Левит 9 - Библи

Аһароон өөрын болон арадай түлөө үргэл үйлэдэнэ

¹ Наймадахи үдэртэ Моисей Аһароон болон тэрээнэй хүбүүдые, Израилиин ахамад зониие дуудаба.

² Тэрэ Аһароондо хэлэбэ: – Өөрын малһаа зэмдэггүй нэгэ буруу нүгэл сагааруулгын үргэл болгон, зэмдэггүй нэгэ эрэ түлгэ түгэс шатаалта үргэл болгон абаад, Эзэндэ үргэл үйлэдэ.

³ Тиигээд израильшуудта хэлэ: «Нүгэл сагааруулгын үргэл болохо нэгэ эрэ ямаа, түгэс шатаалта үргэл болохо нэгэ тугал, нэгэ хурьга абагты».

⁴ Эзэнэй урда амгалан байдалай түлөө үргэл хэхын тула нэгэ хашараг, нэгэ эрэ түлгэ, тиигээд оливын тоһотой холигдоһон талхан үргэлые асарагты. Юундэб гэхэдэ, мүнөөдэр танда Эзэн үзэгдэхэ!

⁵ Моисейн захиһан юумэнүүдыень майхан һүмын урда асарба, бүхы арад зон Эзэнэй урда ерээд зогсобо.

⁶ Тиигээд Моисей тэдээндэ хандаба: – Өөрынгөө Алдар соло танда үзүүлхын тула Эзэнэй юу хэхыетнай таанадта захиһаниинь энэ болоно.

⁷ Тиигээд Моисей Аһароондо хэлэбэ: – Үргэлэй шэрээ дээрэ нүгэл сагааруулгын өөрын үргэл болон түгэс шатаалта өөрын үргэл үргөөд, өөрыгөө ба арад зоноо арюудха. Эзэнэй захирһанай ёһоор, арад зонойнгоо түлөө нүгэл сагааруулгын үргэл үргэхэ хэрэгтэй.

⁸ Аһароон үргэлэй шэрээгэй ойро ошоод, нүгэл сагааруулгын үргэлдэ өөрын үргэл болохо тугалые үүсэлэн гаргаба.

⁹ Аһарооной хүбүүдэй тэрээндэ шуһыень асархадань, тэрэнь шуһанда хургаа дүрөөд, үргэлэй шэрээгэй углуунуудай эбэрнүүдтэ түрхеэд, үлэһэн шуһыень үргэлэй шэрээгэй хаяа руу адхаба.

¹⁰ Эзэнэй Моисейдэ захирһанаар, нүгэл сагааруулгын үргэлэй өөхыень, хоёр бөөрыень, эльгэнэй өөхыень үргэлэй шэрээ дээрэ шатааба.

¹¹ Харин мяха, арһыень хотон хүреэнһөө холо галдаба.

¹² Тиигээд түгэс шатаалта үргэлэй мал үүсэлбэ. Аһароондо хүбүүдынь гаргаһан малай шуһа асарба, шуһаарнь тэрэ үргэлэй шэрээ тойруулан сүршэбэ.

¹³ Тиигээд түгэс шатаалта үргэлые хэсэг хэсэгээр тархитайнь асархадань, Аһароон үргэлэй шэрээ дээрэ тэдэниие шатааба.

¹⁴ Харин гэдэһэ доторыень, тагалсагуудыень угаагаад, түгэс шатаалта үргэлтэй сугтань үргэлэй шэрээ дээрэ шатааба.

¹⁵ Тиигээд арад зоной үргэл асараад, арад зоной асарһан нүгэл сагааруулгын үргэлэй эшэгэ гаргаад, урда мэтээр нүгэл сагааруулгын үргэл болгон үргэбэ.

¹⁶ Тиигээд түгэс шатаалта үргэл болохо мал асараад, тэрэниие номын ёһоор бүтээбэ.

¹⁷ Талхан үргэлһөө нэгэ адха абаад, үглөөнэй түгэс шатаалта үргэлдэ нэмэлтэ болгон үргэлэй шэрээ дээрэ шатааба.

¹⁸ Удаань ниитэ зонһоо амгалан байдалай түлөө үргэл болгон тахилай тугал болон эрэ түлгэ гаргаба. Аһарооной хүбүүдэй тэрээндэ шуһыень асархадань, тэрэ үргэлэй шэрээ дээгүүр тойруулан сүршэбэ.

¹⁹ Тиигээд тугалай болон түлгын өөхэ – һүүл, доторой һэмжэ өөхэ болон хоёр бөөрэ, эльгэнэйнь өөхэ тэрээндэ асарба,

²⁰ тиихэдэнь тэрэ тэдэнээ үргэлэй малай үбсүүнэй хажууда табиба. Аһароон үргэлэй шэрээ дээрэ өөхэ шатааба.

²¹ Аһароон Моисейн захиралтаар, үбсүүень, баруун гуяыень дэен дэлгэгдэхэ үргэл болгон, Эзэнэй урда дэен дэлгэбэ.

²² Аһароон бүхы үргэлнүүдые – нүгэл сагааруулгын, түгэс шатаалта, амгалан байдалай түлөө үргэлнүүдые дууһан бүтээгээд, гараа үргэжэ, арад зоноо адислаад, доошоо бууба.

²³ Тиигээд Моисей Аһароон хоёр майхан һүмэ руу орожо, тэндэһээ гараад, арад зоноо адислаба. Тиихэдэнь Эзэнэй Алдар соло хамаг зондо үзэгдэбэ.

²⁴ Гэнтэ Эзэнһээ гал ялабхин бадараад, үргэлэй шэрээ дээрэ байгша түгэс шатаалта үргэл ба өөхэ шатаажархиба, энээнииень арад зон хараад, баярлаһандаа хашхаралдан, уруугаа харан унаба.