Левит 8 - Библи

Аһароон болон хүбүүдэйнь һахил хүртэлгэ

¹ Эзэн Моисейдэ иимэ зарлиг буулгаба:

² – Аһароон болон тэрээнэй хүбүүдые абаад, хубсаһа хунар, тоһолхо тоһо, нүгэл сагааруулгын үргэл болохо нэгэ буха, хоёр хуса, нэгэ түрсүүг эһээлтэгүй хилээмэ асара.

³ Суглаанай майхан һүмын үүдэнэй дэргэдэ бүхы бүлгэм зониие суглуула.

⁴ Моисей Эзэнэй зарлигаар үйлэдэжэ, майхан һүмын дэргэдэ арад зониие суглуулба.

⁵ Тиигээд Моисей арад зондоо хэлэбэ: – Энэ хадаа Эзэнэй юу үйлэдэхын тухай буулгаһан зарлиг мүн.

⁶ Тиигээд Моисей Аһароониие хүбүүдтэйнь ерүүлээд, уһаар угаалга хэбэ.

⁷ Аһароондо самса үмдэхүүлжэ, бүһөөр бүһэлүүлээд, дээрэһээнь гадар самса үмдэхүүлбэ. Дээрэһээнь эфод үмдүүлээд, эфодой угалзата бүһөөр бүһэлбэ.

⁸ Тиигээд сээжэбшэ-уута үмдэхүүлээд, досоонь урим ба туммим хэбэ.

⁹ Эзэнэй захиһан үгөөр, толгой дээрэнь боолто малгай үмдэхүүлбэ, тэрэ малгайдань урдаа алтан хабтаһатай нангин шүтөөнэй титим һуулгажа барюулба.

¹⁰ Тиигээд Моисей оливын тоһоор майхан һүмые, тэндэ байһан бүхы юумэнүүдые тоһолоод, арюудхаба.

¹¹ Үргэлэй шэрээе долоо дахин сүршэжэ, шэрээ болон тэрээнэй хамаг хэрэгсэлнүүдые, угаалга хэдэг амһарта, тэрээнэй хаяа тоһолбо.

¹² Тиигээд тэрэ тоһолхо тоһонһоо Аһарооной толгой дээрэнь адхан, тэрэниие тоһолон арюудхаба.

¹³ Моисей Аһарооной хүбүүдые ерүүлээд, Эзэнэй захиралтаар тэдээндэ самса үмдэхүүлээд, бүһөөр бүһэлөөд, толгойдонь боолтонуудые бообо.

¹⁴ Тиигээд тэрэ нүгэл сагааруулгын үргэл болохо нэгэ буха асарба; Аһароон хүбүүдтэеэ нүгэлэй түлөө үргэл болохо бухын тархида гараа табиба.

¹⁵ Тэрэниие үүсэлһэнэй хойно Моисей шуһанһаань хургаараа абаад, үргэлэй шэрээгэй эбэрнүүдтэ түрхеэд, үргэлэй шэрээе арюудхаба. Үлэһэн шуһыень үргэлэй шэрээгэй доогуур адхаба, иигэжэ тэрэ үргэлэй шэрээ арюудхаба.

¹⁶ Тиигээд Моисей бүхы дотор өөхыень, эльгэнэй өөхыень, хоёр бөөрэ өөхэтэйнь абаад, үргэлэй шэрээ дээрэ шатааба.

¹⁷ Тиигээд Эзэнэй захиралтаар тэрэ бухын арһа ба мяхыень, шабааһатайнь абаад, хотон хүреэнһөө гадагшань гаргажа галдаба.

¹⁸ Түгэс шатаалта үргэлэй хуса асараад, Аһароон хүбүүдтэеэ дээрэнь гараа табиба.

¹⁹ Тэрээниие үүсэлһэнэй удаа Моисей шуһанһаань абажа, үргэлэй шэрээе тойруулан сүршэбэ.

²⁰ Тиигээд хусын бэе хэдэн хуби болгон хэсэглээд, Моисей тархи, хэсэгүүдыень, өөхыень галда шатааба.

²¹ Доторыень, хүлнүүдынь уһаар угааба. Тиигээд Моисей хусые бултыень үргэлэй шэрээ дээрэ шатааба. Энэ хадаа түгэс шатаалта үргэл, Эзэндэ аятай анхилал, Эзэнэй Моисейдэ захирһанай ёһоор, Тэрээндэ бэлэг болоно.

²² Тиигээд тэрэ һахил хүртөөлгын үргэлэй хоёрдохи хусаяа асарба. Аһароон хүбүүдтэеэ тархи дээрэнь гараа табиба.

²³ Тэрэниие гаргаһанай хойно Моисей шуһанһаань абаад, Аһарооной баруун шэхэнэй омогто, тиигээд баруун гарайнь эрхыдэ ба баруун хүлэйнь эрхыдэ түрхибэ.

²⁴ Моисей Аһарооной хүбүүдые ерүүлээд, тэдэнэй баруун шэхэнэй омогто, тиигээд баруун гарайнь эрхыдэ ба баруун хүлэйнь эрхыдэ шуһанһаа түрхеэд, үлэһэн шуһыень үргэлэй шэрээ дээрэ тойруулан сүршэбэ.

²⁵ Тиигээд тэрэ өөхэ – тарган һүүлыень, хамаг дотор өөхэ һэмжыень, эльгэнэйнь өөхэ, хоёр бөөрэ өөхэтэйнь, хусын баруун гуя абаба.

²⁶ Эзэнэй урда табяатай эһээлтэгүйгөөр бариһан хилээмэнтэй түрсүүгһээ Моисей эһээлтэгүй нэгэ хилээмэ, оливын тоһотой бообо, нэгэ бообо абаад, хусын өөхэн болон баруун гуя дээрэ табиба.

²⁷ Бултыень Аһароон ба хүбүүдэйнь гар дээрэ табяад, дэен дэлгэгдэхэ үргэл болгон Эзэнэй үмэнэ дэен дэлгүүлбэ.

²⁸ Тиигээд Моисей тэдээнэй гарһаа эдэ бүгэдые абаад, түгэс шатаалта үргэлтэй хамта үргэлэй шэрээ дээрэ галдаба, энэ хадаа Эзэндэ аятай һайхан хуншуу үнэртэй һахил хүртөөлгын үргэл болобо.

²⁹ Тиигээд Моисей һахилай үргэл болохо хусын үбсүүень абаад, Эзэнэй үмэнэ дэен дэлгэбэ. Эзэнэй Моисейдэ захирһаар, энэ хадаа һахил хүртөөлгын үргэлһөө Моисейн хуби байгаа.

³⁰ Тиигээд Моисей тоһолхо тоһонһоо болон үргэлэй шэрээ дээрэ байгша шуһанһаа абаад, Аһароон дээрэ, тэрэнэй хубсаһа, хүбүүдыень, хүбүүдэйнь хубсаһые бүгэдыень арюудхаба.

³¹ Моисей Аһароон болон хүбүүдтэнь хэлэбэ: – Таанад майхан һүмын үүдэндэ энэ мяхаа шанаад, һахил хүртөөлгын үргэлэй түрсүүг соо байһан бооботой хамта эдигты, иигэжэ намда захигдаһан гээшэ: «Аһароон болон тэрээнэй хүбүүдынь энээниие эдихэ ёһотой».

³² Үлэһэн мяха, хилээмыень галдагты.

³³ Таанад долоон үдэр соо майхан һүмын үүдэнһээ холо бү ошогты, юундэб гэхэдэ, һахил хүртөөлгын ёһололтнай долоон үдэр соо үргэлжэлхэ.

³⁴ Эзэн таанадые арюудхахын тула иигэжэ хэхэ гээд айладаһан байна, тэрэнь мүнөөдэр хэгдэбэ.

³⁵ Таанад майхан һүмын үүдэндэ үдэр-һүнигүй долоон үдэрэй турша соо байгты, үгы һаа, таанад хосорхот. Иигэжэ Эзэнһээ намда захигдаһан юм.

³⁶ Иигэжэ Аһароон болон хүбүүдынь Эзэнэй Моисейгээр дамжуулан захирһые бултыень бүтээбэ.