тиигээд Иисүүс нүгөө Хуули заадаг багшаһаа: – Юун гэжэ һананаш, эдэ гурбанай хэниинь дээрмэшэдтэ сохюулһан хүндэ эгээн ойро дүтэ болоноб? – гэжэ һураба.

³⁷ – Хайрлажа, амиинь абарһан хүн, – гэжэ нүгөөдынь харюусаба. – Шишье тиимэ юумэ хэжэ ябаарай! – гэжэ Иисүүс тэрээндэ хэлэбэ.

Марфа Мария хоёр

³⁸ Замда ябажа байхадаа Иисүүс шабинартаяа нэгэ тосхондо хүрэбэ. Марфа гэжэ нэрэтэй нэгэ эхэнэр Тэрэниие гэртээ оруулжа хүндэлөө.

³⁹ Тэрэ эхэнэрэй Мария дүүнь Эзэнэй хүлдэнь һуугаад, хэлэһэн үгыень шагнаба.

⁴⁰ Харин Марфа айлшанаа хүндэлхэ гэжэ туха сүлөөгүй хүдэлнэ. Тиигээд Иисүүстэ дүтэлжэ: – Эзэн аа, энэ минии дүүгэй хамаг ажалаа нам дээрэ хаяад байхыень харанагүй гүт? Эгэшэдээ туһала гэжэ дүүдэм хэлыт, – гэбэ.

⁴¹ – Марфа, нүхэрни, ши дан олон юумэндэ һанаагаа табижа, хаанааш хүрэнэгүйш.

⁴² Харин нэгэл юумэндэ гол һанаагаа табиха хэрэгтэй. Мария дүүшни дэмбэрэлтэ һайхан хэрэг шэлэнхэй, тэрэнииень хэншье болюулжа шадахагүй, – гэжэ Иисүүс айладхаба.