Лука 1 - Библи

¹ Эрхим хүндэтэ Теофил! Манай дунда болоһон ушар ябадалнууд тухай туужа олон зон бэшэхэ гэжэ һэдэнэ.

² Эхинһээнь байлсаһан, болоһон бүгэдые хараһан зоной маанадта хөөрэһые тэдэ нүхэд буулгажа бэшэнэ.

^3-4 Бишье баһа болоһон бүгэдые эхинһээнь нарин нягтаар шудалаад, шамда номногдоһон һургаалай сохом үнэниие мэдэжэ байхыншни тула тохёолдоһон бүгэдые үнэн байдалаарнь хойно хойноһоонь дараалан шамда бэшэжэ дамжуулха гэжэ шиидэбэб.

Уһаар Арюудхагша Иоаннай мүндэлэлгэ айладхагдаба

⁵ Иудейн орон нютагые Ирод хаанай зонхилжо байхада Захарияа ба Елизавета гэжэ нэрэтэй үбгэ һамга хоёр ажаһуугаа: үбгэниинь Абияа бүлэгэй санаартан, тиин һамганиинь Аарон гэжэ ахамад санаартанай үри һадаһан мүн байгаа.

⁶ Тэдэ хоюулан Бурханай хүсэл бодото дээрэнь бэелүүлэн, Хуулиин захяа заабаринуудые жэншэдгүй һайханаар сахидаг һэн.

⁷ Елизавета һамганиинь анханай үригүй байжа, тэдэ хоёр үндэр наһа наһалтараа үхибүүгүй байгаа.

^8-9 Нэгэтэ Захарияа санаартанай Бурханда алба хэхэ уялгата үдэрэй ерэхэдэ, тэрээндэ жээрэбээр Эзэнэй Һүмэ соо орожо, сан табиха ехэ үршөөл тудаба.

¹⁰ Сан санзай уталгын тэрэ үедэ үй түмэн зон Һүмын хорёо соо мүргэжэ байба.

¹¹ Харин Һүмэ дотор сан табидаг шэрээгэй баруун таладань гэнтэ Бурханай Эльгээмэл бии болобо.

¹² Тэрэниие хараад, Захарияа мэгдэбэ, айба.

¹³ Харин Эльгээмэл хэлэбэ: – Захарияа, бү ай, шинии зальбаралые Бурхан дуулаа, Елизавета һамганшни шамда хүбүү түрэхэ. Хүбүүгээ Иоанн гэжэ нэрлэхэш.

¹⁴ Ши ехээр баярлаха, хүхихэш, тиин үшөөшье олон бусад зон хүбүүнэйшни түрэһэндэ баярлаха,

¹⁵ юундэб гэхэдэ, хүбүүншни Бурханай нюдэндэ агууехэ хүн байха: үзэмэй дараһан архи амсахагүй, бүри эхынгээ умайда байхадаа Арюун Һүлдэ тогтоожо абаха,

¹⁶ Израилиин олон зониие өөһэдынь Бурхан болохо Эзэндэ һөөргэнь бусаажа хандуулха.

¹⁷ Хүбүүншни Эзэнэй урда Элияадал адли һүр хүсөөр, һүнэһэ һүлдөөр дүүрэн ерэхэ. Тиигэжэ үбгэ эсэгэнэрые үри хүүгэдтэйнь эблэрүүлхэ, өөрынхеэрээ ябадаг хүнүүдые Бурханай эрхэ хүсэл бэелүүлхэ тээшэнь тэгүүлхэ. Иигэжэ арад зониие Эзэнтэй уулзуулхада бэлэн болгожо байха.

¹⁸ – Би үбгэрөөб, һамгамнишье наһатай болонхой. Тиимэһээ хэлэһэн үгэнүүдтнай хүсэлдэхэ гэжэ би яагаад мэдэхэ гээшэбиб? – гэжэ Захарияа Эльгээмэлһээ асууба.

¹⁹ – Би болбол Бурханай ойро оршодог Габриһээл гээшэб. Энэ һайн мэдээсэл дуулгахыемни Бурхан намайе шамда эльгээгээ юм.

²⁰ Сагайнгаа ерэхэдэ хүсэлдэхэ эдэ үгэнүүдтэмни этигээгүй юм хадаа, эдэ бүгэдын тохёолдохо үдэр болотор ши аниргүй, дуугаржа шадахагүй ябахаш, – гэжэ Эльгээмэл айладаба.

²¹ Тэрэ үедэ арад зон Захарияагай гарахые хүлеэжэ, Һүмэ соо яагаа удаан болоноб гэжэ гайхажа байгаа һэн.

²² Тэрэнэй Һүмэһөө гараад, дуугаржа шадахагүй байхыень харахадаа, Һүмэ соо хий үзэгдэл хараа байна гэжэ зон ойлгобо. Хэлэгүй болоһон Захарияа гар хургаараа заажа байгаад зонтой ойлголсобо.

²³ Албаяа хэжэ дүүргээд, Захарияа гэртээ хариба.

²⁴ Уданшьегүй тэрэнэй Елизавета һамганиинь хээлитэй болоод, табан һарын туршада гэрһээн гарабагүй.

²⁵ – Одоошье Эзэн намайе үршөөгөө, хүн зоной хэлэ аманһаа хамгаалаа, – гэжэ тэрэ эхэнэр өөртөө хэлэжэ байба.

²⁶ Елизаветын зургаадахи һарадаа ябахада, Бурхан Габриһээл гэдэг Эльгээмэлээ Галилейн Назарет хотодо ажаһуудаг

²⁷ Мария басаганда эльгээбэ. Тэрэ басаган Давид хаанай үри һадаһан болохо Иосиф гэжэ хүнтэй хуби заяагаа холбохоо байгаа.

²⁸ Бурханай Эльгээмэл Марияда ерээд: – Амар мэндэ, аза жаргалтай басаган! Эзэн шамтай байна, шамайе буян хэшэгтээ элбэг дэлбэгээр хүртөөбэ! – гэжэ хэлэбэ.

²⁹ Иимэ юумэ дуулахадаа, Мария ехээр мэгдэжэ сошобо, юун гэбэ гээшэб гэжэ бодобо.

³⁰ – Бү ай, Мария, ши Бурханай буян хэшэгтэ хүртэбэш.

³¹ Ши хүндэ болохош, хүбүү түрэхэш, тэрээндээ Иисүүс гэжэ нэрэ үгэхэш.

³² Тэрэшни агууехэ хүн болохо, Дээдэ Бурханай Хүбүүн гэжэ нэршэхэ. Эзэн Бурхан хүбүүешни үбгэ эсэгэ Давидтайнь адли хаан болгохо.

³³ Тиигэжэ Тэрэ Яковай үри һадаһадые хэтын хэтэдэ захирха, Тэрэнэй хаан түрэ хэзээш һүнэхэгүй, – гэжэ Эльгээмэл хэлэбэ.

³⁴ – Минии хадамда гараагүй байхада яажа тиимэ юумэн болохоб? – гэжэ Мария асууба.

³⁵ Эльгээмэл харюусаба: – Арюун Һүлдэ шам дээрэ бууха, Дээдэ Бурханай хүсэн шамайе хушаха. Тиимэһээл түрэхэ нангин үришни Бурханай Хүбүүн гэжэ нэрлэгдэхэ.

³⁶ Тиихэдэ шинии түрэл садан Елизавета наһатай болоошье һаа, баһал хүбүүтэй болохо гэжэ байна. Үригүй гэжэ хэлүүлдэг байһан аад, мүнөө зургаадахи һара дээрээ ябана.

³⁷ Бурханай хэжэ шадахагүй юумэн үгы ха юм.

³⁸ – Эзэн Бурханай мэдэлдэ ха юмбиб даа. Хэлэһэнтнай бэелхэнь болтогой! – гэжэ Мария хэлэбэ. Тиигээд Эльгээмэл басаганһаа холодобо.

³⁹ Удангүй Мария яаралтайгаар харгыда гаража, хадалиг Иудей уласай хото хүрөөд,

⁴⁰ Захарияагай гэртэ орожо, Елизаветые мэндэшэлбэ.

⁴¹ Мариягай мэндэеэ хэлэхэтэйнь адли Елизаветын хэбэлдэ байһан үхибүүн тэршэлээд абаа һэн ха. Тэрэ дороо Елизавета Арюун Һүлдөөр дүүрэбэ,

⁴² тиигээд шангаар хэлэбэ: – Ши бусад эхэнэрнүүдһээ үлүү ехээр Бурханай үршөөлдэ хүртэбэш, мүн хэбэл соо хэбтэһэн үришни үршөөлдэ хүртэбэ!

⁴³ Минии Эзэнэймни эжы, иимэ һайнаар намда орожо ерэһэндэшни би баяртай байнаб.

⁴⁴ Шинии мэндэшэлгэ дуулахатаймни сасуу, хүбүүмни хэбэл соом баясажа тэршэлээл.

⁴⁵ Эзэн Бурханай айладхаһан үгэ бэелхэ гэжэ этигэһэн ши амар жаргалтайш!

⁴⁶ Тиихэдэнь Мария иигэжэ үгэлбэ: – Би үнэнхэ сэдьхэлһээ Эзэнээ алдаршуулан магтанаб,

⁴⁷ Бурхан тухай, намайе Абарагша тухай сэдьхэн, һүр һүлдэмни урма баяраар халина.

⁴⁸ Ахир жаахан намайе Бурхан хаража, агуу эбигээл хайрадаа хүртөөбэ. Бүхы угсаата зон энээнһээ хойшо намайе амар жаргалтай эхэнэр гэжэ нэрлэдэг болохонь гээшэл.

⁴⁹ Түгэс Хүсэтэ Бурхан туйлай ехэ хэрэг намда бүтээгээл, Тэрэнэй алдар нэрэнь арюун нангин лэ!

⁵⁰ Өөртэнь бэшэрдэг, этигэдэг зониие үршөөл хайрадаа Тэрэ үеын үедэ хүртөөжэ байдаг лэ!

⁵¹ Тэрэ агуу хүсэтэ гараа һунган, ехэрхүү һайзгайнарые һарнюулаа.

⁵² Засаг баригшадые хаан шэрээһээнь буулгаад, доромжологдоһон даруу зониие дээшэнь үргөө.

⁵³ Үлэсхэлэн үгытэйшүүлдэ элбэг дэлбэг юумэ үгөөд, дээрэлхүү баяшуулые гар хооһон ябуулаал.

⁵⁴ Үбгэ эсэгэнэртэмнай амалһанаа Тэрэ гүйсэд бэелүүлээл, Израиль зарасадаа аша туһатай байгаал,

⁵⁵ манай үдэрнүүд хүрэтэр мартангүй Абраһаамда болон тэрэнэй үри һадаһадтань үеын үедэ үршөөл хайраа хайрлажа байгаал!

⁵⁶ Мария гурба һара шахуу Елизаветэтэй хамта байгаад, гэртээ харяа бэлэй.

Уһаар Арюудхагша Иоаннай түрэһэн түүхэ

⁵⁷ Елизаветын хүнгэрхэ саг ерэжэ, тэрэ хүбүү түрэбэ.

⁵⁸ Эзэнэй Елизаветэдэ хүртөөһэн эбигээл хайра арьбажаа гэжэ дуулахадаа, хүршэнэрынь, түрэл саданиинь тэрээнтэй хамта ехэтэ баярлаба.

⁵⁹ Түрэһөөр наймадахи үдэртэнь нарай хүбүүнэй бэлгэ отолуулха ёһололдо зон сугларжа, тэрээндэ Захарияа гэжэ эсэгынь нэрэ үгэхэ гэлсэбэ.

⁶⁰ Тиихэдэнь эхэнь: – Үгы, хүбүүндээ Иоанн гэжэ нэрэ үгэхэбди, – гэбэ.

⁶¹ – Түрэл саданайтнай дунда тиимэ нэрэтэй хүн оройдоо үгыл, – гэжэ Елизаветэдэ хэлэбэд.

⁶² Тиигээд хэн гэжэ нэрэ хүбүүндээ үгэхэбши гэжэ эсэгэһээнь гараараа заажа харуулжа байгаад асуухадань,

⁶³ Захарияа багахан хабтагай асаруулаад, «Хүбүүнэймни нэрэ – Иоанн!» гэжэ бэшэбэ. Зон булта гайхаа һэн.

⁶⁴ Тэрэ дары Захарияагай аман нээгдэжэ, хэлэниинь табигдажа, тэрэ Бурханиие магтажа оробо.

⁶⁵ Энэ ушарһан гайхамшагта үйлэ хэрэг тухай һураг бүхы Иудейн хадалиг улас соогуур таража, хажуугаарнь ажаһуудаг хүршэ зон булта айн һүрдэбэ.

⁶⁶ Дуулаһан зон энээниие сэдьхэлдээ бүхөөр хадуужа: – Энэ хүбүүн хэн юун болохо хаб? – гэлдэбэ. Үнэхөөрөөшье Иоаннай хажууда Эзэнэй оршожо байһань эли байба.

Захарияа Эзэнэй абарал буулгана

⁶⁷ Нарай хүбүүнэй эсэгэ Захарияа Арюун Һүлдөөр дүүрэжэ, иимэ лүндэн табиба:

⁶⁸ – Израилиин Бурхан болохо Эзэндэ алдар соло дуудаял! Аюул тодхорһоо абархаяа Тэрэ арадтаа ерээ.

⁶⁹ Зараса Давидайнгаа үри һадаһадһаа манда һүр хүсэтэй Абарагшые үгөөл.

^70-71 Дайсадһаатнай, таниие үзэн ядагша бүхы зонһоо абархаб гэжэ Тэрэ эртэ урдын сагта арюун лүндэншэдөөрөө дамжуулан,

⁷² үбгэ эсэгэнэртэтнай найдуулһан ёһоор таанадые үршөөл хайрада хүртөөхэб, мүн Өөрынгөө нангин хэлсээ,

⁷³ танай үбгэ эсэгэ Абраһаамда үгэһэн тангаригаа һанан байхаб,

⁷⁴ дайсадайтнай гарһаа мулталан абархаб гээ. Тиимэһээ бидэ айлтагүйгөөр Эзэндээ алба хэжэ,

⁷⁵ наһан туршадаа арюун һайханаар, боди сэдьхэлээр Тэрээндэ мүргэл хэжэ ябаха заяатайбди.

⁷⁶ Тиин ши, жаахан хүбүүмни, Дээдэ Бурханай лүндэншэ гэжэ нэрлэгдэхэш, Эзэнэй урдань ябажа, заларха замыень бэлдэхэш.

⁷⁷ Нүгэлөө арилгажа абарагдахат гэжэ Бурханай арадта ши айладхахаш.

⁷⁸ Бурхамнай гүн ехэ хайраараа огторгойһоо шараһан Гэгээн Наран мэтээр

⁷⁹ үхэлэй харанхы һүүдэртэ хушагдаһан маанадые гэрэлтүүлхэ, энхэ тайбанай замаар хүтэлэн, алхам бүхэнииемнай шэглүүлхэ.

⁸⁰ Хүбүүхэн боргожон бэежэжэ, сэдьхэл зоригынь хатуужажа байба. Израилиин арадта айладхаха сагайнгаа ерэтэр тэрэ хүбүүн сүл губида байба.