Левит 6 - Библи

¹ Эзэн Моисейдэ иимэ зарлиг буулгаба:

² – Хэрбэеэ али нэгэн Эзэнэй үмэнэ гэм хэжэ, нүгэлтэй болоо һаа гү, али хадагалхыень, харюусалга доронь ямар нэгэн зүйлэй үгтэһые мэлзэжэ гү, али хулгайлһан юумэ нюуһан гү, хүнһөө юумэ буляаһан гү,

³ али хүнэй гээһэн юумэ олоод, таһа арсаа һаань, зоной хэдэг нүгэлэй нэгые үйлэдэһэн, худалаар тангариглажа, гэмээ хүндэ болоһон болохо.

⁴ Иимэ юумэ хэһэн, гэмтэй болоһон хүн хулгайлһан, буляаһан зүйлөө, хадагалхыень үгтэһэн юумэ бусаагаагүйгөө гү, али хэн нэгэнэй гээһэн юумэ олоһоноо бусааг.

⁵ Хуурмагаар тангариглаһан хүн тэрэ юумэн дээрээ табанай нэгэ хубиие нэмээд, гарза харюулгын үргэл хэхэ үдэртэ эзэндэнь бусааха ёһотой.

⁶ Гарза харюулгын үргэл гэжэ тэрэ Эзэндэ зэмдэг дутагдалгүй хуса асараг, үгышье һаа, хусын үнэ сэнгые санаартада мүнгөөр түлэг.

⁷ Тиигээд санаарта Эзэнэй үмэнэ тэрэнэй нүгэл сагааруулаад, тэрэ хүнэй гэмынь хүлисэгдэхэ.

Түгэс шатаалта үргэл

⁸ Тиигээд Эзэн Моисейдэ айладаба:

⁹ – Аһароондо, тэрэнэй хүбүүдтэ иимэ заабари үгэ: түгэс шатаалта үргэлэй хуули гурим гэбэл, шатаалта үргэлэй юумэн үргэлэй шэрээ дээрэ, гал дээрэ бүхэли һүни соо үглөө болотор байг. Үргэлэй гал носожол байха ёһотой.

¹⁰ Санаарта маалинга бүд хубсаһаа, доронь маалинга дотор самсаяа үмдэг, тиигээд түгэс шатаалта үргэлэй һүүлээр үлэгшэ үнэһэ үргэлэй шэрээ дээрэһээ абаад, үргэлэй шэрээгэй хажууда адхаг.

¹¹ Тиигээд хубсаһаа һэлгээд, тэрэ үнэһэ отог буусаһаа холо сэбэр арюун газарта абаашаг.

¹² Галынь үргэлэй шэрээ дээрэ унтарангүй носожо байха ёһотой, үглөө бүри санаарта тэрээндэнь түлеэ нэмэжэ, түгэс шатаалта үргэл табижа, мүн амгалан байдалай түлөө үргэлэй өөхэ шатааха ёһотой.

¹³ Үргэлэй шэрээ дээрэ гал унтарангүй, хододоо носожо байха ёһотой.

Талхан үргэл

¹⁴ Энэ бол талхан үргэлэй хуули гуримууд. Аһарооной хүбүүд тэрэ үргэһэн юумые Эзэндэ үргэлэй шэрээгэй урда асарха ёһотой.

¹⁵ Тиигээд санаарта нэгэ адха шэниисын талха, оливын тоһо, байһан бүхы гүгэл абаад, үргэлэй шэрээ дээрэ шатааха. Энэ хадаа үргэлэй тэмдэг хуби гээшэ, Эзэндэ таатай һайхан үргэл, хуншуу үнэр гээшэ.

¹⁶ Бусадыень Аһароон хүбүүдтэеэ эдихэ ёһотой. Хилээмэ эһээлтэгүйгөөр, нангин газарта эдихэ хэрэгтэй – майхан һүмын хашаа соо.

¹⁷ Эһээлтэ хэрэглэн, тэрэниие барижа болохогүй. Өөрынгөө үргэлнүүдһээ тэдээнэй хубита болгон үгэнэ гээшэб. Энэ хадаа нангинай нангин зүйл гээшэ, нүгэл сагааруулгын үргэл болон гарза харюулгын үргэл мэтэ.

¹⁸ Энээниие Аһарооной эрэ үри һадаһадай эдихэдэ болохо. Энэ хадаа тэдэндэ Эзэнэй үргэлнүүдһээ хэтэ мүнхын хубитань гээшэ. Юумэн бүхэн тэрээндэ хүрөө һаа, арюудхагдаха.

¹⁹ Тиигээд Эзэн Моисейдэ иигэжэ айладаба:

²⁰ – Аһарооной хүбүүд тоһоор түрхюулһэн сагһаа хойшо Эзэндэ саг үргэлжэ иимэ үргэл үргэдэг байха: эфаагай арбанай нэгэ хуби шэниисын талха, хахадынь – үглөөгүүр, хахадынь – үдэшэ.

²¹ Тиигээд яла соо оливын тоһондо болгохо хэрэгтэй. Танай асарһан хилээмэн һайса худхаһан гурилаар баригдаха ёһотой, тэрэниие бутаргагты, таатай һайхан хуншуу үнэр гарган, Эзэндэ үргэгты.

²² Энэ үргэлые һахилда хүртэһэн санаартан Аһарооной үри бүхэн бүтээхэ ёһотой. Энэ Эзэнэй хэтэ мүнхын хуули ёһо, талхан үргэл дууһан шатаагдаха ёһотой.

²³ Санаартанай үргэһэн талхан үргэл бүхэн дууһан шатаагдаха ёһотой, тэрэниие эдижэ болохогүй.

Нүгэлөө сагааруулха тахил

²⁴ Эзэн Моисейдэ захирба:

²⁵ – Аһароондо, тэрэнэй хүбүүдтэ иигэжэ хэлэ: Энэ бол нүгэл сагааруулгын үргэлэй ёһо гурим гээшэ. Нүгэлөө сагааруулха тахилай мал Эзэнэй үмэнэ, түгэс шатаалта үргэлэй мал үүсэлдэг газарта гаргагдаха ёһотой. Энэ нангинай нангин зүйл гээшэ.

²⁶ Нүгэлөө сагааруулха тахил бүтээгшэ санаарта энээнһээ хүртэхэ ёһотой. Хүртэхэдөө, нангин арюун газарта эдихэ ёһотой – майхан һүмын хашаа соо.

²⁷ Юумэн бүхэн үргэлэй мяханда хүрөө һаа, арюудхагдаха. Хубсаһан дээрэ шуһанай сэсэрбэл, тэрэ сэсэрһэн хэһэгые нангин газарта зайлаад аба.

²⁸ Иимэ үргэлэй мяханай шанагдаһан шабар амһарта бута сохихо хэрэгтэй. Зэд амһарта соо шанаа һаа, тэрээниие ялайтарынь сэбэрлээд, уһаар зайлаха хэрэгтэй.

²⁹ Санаарта угтай бүхы эрэшүүл энээние эдихэ эрхэтэй: энэ хадаа нангинай нангин шүтөөн гээшэ.

³⁰ Харин нүгэл сагааруулгын үргэлэй малай шуһан майхан һүмэ руу арюудхалгын түлөө оруулагдаа һаань, иимэ үргэлэй мяха эдихэ ёһогүй, галда шатааха хэрэгтэй.